Awor ta net un bon momento pa nos relata un crenchi di e bunita Prome Encuentro Literario, Cultural y Linguistico entre Aruba, Boneiro y Corsou cu a tuma lugar den e luna di Juni ultimo, mirando cu otro siman Diamars dia 18 di juli lo tin e di 2 Encuentro interesante y importante aki den e sala di Biblioteca Nacional Aruba.
Den e Prome Encuentro nos por a scucha e tremendo oradoronan master, e gentil cabayeronan Wini Paolo di Corsou y Boi Antoin di Boneiro cu a capta e atencion total di tur presente y tawatatin tambe presentacion di caha di orgel y presentacion special di artistanan di Aruba, e.o. e Poetanan Munye Oduber-Winklaar y Ariana Koolman Chirino. E publico presente por a disfruta tambe di bailenan bunita presenta pa e grupo Mardi Gras di Corsou. Ki bunita, interesante, informativo y educativo tawata e charlanan. Boi Antoin a papia e.o. di e mesun palalabranan cu ta ser papia, palabranan un crenchi diferente cu ta existi riba tur tres islanan cu un of otro accento un crenchi diferente, cu nificacion igual. Wini Paulo a presenta su buki chikito yen di dichonan y proverbionan of expresionnan na Papiamento. “Biba palabra” ta e di 4 buki chikito di Wini Paulo cu algo mas di 200 expresion, proverbio, spreko, con cu ke yamanan. Tawata reina un ambiente super positivo e anochi ey, un sala completamente yen di personanan cu ta stima, papia y skirbi na nos dushi idioma Papiamento. Di curason nos ta comparti e presencia di e rumannan Lopez : Hubert,Casandra, Michael y Edsel, (mi ke sa ma lubida un, sorry !) yiunan di e abogado Shon Lopez dfm. E profeshonal Edsel Lopez a yuda hopi den realisa e actividad aki . Su aporte y contribucion grandi a wordo altamente aprecia.
Un anochi pret tambe cu hopi harimento acompanja pa un glas di binja y algun dushi snacks. E comishon organisador ta sumamente contento y gradicido cu e botternan di binja regala pa Romar Trading. Y cu e toke di Conmemoracion Abolishon 160 anja esclavitud, lo sigui pone luz y atencion ariba literatura, cultura y nos lenga materno entre e islanan ABC dia 18 di juli, diamars venidero di 6pm pa 9 pm , den Encuentro 2. E biaha aki lo tin como oradornan e bunita simpatico y dynamico Sra. Ange Jessurun di Corsou. Un dama cu ta hopi conosi y stima den e competencianan di e hobennan den “Arte di Palabra”, e biaha aki como tremendo autor di e buki “Faya Lobi” 200 anja di amor ferviente den Diaspora. Un obra sumamente exitoso !cu ya a crusa hopi frontera. Tambe Sr. Dominico Werleman, autor di e buki “ Hallo !Mi ta sapato drechi di Mauricio” y otro storianan cortico.Y varios artista di Aruba lo tey pa duna nan bunita presentacion, un toke cu semper ta pone mas luz y briyo riba e anochinan bunita asina.
E di dos Encuentro literario cultural linguistico lo cuminsa pa 6 pm di atardi y lo bay te cu 9 pm anochi. Stoelnan ta limita, kemen bin tempran si bo ta un persona cu no por para hopi largo. Un otro anochi di actividad organisa pa e dinamico pareha cu amor y passion pa cosnan di literatura y cultural cu Aruba semper na pechu, e pareha Mirto Lacle y su bunita sra esposa Jenny Boezem en cooperacion cu Biblioteca Nacional y otro instancianan. Shonnan, danki pa lesa nos relato cu atencion. “Stay safe, love you too “! Un “bearhug” di Lady Ruth. Un bon dia yen di alegria ! Un siman nobo colma di salud y bendicion. Nos ta accepta cada dia nobo como un regalo mas. “One day at a time”.
