Ahaaaaaaa! Awe nos curason alegre ta comparti y dedica e relato aki na un di nos hendenan balente, trabajador. Un hende muhe den e ramo di periodismo. Su nomber ta Farrah Boekhoudt.
Awendia nos tin hopi hende muhe profeshonal cu curason den tur e ramonan di trabao. Lady Ruth kier a para keto un rato riba un di nan specialmente, pa motibo cu , dia Farrah a cuminsa den e trabao di periodismo y televishon, e tawata wordo rondona pa cabayeronan trahando den e mesun ramo aki den nivelnan mas halto. E trabao tawata mustra duro, pero Farrah cu su bon y humilde curason , su bunita energia y su mesun forsa fisico a tuma e reto aki y a cuminsa move den tur direccion cu e biento periodistico tawata hib’e. Cu alma y curpa ela duik drenta e arena aki cu su mesun estilo di hasi pregunta, su mesun estilo di entrevista, su mesun estilo di raporta. Mas importante, su mesun estilo di ta. Honesto, sincero, directo y simpatico cu bon manera unda cu e bay. Nos por comparti su carrera foi comienso te awor den 2023, su estudio, na unda tur ela traha. E tin actualmente 23 anja den medionan di comunicacion, cu tur su experiencianan acumula. Farrah ta un reportero profeshonal,fotografo,editor y escritor. Farrah a studia na Aruba y Hulanda , despues di su Mavo ela sigui pa Operation Management (MBO) y a sigui cursonan den iluminacion fotografico, fotografia digital, scriptwriting film y televishon, Awe Farrah ta maneha su propio negoshi di Media. Farrah a traha na Corant, Radio y Televishon prestigioso na Aruba y Bonaire. Na Diario, Bon Dia Aruba y Solo di pueblo. Na ATV, Energia Vision, Dutch Caribbbean TV y Tele Aruba.
For di 2018 e ta propetario di su mesun negoshi E Arubiano Productions & Media VBA cu su plataforma eanews.com y corant E arubiano newspaper. Un concepto unico y nobo pa Aruba y mundo. Un medio independiente cu ta existi pa su clientenan y tambe donacionnan di esnan cu ta kere den e plataforma independiente aki. Un di e pilarnan cu sigur cu kier hasi fuerte ta e conosemento di trece e noticia y of informacion pa comunidad tin su libertad di lesa, mira y scoge lo corecto.(Sin duna opinion propio, pero cu cada ken cu nan consenshi scoge loke ta e berdad y realidad.) Farrah ta traha riba diferente area den medio manera : politica, social, polis, salud regional treciendo noticia di e islanan Aruba, Boneiro, Corsou, Sint Maarten, Saba y Sint Eustatius. Conectando islanan den Caribe cu Mundo. Lady Ruth ta orguyoso cu nos muhenan tambe por y ta felicita Farrah y tur e otro damanan periodista cu nos tin awendia trahando profeshonalmente cu curason. Sigui cu boso bon trabao ! “You are the blessings!”
Pa Farrah Boekhoudt , e Poeta Lady Ruth a inspira e siguiente poema :
LADY FARRAH BOEKHOUDT “ E ARUBIANO NEWS”
F arrah Boekhoudt, awe e Poeta Lady Ruth kier gradici’bo y elogia’bo
A riba tur bo bunita logronan clave, bo sonjonan den bo metanan concretisa y realisa
R ubiano di curason, balente, creativo, “straight to the point” , bon studia y hopi inspira
R ubiano original, un hende muhe bunita di paden y pafor cu un curason ilumina bo ta
A bo, un periodista femenino profeshonal cu experiencia, cu un vocabulario extenso
H ibando nomber di nos dushi isla Aruba den Caribe y tambe internacional
B oekhoudt Farrah, bo ta pone’mi corda riba “Wonder Woman” na televishon
O ra cu bo a demonstra cu bo ta y tey fuertemente meymey di e cabayeronan den e mesun ramo di trabao, abo cu hopi dedicacion
E forza interior den e sed pa sigui crese y desaroya ta dunando su bunita frutanan den EANews y mas,
K ere den bo mes, cu bo mesun fe, poder y determinacion pa briya den tur cos unda cu bo bay
H opi informacion den bo noticianan formula asina bon sin nodi cuestiona, sin draai
O hala nos tur por sinya di bo perseverancia, tolerancia den bo presentacion y programacion
U ni cu e viahe di hanja sa mas berdad pa yuda esnan mas vulnerabel y debil pa nan tambe sa
D en bo “Beautiful Lady Farrah” tin e misterionan di claridad den cada bondad su integridad
T uma y accepta e poema aki, como un strea di diamante pa bo exito den bo ser su specialidad
Autor : Ruthy”Lady Ruth” Vrieswijk-Bergen
