Siman pasa nos a menciona algo caba di su bunita apertura cu a tuma lugar Diasabra dia 4 di November den Cas di Cultura meymey di un publico hopi enthousiasma, cu bunita baile y canto di e cantica di e anja aki, cu ariba e screen grandi e diferente speechnan “Kort maar krachtig” di nos MP Sra. Evelyn Wever Croes, minister di ensenjanza Endy Croes y un bunita storia conta pa nos flamante directora di BNA Sra. Astrid Britten cu passion y alegria. Dialuna dia 6 di November e Siman di buki a habri ora e trabao mes a cuminsa, cu en total 16 autor escritor di buki bishitando e scolnan tur rond di Aruba. Un trabao inmensamente dushi y agradabel, pero cu ta laga’bo lenga afor y cansa, pero satisfecho con tur cos ta bayendo. Como autor presentador contador di storia, continuamente creativamente activo mentalmente cu hopi energia y alegria. Pa Tanchi Esmee y Tanchi Ruthy esaki tawata un experiencia masha masha bunita mes participando pa di prome biaha, pasobra nos tur dos tambe ta gusta traha cu mucha. Tanchi Esmee ketobay cu su programa infantil na Radio y Tanchi Ruthy cu si a retira como lider Bubbels di Scouting varios anja pasa, pero cu curason ketobay habri cu e mesun amor pa mucha. Tanchi Ruthy no ta bay pone pics di e scolnan, pasobra nan ta hopi. Nos ta comparti algun pics di algun di e actividadnan cu a tuma lugar durante e siman dushi aki pa e autornan.E anja aki e tema : “Mi buki Mi cas” a cay na hopi bon tera serca nos muchanan. A dedica atencion tambe na e buki di regalo di e anja aki “ Na cas di Carmen y Carlos, cu tin tambe den e buki aki e version na hulandes ;”Thuis bij Carmen en Carlos” un obra di arte den letra y pintura di Jeroen y Vanessa. Ah si, e Diadomingo dia 5 di November, grupo di autor, nan begeleider y dinamico team di BNA tawata huesped di Que Pasa Restaurant pa un dushi desayuno y asina conose otro un crenchi mas.
Diaranzon atardecer di 5.30 pm pa 7.30 pm nos tawatatin un Ban Topa na Bucuti Yacht Club na unda nos a saborea un dushi plato di pisca hasa, banda di un dushi wijntje. Cansa asina mes Tio Ali y Tanchi Ruthy a canta un cantica cu Karaokee, prome cu bai cas sosega, prepara pa su majan atrobe cu animo y energia. Bo ta mane “kom bij” un crenchi di e prome tres dianan di conta storia na e diferente klasnan di e diferente scolnan.
Diahuebs tawata un dia largo pa Tanchi Ruthy tambe, pa , despues di conta storia mainta a bishita tambe Biblioteca San Nicolas den oranan di atardi pa a conta su storia “ Rene su dushi wega” na un grupo di mas o menos 50 mucha den compania di nan 4 of ta 5 lidernan. Contento cu despues e por a baha di San Nicolas bay na e Managers Cocktail Party na Amsterdam Manor, cu tawata e cas di varios di e autornan di afor. Di Colombia a bin Pedro Vargas. Di Corsouw Alvin Inecia “Tio Ali” y Crisen Schorea. Di Boneiro: Boi Antoin y Denise de Jongh Rekwest. Di St. Eustatius : Misha Spanner. Di Hulanda Jeroen Hoogerwerf y Mariska Hammerstein. Anto di nos dushi Aruba : Olga, Desiree, Emerita, Irmgard, Vanessa, Esmeralda( Tanchi Esmee), Sheila Werleman y mi persona Ruthy. Nos a wordo ricibi pa e General Manager di Amsterdam Manor den persona di e gentil cabayero Alfred, cu a yama nos tur un caluroso Bon Bini hunto cu su team dinamico di managers y supervisors. Nos por a “relaha” un crenchi cu nos Green Iguana Cocktail drink y dushi snacknan cu a wordo parti cu excelente servicio di Sebastian y Zyon di Horizons Lounge di Amsterdam Manor, riba di dos piso banda di e pool, cu tremendo bunita bista riba nos laman cu su bahada di solo na e momentonan ey. Cu un danki tambe na Quota International of Aruba, Setar, Kiwanis, Qredits, Plus Accountants, De Wit en Van Dorp Stores, Plaza Bookshop, Biblioteca Nacional Aruba y claro Amsterdam Manor. Y danki pa lesa nos relato. “Un bearhug”. Mayornan : No mester paga mas pa miembrecia na Biblioteca Nacional di Aruba, te 18 anja esaki ta gratis ! Ban sigui inspira nos muchanan pa sigui lesa buki y bira mas sabi !
