Ora nos tin asina hopi cos bunita pa skirbi di actividadnan social cultural cu a tuma lugar, pero cu nos relato ta un ves pa siman. Nos ta bay bek un crenchi den tempo awe cu nos relato di Scol di musica Rufo Wever. Alumnonan di e muziekschool aki a tene por bisa un siman di concierto den e sala chikito na banda den Cas di Cultura. Ta hopi famia, amigo – y amantenan di musica a bin goza di e conciertonan aki , pa duna nan sosten y apoyo na nan yuinan of nietonan expresando nan talentonan riba un of otro instrumento. Lady Ruth no a logra bay henter siman, pero a bay goza dos dia trai otro di nan dushi musica. Tawatatin tambe un di nan conciertonan na Teresita Center den curason di San Nicolas, si mi no tin hera. Nos a topa amigo musico Ivan Quandus cu a invita nos pa e concierto ey tambe, pero nos no a alcansa. Ivan tawata na encargo di e grabacion oficial profeshonal di tur e conciertonan di e scol menciona. Nos por a scucha entre otro e hoben pianista cu hopi biaha a toca pa nos na Poetry Night, Jeandre Tromp cu ta causa hopi furor cu su tocamento moderno riba keyboard. E ta un di e studiantenan cu pronto lo of a bay caba Hulanda pa continua cu su estudio den musica di piano. Un otro studiante cu pronto lo biaha pa madre patria Hulanda pa sigui studia ta e simpatico, bunita y talentoso Jolene Wever, yui muhe di sra. Arlene y David Wever. Arlene ta un tremendo cantante den un di e coronan di Maybeline Arends Croes. Jolene ta bay studia algo den agricultura . (Nos no ta corda kico exactamente, pero algo hopi importante mirando cu mundo henter ta birando “green” ) Nos ta spera cu Jolene sigui toca piano tambe na Hulanda ora tin tempo y e oportunidad, pasobra, e tin e talento di su tio Albert Osric Croes awe dfm. Jolene a toca hopi pero hopi bunita mes den e concierto di muziekschool, specialmente e cantica di Albert “ Bells of joy”. Tawatatin tres hoben mucha muher cu a canta tambe den e concierto aki, un cantica na frances masha masha masha bunita mes ! Nos ta corda y nos ta cuminsa hari cu yen di smak atrobe, ora cu e lieve juffrouw cu ta duna les na muziekschool juffrouw Catherine Provance a presenta un di e otro alumno of ta alumnanan pa canta un asina yama “Lullaby”, cu ta cantica pa scucha y of canta ora ta prepara pa bay drumi, anto e di cu e publico” Boso por drumi un rato”. Nos no por a stop di hari ! Nos a saca mas bunita potret di mas alumno, pero nos no por manda tur den un solo relato. Talbes mas despues nos hanja otro oportunidad, cu tema di musica , nos lo manda nan. Nos ta felicita tur e maestro y maestranan di Muziekschool cu nan alumnonan fantastico den tocamento di nan instrumentonan. Pa medio di nos relato nos ta manda palabranan di condolencia, consuelo y amor pa lieve Gina di Muziekschool, cu e fayecimento di su pareha Chucho Hoek. Un gran musico profeshonal cu a duna hopi na Aruba. Nos ta felicita den e mesun rosea tur e studiantenan cu a gradua y of a bai over y na esnan cu ta bay sigui studia den exterior tur tur clase di exito. Pone bo meta bo dilanti y “stay focused”. Na esnan cu a “keda sinta”, hasi mas bo best y corda cu mundo a wordo traha den 6 dia. Y cu no ta tur cos ta logra den conteo di un dos tres . Tin biaha e ta tuma un crenchi mas tempo y esfuerzo. Talbes menos tempo ariba bo cellular y studia mas. Y, pabien na tur e alumnonan di Scol di musica Rufo Wever cu nan exitoso concierto recientemente.
Musica ta alegra e curason, e ta relaha, e ta inspira .Hasi manera Lady Ruth y pone bo musica preferi na volumen halto den bo kamber of bo cas y bayla manera niun hende ta mira, bayla bay cu boshi alegria ! Expresa bo mes den bo alegria y bo amor pa bida ! Shonnan, danki pa lesa nos relato di e siman aki, y keda pendiente pa e otro actividadnan cu mi no a skirbi di nan ainda, pero nos ta purba bay beurt pa beurt segun nos curason y nos prioridad. “Stay safe, love you too !”
