Awor si Carnaval 70 a pasa y ta den historia. Diaranzon di sinishi a pasa y tambe ta den historia. Cada dia cu pasa, ta den historia. “Aprecia Ayera”, “Biba pa Awe” y “Sonya di Mayan” ta palabranan cu a toca e curazon di Lady Ruth hopi anja pasa. Nos ta sigui sinya cosnan nobo tur dia atrobe di nobo cu bunita recuerdonan di Ayera, di Pasado, di e Temponan Pasa. Goza awe cu nos famia y amigonan y nos ta sigui sonya pa nos Mayan ta mihor, mas bunita, mas positivo cu mas alegria y sabiduria. Asina nos tin tambe e bunita recuerdo di un di e bunita y dushi Diabierna anochinan na Djiespies Happy Hours. E Diabierna prome cu e paradanan grandi di Carnaval nos a goza y pasa un anochi hopi alegre y agradabel scuchando e dushi musica di e banda di Robert Maduro “Azucar” y Lady Ruth a subi pista di baile tambe ora dushi musica cu e ta gusta a wordo toca. Un pista di bayle yena cu caranan y curasonnan contento, cantando y hisando man na laira. Nos a nota presencia di nos amigo Wim Steenhuis y Maria Tonk Aruba y nan grupo cu fielmente ta atende y participa na e anochinan dushi aki riba Diabierna na Djiespies Place. Voluntarionan fiel di Hospice Atardi. Wim ta e fotografo voluntario di e dushi anochinan aki y ta saca hopi potret y video cortico di parehanan y of e grupo di hendenan bailando of sintando y despues Maria Aruba, ta post nan riba facebook. Nos a bin topa cu Joyce, e Split Queen, un di e Runnerupnan di Sra. Carnaval den Carnaval 70, cu , si mi ta corda bon, ta biba na Alemania, Europa pero tambe a bin pa participa den nos di 70 Carnaval, manera hopi otro arubianonan bibando y of studiando na Madre Patria Hulanda. Pero, e persona mas dushi cu nos a topa e anochi ey tawata Pastor Jairo Maduro, cu, di sorpresa a presenta, ariba invitacion di Robert Maduro y Azucar. Publico a bira loco di mas alegria ora Pastor Jairo a cuminsa canta su cancion di carnaval D’Fiestah cu su figaro fiiiiii, figaro faaaa, figaro fiiiiiiii cu a lanta masha hopi hende mes foi nan stoel pa subi e pista di bayle pa a jump riba e dushi cantica di carnaval aki. Hopi ta esnan cu a core para banda di Pastor Jairo pa saca potret cu’ne. Lady Ruth, cu no a bay wak e paradanan en bibo e anja aki, pero a goza di wak nan na televishon, a goza un mundo cu e dushi publico na Djiespies Place, cu awor den claridad di luznan colorido bunita y no den scur di mas. Un bista bunita festivo cu presencia di varios turista tambe, bailando cu nos localnan y “having fun”. E bunita actividad aki, riba Diabierna anochi na Djiespies Place ya ta ariba e mapa turistico y si nan no tin’e ainda, ta tempo pa pon’e, pasobra ta parti bunita di e cultura di Aruba awor, aunke ta toca canticanan varia cu no ta di Aruba so. Con cu bo mir’e y bir’e, nos ta keda un isla multicultural cu respet y amor pa prohimo ruman. Lady Ruth ta hasi uso di e oportunidad aki pa condoleer tur esnan cu a conose e pareha Elliott y Martha Jackson, kendenan a fayece no mucho tempo atras, prome Elliott y despues Martha. Nan tambe a gusta fiesta na Djiespies Place. Awor tambe mas serca di mente, alma y curason.
Den e mesun rosea, nos ta felicita e tocayo di Robert Maduro di Azucar, Robert of Roberto Orman cu atrobe a canta e cancion “Mi florecia de amor” masha masha bunita mes. Danki na e famia bunita di Djiespies Place, pa organisa e bunita anochinan aki, cu ta conosi tambe den boca di pueblo como un anochi pa nos grandinan di 50 plus bay ariba, pero cu tambe hopi persona di edad mas hoben gozando di nan pasonan bailable y e alegria contagioso di e “grandinan”. Bunita pa wak tambe sr. Toko Winklaar ariba pista di bayle los e pianan un crenchi. Nos ta corda Toko di su corant digital Awe Mainta cu awor nos no sa wak mas, segun nos cu otro donjo of donjonan. Awor Lady Ruth ta goza di on line cu EANEWS, E arubiano news , apoyando nos hende muhenan cu tambe por briya den e mundo di media, Farrah Boekhoudt, un hende muhe profeshonal simpatico cu su curason na e bon lugar. Cu tremendo noticia di tur e islanan regularmente. Anto den varios idioma pa facilita esnan cu toch ainda no ta domina nos Papiamento ainda asina bon. Noticianan den bunita ingles y hulandes, entre otro.
Ah si ! Otro sorpresa dushi e anochi ey, tawata e presentacion sorpresa di TBS Brassband cu un di nan integrantenan carinosamente conosi como e comediante “Bashaka”.
Oh nan repertorio di cancionnan carnavalesco di algun tempo atras, a baha masha masha dushi mes.! Danki na e pueblo di Aruba, danki na tur cu ta participa fielmente na Djiespies Place Happy Hours ariba Diabierna anochi, pa nan bunita comportacion den dushi paz, respet y alegria. E bunita pareha Marinus De Graaff- Robles cu tampoco no ta falta un Diabierna anochi na Djiespies, lieve Mayra tawata nos juffrouw di 3e klas basis hooopi anja pasa na Mon Plaisir Onderbouw, pero still going strong y gozando di bida hunto. Danki pa lesa nos relato.
Aruba, pasa un dushi dia yen di sabiduria den nos alegria ! Un “bearhug” di Lady Ruth.
