Lady Ruth no sa con pa cuminsa e relato di e siman aki, e siman prome cu Pascu di Nacemento di Jesus, cu ta inspira hopi aki y rond mundo pa celebra Pascu. Nos no sa si nos lo logra un relato mas prome cu fin di anja tampoco. Nos tur ta asina ocupa cu nos mesun cosnan y cu situacionnan familiar, pero sin keha y dunando Dios danki pa tur cos, tur situacion, tur momento, tur les di bida cu ta reenforsa nos fe y duna nos mas forza pa sigui deal cu cosnan fuera di nos contrrol. Nos salud ta hunga un rol sumamente importante den esaki. Nos niun ta perfecto y nos tur sa faya aki aya den nos biahe den bida. Nos ta lubida cu no ta material ta e cosnan di mas importante den nos bida. Nos curason su lus nunca ta paga, pasobra Jesus a priminti di ta semper cu nos. Ta nos mes ta paga e lus tin biaha casi ful, pero e amor di Dios su yui ta sigui ilumina nos caminda.
Lady Ruth a topa cu varios di nos dushi hendenan den e dianan aki y por a sinti nan alegria tambe den nan preparacionnan pa cu e dianan di fiesta. Mientras otro ta contento, tin famianan cu ta tristo pa perdida di un ser keri of pa recorda esnan cu no tey cu nan e Pascu aki. Nos a pidi permiso pa por a saca algun potret di algun di nos dushi hendenan cu ta traha duro cu amor pa nan famia y pa nan pais Aruba. No ta propaganda nos ta hasiendo, simplemente comparti algun impresionnan , algun “moment opnames” aki aya. Nos ta desea di por ehempel comparti un potret di dos trahador balente di e compania di gas aki na Aruba, cu ta traha foi mainta tempran te den oranan di atardi pa entrega e butishinan na casnan y of restaurantnan pa por sigui cushina.
Nos a bin topa tambe cu un bon amigo, escritor di varios buki, entre otro esun con e negoshi di koffie a cuminsa na Aruba hopi anja pasa. Nos ta papiando di Benjamin Romero , un gentil cabayero hopi inspira y dinamico den tur locual e ta hasi. Nos a topel’e den Ling & Sons promoviendo un dushi bebida estilo thee juice natural cu su preparacionnan special. Nos a gusta esunnan di ginger. Mi ke sa mi a yega di comparti caba, cu awor Ling & Sons ta hopi mas bishita cu tur sorto di productonan local como internacional, y cu mas facilidadnan di w.c. y labamano pa e cliente ora naturalesa bati na porta mientras ta di compras. Antes tawatatin un solo banjo pa muhe y un solo banjo pa homber, masha masha incomodo mes. Danki Dios cu e donjonan nobo a wak y a trese cambio positivo den esaki. Aruba tin asina varios bon supermercado grandi bon sorti . Nos ta termina nos relato , deseando un y tur un Bon y Felis Pascu y for di awor caba un Bon Anja Nobo tambe ! Ban sigui gradici bon Dios pa salud, alegria y sabiduria. Ban sigui stima y cuida otro mihor cu nos por, specialmente nos grandinan. Corda cu bo tambe lo por yega na un edad halto un dia. Danki na tur e instancianan cu ta traha cuida y yuda nos grandinan ! Danki na Wit Gele Kruis cu nan teamnan dinamico di zusternan y broedernan dedica y profeshonal cu curason pa nan trabao. Cu e Pascu aki trese mas amor y paz pa nos tur, dia pa dia. “One day at a time”. Lady Ruth ta gradici Prensa pa e tremendo cooperacion den 2023 y lo sigui hasi su best pa sigui expresa cu amor pa tur den su relatonan den 2024 tambe. Cu e amor, paz y lus di Pascu sigui rondona y carga nos tur, den tur momento den nos bida pa hasi nos tur hendenan mas humilde cu menos orguyo y arrogancia pa placa y of material cu no tur ora nos tin mester di nan.
Ban sigui traha honesto den nos trabao, cu respet pa nos mes y pa nos prohimo ruman, sin importa rasa, religion of color politico. Jesus, ami tambe ta cla pa ricibi’BO e Pascu aki atrobe.
Nos bida ta den Bo man, oh Dios den alturanan. Na Bo nomber Gloria !
