Shonnan tur, com bay ? Den nos relato di e siman aki, nos lo purba “touch” un tiki di e bunita programa cultural na Fort Zoutman, e asina yama “Bon bini festival” cu ta un “must see and hear” pa nos turistanan. Pero nos mesun hendenan local tambe por goza hopi di e bon musica, baile, teatro y historia di nos isla. MC Leonardo Phillips ta hasi un tremendo bon trabao y ta comunica asina dushi cu e publico presente, principalmente den e segmento di nos dushi idioma Papiamento. Turistanan ta sinja maske ta algun di e palabranan di mas bunita y dushi di nos lenga materno. E show ta wordo carga pa e.o. Tipico Ola Musical cu nan tremendo cantante Mario Alberto Kelly Jr., grupo di baile Pop Corn Dancers, e cantante Quincy Hasham cu ta pone turista lanta baila hunto cu ne den su dushi alegria, Caha di Orgel Istela y un tremendo Brassband. Lady Ruth a bishita hopi di e Bon Bini Festivalnan aki algun tempo atras, y a nota un bunita cambio positivo mas o menos 2 of 3 siman pasa, cu e historia di Aruba y e presentacion di e esclavo Virginia, relata pa Beach Lama y actua masha bon mes pa un juffrouw hoben den e show. Locual nos por a nota, bayendo atrobe un siman si un siman no , cu nan prijsnan a subi drasticamente y ta na dollars. Ta prijsnan di hotel y restaurantnan luhoso por bisa, y nos a ripara cu casi niun hende tawata cumpra algo di bebe of come, ni turista, ni local. Segun Lady Ruth tawatatin un of ta dos local tambe presente.
Nos , como local y penshonado por paga 8 of 9 florin pa un cup di binja, pero 7 dollar ta un crenchi di mas. Podise e persona encarga cu e bar tambe tin cu paga su huurprijs halto ?
Entrada pa turista ta 15 dollar pa persona awor, y pa local 15 florin. Podise nan por baha e prijs na florin un crenchi pa e penshonadonan. Antes localnan tur tawata paga 5 florin . Nos tambe ta comprende cu tur cos ta birando mas y mas caro cu prijsnan aumentando, pero di mas tampoco no ta bon. Nan no tin “overheadkosten” di airco of waiters , paso ta den aire liber, no ta den glas y no ta sinta na un mesa y ta un persona ta traha den e bar y cushina. Tuma esaki como un critica constructivo. Nos a keda decepciona tambe recientemente den e direktiva di e mundo di baseball little league na e entierro di gran yiu di tera cu a duna y sirbi den baseball little league casi henter su bida ,sr. Elio Heronimo,awe dfm. Un atardi cu bunita tocamento di guitara y canto di Max Hassell y hopi hende a bin tuma despedida di Elio. Un prima di Elio su casa a papia den nomber di Jeanette ariba e peticion di Jeanette. A spera cu e District Administrator sr. Donata lo a papia den nomber di Baseball Little league y gradici y menciona con bon y fantastico Elio Heronimo tawata cu e muchanan, ora di biaha y representa Aruba etc. pero net net nada. Jammer, nos no sa kiko por tawata e motibo cu sr. Donata no a hiba palabra, pasobra e tawatatey presente pa duna condolencia si. Podise no tin baseball na curason mas, si no tin curason pa su lidernan cu a destaca y traha pa anjas cu e muchanan, cu amor y pasion? Cansa ? Unprofessional ? E sa papia bon bon na televishon toch ?. No ta tur ora esnan den nan tristeza ta corda pa pidi si tin hende cu kier dirigi palabra, pero grandeza di algun miembro di grupo teatral Mascaruba cu si a aserca famia Heronimo pa a hiba algun palabra di curason, pasobra Elio tawata un gran actor di teatro tambe. Danki Dios tawatatin presente mas lidernan den baseball little league ,cu a bin demonstra nan ultimo respet na despedida di Elio Heronimo.. Lidernan activo y inspira cu tambe ta trahando cu e muchanan pa anjas caba, cu nan amor y dedicacion pa baseball Little League. Pero ta sr. Donata tin of ta suppose di bisa algo , un ta sina ? Esun cu ta papia na televishon ? Of e ta esun cu por aserca un otro persona den e mundo di baseball little league pa bisa algo di curason. Jammer ! Considera esaki como un otro critica constructivo. Danki Dios cu Sra. Jeanette mes a pidi Max Hassell toca e hymno di Aruba, cu tur presente cantando, como un respet grandi pa su querido esposo Elio cu semper tawata prepara su mes bon bon ora di bay afor cu e muchanan pa cualkier wega y of campeonato y percura pa semper tin e hymno di nos dushi Aruba hunto cu n’e.
Te aki nos relato di e siman aki, skirbi di curason pa tur cu ta gusta lesa cosnan positivo cu por inspira nos tur. Pabien na tur esnan cu tin algo di haci cu e programanan bunita den Fort Zoutman, nos Bon Bini Festival. Y un biaha mas, nos condolencia, consuelo y amor pa lieve mooie Jeanette Heronimo Lopez Henriquez , awor cu su kerido esposo Elio Heronimo mas serca di mente, alma y curason. Hopi forza beautiful friend ! Lieve mensen, “Stay safe y love you too !”
