Ahaaaaaaaa! Awe nos ta bay un crenchi “back in time” cu nos relato, pasobra nos curason a sinti bunita na e actividadnan aki tambe, recientemente. Tur dia nos tin Aruba den nos curason y den e luna di Maart ultimo nos a wordo invita pa lieve juffrouw Christine, pa bay duna un presentacion cultural na scol Reina Beatrix, awendia ubica den e edificio cu antes tawata “Huishoudschool” banda di Postkantoor na playa. Nos a invita e bunita y simpatico Vivian “Vichy” Lampe ,e unico yiu di Sra. Daisy y Padu Lampe awe dfm, pa join nos y hunto nos a capta e atencion di e 3e klasnan sigur. Claro cu band’i poema y canto nos a papia di Padu como co-compositor di nos bunita hymno y a mustra e muchanan un potret poster di Juan Chabaya “Padu Lampe”, cu ta cumpli su di 103 anja den shelo serca su Creador di amor e anja aki. Padu a keda cu nos den e bida aki te cu su 99 anja, na caminda pa 100, ora cu Tata Dios a manda buskele. Nos ta recorda nos dushi Padu mas ainda, dia 26 di April, dia di su cumpleanos.
Tawatatin hopi actividad bunita na e scol e mainta aki, cu Brandweer y mariniernan y tambe Heintje Ras a participa cu su mini museo, cu aparato y artefactonan di antanjo masha bunita mes. Nos a topa tambe cu un trio di musico forma pa Ryan Maduro, Eby Peterson y Edgard Kelkboom. Tawata den e dianan ey tambe cu Lady Ruth a bishita un patient na hospitaal y a topa y sera conosi cu un gentil cabayero, un Therapista profeshonal cu curason cu ta gusta pinta cuadranan super bunita den su oranan liber. Meneer David Janse. E ta pinta ariba pida “driftwood” colecciona canti lama na costa panort di nos isla, of hasta ariba un pida “plafond”. Su inspiracionnan ta fantastico y hopi biaha cu temanan di flora y fauna. Ki precioso su obranan ta ! Y ki bunita y caluroso e murayanan den hospitaal ta luci cu tur e bunita cuadranan colorido y alegre di David Janse ! David Janse,” you are the blessings !” Nos a hasi conosi tambe cu dos otro miembro di e team fantastico di hospitaal, dos shon di hende, Sra. Ferdal Tagorda y Sra. Silvia van der Biezen, kende a sali como empleado di luna ehemplar recientemente. Ambos a atende mi tata profeshonalmente cu curason, cu amor y carino ! Danki na Dr. Casper Lacle pa su profeshonalismo y su tremendo team pa e atencion y cuido pa cu mi tata su curason. Nos tin bon dokternan na Aruba ! Personal di hospitaal ta servicial y hopi atento. Nos tin cu gradici nos bon Dios pa nan tur, pasobra nos a tende noticia hulandes cu na Hulanda tin scarsedad e.o. di dokternan di cas . Bon dokternan cu ta bin na mente ta e rumannan chirurg Dr. De Cuba, awe dfm, cu a yuda hopi hende. Dr. Falconi cu tin penshoen pero semper cla pa yuda profeshonalmente cu su amor di prohimo ruman. Nos tin tambe e carinoso Dr. Lily Beke y no pa lubida Dr. Aljaf, Dr. Angela y Dr. Vallejo, djies pa menciona algun, tur semper atento cla pa yuda. Y un di e “nobonan” cla pa traha den e ramo aki, Dr. Frederika Rangel Mansur. Cu bon Dios ilumina’bo tambe lieve Ika, den bo bunita profeshon di yuda otro.
Lady Ruth ta hanya cu dokter Casper Lacle ( pasobra e conose un otro Dr. Lacle , Dr. Gregory Lacle, Neuro-chirurg tremendo profeshonal cu curason tambe,) nos ta hanja cu Dr. Lacle cu a yuda mi tata ta parse e famoso artista violinista profeshonal Andre Riue di Hulanda cu su bunita cabey largo. Lady Ruth ta gusta Dokternan cu ta splica kiko nan ta bay hasi y a hasi pa yuda e patient y despues tambe si mester a hasi cambio y of adapta cierto procedura.
Shonnan, te aki nos relato pa e biaha aki, relata cu hopi amor y carino. Nos ta spera cu e Siman Santo y Pascu di Resureccion tawata di gran bendicion pa nos tur. Ban sigui gradici nos bon Dios pa bida, salud, alegria y sabiduria ! Ki bunita tawata tur e anochinan di Oracion y e demas encuentronan di fe, hermandad y amor prome, durante y despues di e Siman Santo cu nos grupo di Oracion na Modanza bao guia di e bunita y carismatico simpaticonan : Vidente Valerie Simon, shon Ida y Linda, Isidora, Gilbert y Vanny. Nos a canta, alaba y glorifica Dios, Jesus y Mama Maria . Valerie y su tremendo team cu hopi debocion y fe spiritual, cu amor pa nan mes, pa nan famia y pa nan prohimonan. Beautiful Valerie a scoge pa tin paz y trankilidad den su bida y ta un tremendo bon ehempel como un lider cristian. Un shon di hende muhe. Un hende manera tur hende cu ta traha pa su pan di cada dia cu su trabao duro den “Vely Mar Spa” , na Washington 12 , Aruba, telefoon 587 2956 of 743 3168. Kemen, yuda tambe riba terreno di salud cu bon massashi y cuido. Y cu un amor inigualabel pa su mission den e mundo religioso. Su grupo keto bay hopi activo desde casi 25 anja pasa cu actividadnan bunita regularmente. Despues di un di e anochinan di Oracion riba un Diasabra den e luna di Maart ultimo, nos a celebra Valerie su “blessed Birthday” cu e tremendo presentacion di Victor “El duque” Samuel , cu a entretene nos cu su canto den su tremendo bos !
Nos a hasta los e pianan y heupnan un crenchi bao e streanan ilumina na shelo e anochi bunita aki. Y nos a canta varios di e canticanan hunto cu Victor.
Pabien ketobay lieve mooie Valerie, bo ta un bunita instrumento di amor, paz, alegria y sabiduria di Tata Dios. Nos, Lady Ruth, Modanza y Aruba ta stima’bo. Hopi conose full bo storia y testimonio fei tempo di Koyari, y tur cu conose’bo a keda impacta. Aunke tin un of dos cu kier purba bruha tera riba bo” journey of blessed life” y papia cos negativo di bo, perfecto nos niun ta, pero no tin nodi ataca un shon di hende pasobra e no kier a wanta golpi fisico mas. Ela scoge pa paz, trankilidad y un amor nobo di bon trato y repet. Dios ta stima nos tur y nan tambe y nos ta reza pa tur por yega bek na nan paz . Danki Vidente Valerie, pa inspira nos tur rond di bo cu bo manera simpel y toch asina grandi y bunita, unico y special di alegra nos curason ! Dios bendiciona’bo awe y semper. “Valerie, you are the blessings “!
