Oh ki bunita tawata e contacto cu mi dushi publico durante mi di tres One woman show “Alegria di Ruthy 3″ cu a tuma lugar diaranzon anochi dia 14 di December 2022 den Cas di Cultura. E publico a biba cu e alegria di Ruthy for di cuminsamento te fin. Ki bunita tur e musiconan a toca, y ki bunita e cantantenan invita a canta ! Y ki dushi y alegre tur e bailenan tawata, special y unico tawata e tango di Alex y Irina Berkley . Dushi ariba stage, Ruthy, rondona pa henter su team dinamico cu , si no ta pa nan, no lo tawata tin show. Lady Ruth ta sumamente gradicido, contento y satisfecho con tur cos a bay. Un sala bastante yen cu hopi bunita y dushi comentario. Tin cu a bisa Lady Ruth, cu ta prome biaha nan ta asisti na un anochi cu tin no solamente bon y dushi musica y canto, pero yena cu bunita y dushi poemanan di temanan varia cu ta toca curazon. Tin cu a bisa Lady Ruth cu e show nr.3 aki ta “The best”. Tin cu a keda impresiona tambe cu e bunita bistirnan di Ruthy, obranan maestro di e cosedor fini profesional sra. Benita Maduro Hernandez. Specialmente su bistir blanco cu preto, representando e bacanan alegre di nos madre patria Hulanda. E amor pa Hulanda y Aruba cu e toke di Pascu a resalta ! E sneeuw blanco di papel blanco corta chikito chikito a impacta tur presente y hasta algun a sinti un crenchi mas friuw ! Danki na nos stage manager e simpatico y bunita Ludmila “Luty” Martinez cu a realiza e idea bunita ey cu ayudo di varios cu a corta papel blanco bai gol ! Lady Ruth a cuminsa su show cu “mixed feelings” y un crenchi emocional ora ela recita e poemanan dedica na tres bunita hende muhe amiga: Guisela Croes, Melanie Thiel y Gwendy Sneek cu no tey mas fisicamente cu nos, pero si semper den mente, alma y curason. Y mas ainda, ora Mario Alberto Kelly Jr.a canta” La golondrina”, acompanja pa Jerry Diaz Jr.ariba guitarra y Amado Rosina ariba su keyboard. Pero despues tambe a cuminsa cu e parti alegre cu canticanan, poemanan y varios jokenan cu a forma parti di Ruthy su alegria . Nos dushi publico tawata goza y hari cu smak ! Nos a hasi nos best y hunto cu nos team nos a duna 100 % y mas. Wim Steenhuis a capta tur curason cu su dos canticanan bunita na hulandes, cu “Hoog daar aan de hemel staat een gouden ster” biniendo di patras di e sala subi stage y De Roos , cu ela dedica y canta specialmente pa su bunita pareha Maria Tonk, bay te serca Maria y entregele un rosa cora di amor. No por lubida e cantica “Cornelia” cu Victor “El duque” Samuel a dedica y canta pa Ruthy. Ruthy”Lady Ruth” a cumpli cu e peticion di su hendenan cu a bin e prome dos shownan, y a canta “Yambalayah” atrobe “uit volle borst”. Danki lieve Magda Nicolaas pa e toke bunita di e belanan, ora full team a subi stage atrobe pa canta hunto e cantica mas bunita di Pascu “Nochi di paz” “Stille nacht” Noche de paz” y “Silent night”. E biaha aki nos a combersa 5 minuut cu Vivian”Vichi” Lampe, e prinses di Juan Chabaya “Padu” Lampe y Daisey Croes. Tawata un plaser y honor pa tawatatin tambe den nos show e yui muhe di Hubert “Shon Lio “ Booi, Antonieta, kende a canta Kloknan di Pascu den duo cu beautiful Anna Velys Diaz. Nos ta gradici tambe mi bunita amiga colega Poeta, artista multifacetico Ariana “Lady Ari” Koolman Chirino, pa su bunita poema dedica na Ruthy su 50 anja den farandula atraves di un grabacion di curason. Ari ta recuperando di un kebrante di salud, locual ta e caso tambe cu Albert Croes, pianista y keyboard player cu a carga nos prome dos shownan .E gran Amado Rosina a accepta pa toca keyboard den nos Alegria di Ruthy 3 y a toca tambe ariba su steelpan “I’m dreaming of a white Christmas” ora cu pa di prome biaha den historia cultural na Aruba a sneeuw den Cas di Cultura. Nos super nice stage setup cu material bunita tawata den e mannan magico y bendiciona di mi gran amiga di tempo di hubentud, Elizabeth Croes Quilotte hunto cu su bunita yui muhe Marylis Kock Quilotte. Artistanan inspira cu nan bunita curason ! Danki Bea!
Danki Marylis ! Pa termina nos relato, mucho cortiko pa comparti mas di nos dushi show, nos ta gradici e gentil caballero Jhon Freddy Montoya y e bunita Angele Martinez pa a saca centenares di potret ultra bunita mes ! Cu un bearhug pa full mi team cu a duna di nan talentonan cu curason ! Aruba, keda pendiente pa transmission di e fantastico grabacion realisa pa VIP Radio TV, cu pronto lo ser pasa na canalnan di Tele Aruba, Nos isla 13 y 23. Un “bearhug” pa mi amignan di semper : Miriam Koolman, Milly van Delden y Indra Balijn pa tawata mi man drechi den mi show, pa saluda y ricibi e publico y benta di tickets den Cas di Cultura e anochi di show.
Danki tambe na musiconan Alejandro”Ninjo” Comenencia, Stan Dabian, Hubert Ras, Jerry Diaz Jr y Mario Alberto Kelly Jr. Hunto cu Amado Rosina boso tur tawata e “blessings” den One woman show di Lady Ruth, cu a pone Ruthy briya y luci atrobe den “Alegria di Ruthy 3″.
Shonnan, esaki ta e ultimo relato pa 2022, cu speranza, alegria y salud pa por sigui skirbi relatonan den 2023 tambe. DANKI NA PRENSA SKIRBI Y DIGITAL pa nan bunita publicacion di curason. For di awor :” BON PASCU y FELIS 2023 ! Te na Januari, Dios mediante.
