Cua boso ta gusta mas, “Bon dia yen di alegria” of “Sabiduria den nos alegria “?
Ahaaaaaa, boso ta gusta tur dos ! Di nos curason pa esun di bo den e relato di amor aki, mirando cu otro siman Diamars dia 14 di Februari ta Dia di San Valentino, Dia di Amor , Dia di Amistad.
Y pesey nos ta pone awe “ Bon dia yen di dushi amor den nos sabiduria “ , ta bon asina ?
Ay ay ay, e cos cu yama Amor ey si sa ta un crenchi complica. Nos tur ta stima na nos manera, y mayoria di nos ta pone limitacionnan na nos amor sea pa bo pareha of pa un di bo sernan keri.
E generashon di awendia ta diferente cu nos di anjanan sesenta setenta. Nos musica tawata y lo keda esun di mas dushi, cu mas ta inspira ! Lady Ruth tampoco por cu e musica boem boem boem ey cu ta ripiti su mes mas di binti trinta biaha. No tin hopi creatividad den nan. Pero no ta localmente so, tambe e cancionnan na ingles tin hopi cu ta parse otro y ta zona “eentonig”. Si no tawata pa e cancion di The Beatles cu e jufffrouw cantante na Seaport Market Place a canta, mi a kere cu ta un of dos cancion e tawata canta y ripiti, bunita si, pero “eentonig”. Oh, nos ta hanja falta di Flora y Ariaen de Bie cu nan variacion super y nan 5 idiomanan den cual nan ta canta. Pero, ta moderno, un ta sina ? Tin un percentahe di hobennan y of nos hobennan adulto cu kier cosnan demasiado facil pa nan den hopi area. Puntra nan cambia un taira of cose un boton. Hopi di nan no por. Enfin, ta di AMOR nos kier a papia un crenchi awe. Cu e atencion comercial atrobe riba “romantic dinners, chuculati, flor y peluche”meymey di curasonnan cora.
Kiko mas bo kier anto ariba un isla chikito di tamanjo y toch grandi di curason ? Un Mariachi bin canta un serenata pa bo ? Naaaaah, mayoria di nos kier e respet y bon trato, toch ? No regalami joyas of algo otro di gran balor, si despues bo ta tire na cara cu ela costabo hopi placa. Naaaaah, tratami nechi tur caminda, tambe na cas ! Toch ? Hibami wak cine, hibami come, hibami baila, hibami biaha etc. Tur esakinan Lady Ruth a biba y skirbi den un di su bukinan pa inspira otronan cu ta kere cu ta un ves pa anja so e tin of mag di bisa otro cu e ta stim’e. Pa kiko, miedo of berguenza ? Timido?, bo no a tende esey di bo mayornan ? Pero bo ta adulto of hoben adulto caba toch ? Bo tin bo mesun boca pa expresa for di bo mesun bunita curason, toch ? Shonnan, hasi uzo di e regalo dia tur dia cu palabranan y den e accionnan bunita di amor ! Bisele na bida cu bo ta stimele, anto bisele esaki tur dia cu sintimento di amor, aprecio, gradicimento y elogio. Lo tin mas harmonia y paz den cas, mas alegria y amor den e curason y keremi, bo ta hasta bisa danki pa e dushi cuminda cu bo sra.esposa a cushina, aunke falta salo . Hey lieve mensen, goza di amor den su totalidad, como pareha of como un “friend”. Bin scucha bunita expresionnan poetico di amor pa otro y of pa bo isla durante e anochi di Poesia diaranzon dia 22 di Februari 2023 na Santos dilanti Fort Zoutman. For di 7 or caba por yega y cuminsa socializa cu Poetanan y Escritornan cu ta inspira tur hende rond di nan. E tema ta “Healing an island”. Asina “Basha Foundation” ta ranka sali cu su prome nochi di Poesia di 2023 cu yudanza e.o. di Vibration PR Events Marketing, CMB y Setar.
Ki Lady Ruth di ? Valentines ta tur dia !! Siiii, asina mes. Pa nos si, anto ya ta 45 anja !!!!
Danki na e cantante Smiley tambe pa dushi ambientacion na Seaport Market Place cu ta pone nos bai bek den tempo di tempo di Lloyd Baptist, THE sixties and seventies famous singer in Aruba. Na e amor grandi di mi bida, mi esposo Johan “Remember when”, love you always !
For di awe caba, un bearhug grandi diki gordo pa tur cu mi ta stima y tur cu ta stima’mi , pa Dia di San Valentino. Y pa mi dushi y bunita grandinan, un sunchi extra riba nan frenta.
Shonnan, “stay safe” y “love you too “!. We are the blessings ! Dios ta Amor ! E ta stima’bo!
