Ken ta gusta lesa buki, hisa dede ! Aunke no ta tur man ta bay ariba pa mustra nan dede cu nan ta gusta lesa, tin ainda hopi cu ta gusta lesa. Kisas no manera antes, tempo cu no tawatatin cellular y computer cu tur sorto di weganan electronico digital. Pero……tin cu ainda kier crese den nan conosemento, habri mas nan mente, sinja mas palabra den nan vocabulario, goza di mas creatividad, bay den aventuranan cu e autor y bira mas y mas sabi. Ta ser bisa, cu, un hende cu ta lesa ta pensa pa su mes tambe y no ta core pa loco tras di otronan nan palabranan cu tin biaha por ta hol y bashi. Lady Ruth como mucha a gusta lesa y tawata miembro di Biblioteca Nacional hopi pero hopi anja pasa. Hunto cu su ruman hombernan, nos bunita y dushi Mama tawata hiba nos cada dos siman asina, pa bai cambia buki. Shonnan, e siman di festival di buki tey atrobe, anto a cuminsa cu su apertura yen di zjeito, amor y alegria den Cas di Cultura, Diasabra atardi ultimo, den presencia di nos muchanan, mayornan, e autornan, ilustradornan y e team dinamico di esnan cu lo guia e grupo aki, y hiba nan na e varios scolnan pa e autor duna su bunita presentacion di curason. Meta tawata, ta y lo keda pa sigui stimula y inspira nos muchanan pa lesa buki. Ki bunita pa a topa cu un foyer di Cas di Cultura tur yena cu buki, di nos librerianan local, y bende esakinan na prijsnan special. Y si cumpra un buki of mas di 25 florin, ta hanja e buki di e anja aki como regalo. E buki “ Na cas di Carmen y Carlos cu un storia skirbi pa Jeroen Hoogerwerf cu bunita illustracion di Vanessa Paulina. Den e buki tin e version tambe na e idioma hulandes. Ki bunita ta tambe e cantica di e festival , e fiesta dushi di buki aki, cu ta trata e tema: “ Mi buki, mi cas “. Ki bunita e grupo di muchanan a baila riba e tema aki , bau guia y supervision di Juffrouw Macy of ta Marcie de Jong ( disculpami si mi no tin e nomber correcto). Un bunita show di kita sombre den Cas di Cultura, na unda por a mira y scucha e discurso cortico bunita di nos flamante minister presidente Sra. Evelyn Wever-Croes y tambe di nos ministro di Ensenjanza Sr. Endy Croes digitalmente ariba screen grandi den Cas di Cultura. Locual a capta y toca Lady Ruth su curason, ta, e presentacion contamento di storia pa nos dinamico y bunita directora di Biblioteca Nacional Sra. Astrid Britten, ( tambe ariba screen) cu a caba di cumpli su 20 anjanan como directora di BNA. Astrid, chikito di tamanjo, pero grandi di curason, un dushi hende cu su harimento dushi ta contagiabo pa bo tambe sinti’bo felis ! Nos tin cu menciona tambe e bunita y simpatico Sra. Zetsia Ponson, hefe di e dept. di Arubiana-Caribiana di BNA, cu su tremendo comishon di e siman di buki. Pabien y danki pa e bon trabao. Cu un danki grandi sigur na tur e patrocinadornan cu ta kere den nos futuro lidernan, nos muchanan sabi cu lo ta un bon adulto y cuidadano un dia. Pabien tambe pa e MC, Josie, cu a hasi un bon trabao y comunica cu e publico, specialmente nos muchanan tur enthusiasma. Tin un total di 16 autor participando na e siman di buki aki, cu ya ta den su 31 anjanan di existencia, promoviendo lesamento. Fundacion Bon nochi Drumi dushi, tambe a hasi un bunita presentacion e Diasabra atardi aki, dia 4 di November 2023. E “baby” di e.o. nos bunita amiga colega escritor y Poeta Olga Buckley, si mi por expresa asina. Awor canando y carga pa algun hoben adulto dinamico cu amor y pasion pa inspira nos muchanan pa lesa buki. E Festival di buki pa mucha a cuminsa dia 4 di November ultimo y lo dura te Diabierna dia 10 di November 2023. Nos ta termina gradiciendo tur e scolnan cu ta habri nan porta y curason pa nos 16 autornan, scolnan cu ta apoya nan alumnonan pa lesa buki y bira mas sabi. Danki pa lesa nos prome capitulo di e relato encuanto e Festival di buki pa mucha. Un pregunta pa nos muchanan :” Muchanan, boso sa ken ta Nelson Mandela “?
Un “bearhug” grandi, diki gordo pa boso tur !!!!
