Nos curason ta dirigi nos awe, pa un capitulo mas di e tema “Siman di buki 2023″. Lesamento cu ta asina importante. Nos lenga materno cu ta asina importante. Pero tambe otro idiomanan ta importante, den nos “verdere studie” den exterior. Con cu bo mir’e of bir’e, tur esakinan ta importante pa nos cresemento y bira mas sabi. Nos sa kiko ta pasando rond di nos, pasobra nos por lesa. Ki dushi tawata pa a hasi algun “yells” cu e chikitinnan den Kleuter y Eerste Klas na tur di e scolnan cu a toca Lady Ruth “Tanchi Ruthy” pa bishita. E tema di e storia cu Tanchi Ruthy a conta :” Rene su dushi wega”, tin di haber cu limpieza, tene cas, kamber, cura, Aruba, scol etc. limpi y pa no tira sushi abao. Un di nos rima yellnan cu nos a sinya nos muchanan durante e dushi siman di Siman di buki tawata :” Piki piki piki sushi, Aruba limpi ta mas dushi “. Nos ta hinka nos mesun melodia y zjeito den dje. Of esun cu nos ta pidi tur mucha drai mira nan juffrouw den su cara y move e wijsvinger poco poco di links pa rechts, di links pa rechts y bisa :” No rabia cu nos, juffrouw . Nos no ta tira sushi abao “. Ta dushi ambiente so tawata reina den cada klas na unda Tanchi Ruthy a bay conta e storia :” Rene su dushi wega”. E scolnan cu Tanchi Ruthy a bishita ta :” Scol Preparatorio Prome Paso, Maria School, Mon Plaisir Basisschool, Anglo Kleuterschool, Scol Preparatorio Washington, Colegio Pastoor Kranwinkel, Scol Preparatorio nos Paraiso , Scol Preparatorio Cacique Aterima , Colegio San Hose y Imelda Kleuterschool. Tin bes un klas di binti pico mucha, tin bes dos klas hunto di casi 50 mucha y un biaha hasta henter e scol. Ta bon mes tawatatin un microfoon y speaker chikito na e Kleuterschool aki, cu a yuda, pasobra asina tawata imposibel di lesa storia cu grito pa tur mucha tende, pasobra, mucha ta mucha y no ta tur por sinta keto cu boca sera pa scucha. Cada scol a ricibi Tanchi Ruthy cu amor y carino y na final ora cla pa bay e siguiente scol, Tanchi Ruthy tawata hanja un regalito, un carino bunita y dushi di e klas na unda ela caba di conta storia. Nan a aprecia y hanja nos presentacion hopi leuk ! Y nos a aprecia nan bunita atencion ! Tawatatin un pauze entre e scolnan y Tanchi Ruthy por a bai dal un koppie koffie cu su begeleider di e dia ey y despues di mei ora asina subi auto pa bay e siguiente scol. Nos tawata conta storia por bisa di 8 or di mainta te 12 or di merdia nan ey. Na tur scol nan a ofrece algo di bebe, sea friuw of cayente y na un di e scolnan hasta a hanja un dushi pida pandushi y dushi snacks cayente come. Locual a capta Tanchi Ruthy su atencion, tur tur scol tawata limpi limpi y bon organisa, na ordo, cu hopi diciplina. Su respet pa e maestro y maestranan di scol a bay top, pa nan bon trabaonan cu nan ta eherciendo. Ta tin algun juffrouw cu por a domina nan klas un crenchi mas mihor cu otro, pero, all in all, petje af !!! Bo por a sinti e amor cu nan tin pa nan trabao diario di yuda educa y forma nos muchanan di awendia, cu no ta asina facil.
Tanchi Ruthy ta gradici tur tur di BNA y di e Comishon KBF Aruba, tur tur cu tin algo di haber cu e bunita projecto aki pa stimula lesamento bau di nos muchanan, danki danki masha danki !
Den nos relato di siman pasa ya nos a menciona e patricinadornan caba. Nan tambe ta yuda den esaki cu curason . Danki na BNA y Commissie KBF Aruba pa nan pasenshi y pa kere den Lady Ruth “Tanchi Ruthy”pa a dunele e bunita oportunidad di a hasi algo bon y dushi pa nos muchanan. Keda pendiente pa e publicacion den futuro sercano di su buki “Rene su dushi wega”, cu ya varios di e juffrouwnan a pidi p’e. Un “bearhug” grandi, diki y gordo pa boso tur !
Sin lubida tur e coleganan autor y tur begeleider ! Y asina Lady Ruth ta conclui su di tres relato cu a trata e siman di buki 2023 cu tema “Mi buki Mi cas” cu tawata un exito rotundo !!!
