Ki dushi weekend trai lomba, cu un dushi kopi koffie combersando cu amiga colega Poeta escritor Ariana “Lady Ari” Koolman-Chirino den oranan di Diasabra mainta na Coffeehouse , papiando di arte y cresemento personal. Den oranan di anochi a reuni cu rumannan den Christo di e grupo The Voice of Jesus , na Modanza na cas di lieve Mama Hortencia, pa un anochi di oracion y gradicimento pa bida, pa amor, pa alegria y proteccion , guia pa ruman den Christo Sra. Lima Brete, asina bunita y elegante , nos ruman Gilbert Maduro y pa nos flamante bunita y carismatico Vidente Sra. Valerie Simon cu participacion di mas rumannan e.o. Mariana, Dora, Isidora , Sonia y Benita cu tambe a duna di nan parti den oracion. Como un extra bendicion di ariba hasta awa a yobe pa un rato. Nos a celebra e bida di e Santo Rosa de Lima na un manera hopi trankil y positivo masha dushi mes. Sra. Lima Brete a hasi un bunita magnifico trabao den presenta e storia di Rosa de Lima. E grupo The Voice of Jesus ya ta preparando pa e celebracion bunita di nan lider Vidente Valerie dia 4 di Oktober venidero su 25 anjanan fiel den Sirbishi. Dushi y bunita tawata tambe e anochi di Poetry Night na un lugar cu yama Kopi Kofi na Wayaca , cu a tuma lugar caba, pero ta te awor ela yega na beurt pa skirbi di dje. E tema e biaha aki tawata “Humor”. Lady Ruth a inspira un poema prosa pa cu e tema aki pa a purba di pone algun “smiles” ariba e caranan di e colega Poetanan y publico presente. Nos a bisti “ya se sa” a la Frida Kahlo, un regalo di mi bunita prima Yvette Paulina Zichem. Na nos mesa a sinta :” Milly, Yvette, Ruthy y despues tambe Lilian alias artista Shi Prekke a join nos. Tawata reina un super dushi ambiente cu cos dushi di come y bebe. Lady Ruth a comparti poeticamente su joke di Santa Hostia cu ela tuma pa prome biaha den un Misa na Corsouw hopi anja pasa, cu despues cu ela bay tuma aki na Aruba, e Pastoor a nenguele como 4 biaha, despues di a habri man, habri boka, pusha man mas dilanti etc. cu e Pastoor bisando cada biaha :”Curpa di Christo” sin duna Lady Ruth e pida cos rondo blanco ,te ora cu e Pastoor a bisele :” Bo tin cu bisa :”Amen”. Uffffff. Awel si noh ! Un harimento ! Mas Poeta a recita y of declama nan poema cu un toke humoristico. Nos ta corda e joke di e casa di Celeste Richardson cu a puntra pakico e cacho a drenta misa ? Niun tawata sa e contesta, cu tawata :” Pasobra e porta ta habri “, hahahahahaa. Ki bunita tawata e presentacion artistico di un grupo tipico cu canto y actuacion di Jhon Freddy Tobon Montoya y Lilian “Shi Prekke” cu e obra :”Dalhia”. Hopi pret mes. Pret y bunita. E binja a baha masha dushi mes, y, danki Dios no tawatatin ningun hende pa “taha” nos di bebe of di expresa nos arte di palabra. E siguiente Poetry Night lo ta fin di e luna aki di Augustus na Maggys na Playa den nan Cunucu Café. E tema ta “Wall flower” cu ta un crenchi delicado sigur, pasobra no ta tur hende tin e mesun durf di puntra, papia of actua pero ta keda isola apart sin wordo nota cu nan tey. Si, asina mes, no ta di un flor di naturaleza ta papiando, pero di un persona “verlegen” of keto cu ta wordo manera laga un banda dor di e otro hendenan presente. Ban wak kiko ta e inspiracionnan e biaha aki. Nos ta desea nos lectornan un Bon dia yen di sabiduria den nos alegria y pa corda “smile”!
Danki pa lesa nos relato cu hopi atencion di curason. Un “bearhug” pa boso di Lady Ruth.
Ah si ! Danki pa tur bon comentario ricibi pa cu nos relato di siman pasa ! Nos tey pa sirbi como Poeta, escritor y prohimo ruman ! Corda shonnan, mannan ta pa caricia y bendiciona, no pa dal y golpea otro ! Dios ta bon, Dios semper ta bon . Corda tin “algo” cu yama “Karma y Consenshi “.
Danki na prensa pa publica nos relatonan pa nos grandinan tambe lesa, pasobra no ta tur tin of por maneha celular of computer pa lesa cosnan on line. Lieve mensen, hopi danki !
