Nos ta dedica nos relato di e siman aki na varios di nos hende muhenan fuerte y inspira. Nos lidernan dedica cu hopi amor pa nan mes, nan famia, nan trabao y nan pueblo.
Cu amor pa nos Prome Ministro Evelyn Wever Croes y pa nos Ministro di Finanzas y Cultura Xiomara Maduro. Y nos lo dorna nos relato cu algun pic di mas di nos damanan potente y balente den nos comunidad. Pa nos Min-Pres nos a inspira e siguente poema : SRA. EVELYN WEVER CROES, NOS PROME DAMA PROME MINISTRO
A bira tempo pa un otro bunita poema pa nos Prome Ministro
Un hende muhe bendiciona, capacita y inspira nunca bisto
Nos prome aki na Aruba
Cu a guia y duna.
Un bunita hende muhe cu un bunita curason
Demonstrando pa su isla su amor, pasion y dedicacion
Trabao duro no a spant’e
Ela demonstra y cumpli den su mesun fe
Representa nos dushi isla dignamente tur caminda
Un profeshonal cu curason cu sa kico ta stima
Un sra.esposa mama y wela cu su mesun alegria
Su mesun momentonan den su oracion na rudia
Bunita den brasa di su guapo esposo riba pista di baile
Di e bunita fiesta di bruid di Carlino y Magaly
Pasobra, nos prome ministro tambe tin cu relaha
Di tur e responsabilidadnan cu ta presenta
Cu su mesun tokenan artistico den workshop serca Laureen
Demonstrando cu amor pa arte den su alma tambe e tin
Aruba ta stima, aprecia, respeta y apoya e bunita sra.aki
Cu su mesun luchanan den su profeshon, manera e roza cu su taki
Aruba ta bisa danki pa tur bon trabao, cu mas na caminda
Ariba nos Prome Ministro Evelyn Wever Croes nos ta sigui brinda
Cu Bon Dios sigui drama su bendicionnan di inspiracion riba dje
Pasobra, pueblo di Aruba y su famia, ketobay, mester di dje
Autor : Ruthy”Lady Ruth” Vrieswijk-Bergen
Nos a bishita ambos Ministro pa a hasi entrega di un Poema y cuadra di Lady Ruth. Ambos bishita tawata hopi agradabel super positivo. Nos ta spera cu e siman nobo aki tambe lo ta uno productivo colma di salud, alegria y sabiduria. Nos curason di Poeta ta sigui inspira. Danki pa lesa nos relato cu atencion. “Stay safe y love you too “.
