Y asina e prome luna di e anja 2024 a pasa bay den tempo. Nos dilanti e luna di Februari, e luna di Amor. Nos ta spera cu ketobay pueblo y carnavalistanan ta gozando di e ultimo actividadnan segun e calendario di Carnaval 70. Den Carnaval setenta, cada grupo y cada carnavalista cu nan mesun cuenta. Corda cu alcohol di mas por strobabo di yega bo cas. Comporta nechi, paso wowonan di tur bishitante tambe ta ariba nos. Pero mas bien, duna bon ehempel na nos muchanan y na nos hobennan. Ademas di ta yegando na e culminacion di nos dushi Carnaval 70, e luna aki famia Lacle-Simon a celebra cu nan ser stima, sra. Hortencia, su di 75 cumpleanos.
Un dushi hende, un bon mama, suegra, wela, bisawela y ruman. “Mama Hortencia” ta e hende muhe bunita fuerte y hopi dedica na su fe, cu ta habri cas y curason pa e nochinan di oracion y di aparicion na su cas, Modanza 11 A. Sra. Hortencia ta mama di Vidente Valerie . Mama Hortencia su celebracion tawata uno hopi alegre, cu e tokenan chistoso di su yui homber, e gentil cabayero Dave, tremendo maestro di scol, cu ta Pancho di Carnaval 70. Un famia hopi inspira cu hopi gradicimento na nan humilde curason. Famia y amiganan mas pega a bini hunto pa a canta Happy Birthday pa Mama Hortencia y tur presente por a disfruta di un super dushi catering y e bolo mes cu tawata super dushi mes. Pa nos, cada dia un celebracion sigur, mirando con nos edad ta sigui aumenta lentamente y mirando rond di nos cuanto di nos dushi hendenan ta wordo yama pa bay nos dilanti den e reino celestial. Nos tawata hopi contento tambe di por a topa cu e artista grandi di “Vibes y Percussion”, e dynamico cabayero guapo Carlos Bislip y su bunita y distinguida sra.esposa Ingrid den Coffee House disfrutando di nan dushi pida bolo y si mi no tin hera, e dushi frapoccino cu nos tambe ta loco cu’ne. Ta hopi biaha nos ta topa cu Carlos, cu su nomber di carino artistico “Calai” tambe na Poetry Nights, e anochinan di poesia organisa pa Vibration PR Company y Basha Foundation. Durante e anochinan ey, Calai ta laga un of mas alumno di dje toca riba nan instrumento musical y asina comparti di nan talentonan. Carlos Bislip ta hopi conosi pa e actividadnan musical di Jazz tur anja aki aya, cu sigur ta causa un impacto musical cu su manera unico y profeshonal di curason cu e ta bin cu’ne. Nos ta corda un anochi di musica jazz tambe na e lugar “Neighba” den curason di San Nicolas algun tempo atras den 2023, na unda ela duna e oportunidad di presentacion di dos musico femenino di exterior ariba saxofoon, hopi great mes. Bo ta wak Calai, no esun di mas flaco, pero nechi y guapo , esun di mas mihor y super bon den locual e ta hasi y su manera di duna les na su alumnonan. Su bunita curason ta na e bon lugar. Y semper cu e amor, apoyo y sosten di su bunita sra.esposa Ingrid. Ban sigui celebra bida tur dia na e mihor manera cu nos por, na e manera cu salud ta duna, sin abusa naturalmente di alcohol. Pabien ainda na Mirto Lacle, Jenny y comishon organisador di e prome actividad na BNA di 2024, na unda, lamentablemente nos no por a atende pa motibonan fuera di nos control. Exito pa tur e siguiente actividadnan cu lo wordo organisa den 2024. Pabien especialmente na Paula Engelen, cu su bunita curason cultural y social e.o. e actividad di steelpan di The Connor Brothers. Un hende muhe inspira y talentoso cu tambe tin su curason na e bon lugar. Y cu su amor grandi pa Aruba. Danki pa lesa nos relato y pasa un bon y dushi dia cu hopi sabiduria den nos alegria ! Un “ bearhug” di Lady Ruth pa boso tur !
