Saludos ! Awe den nos relato djis un chispa di e Dia Internacional di Hende Muhe dia 8 di Maart ultimo y di nos Dia Nacional 18 di Maart 2023 den Centro di bario Playa Pabao . Un dushi celebracion cu un publico grandi, un full house, cu a scucha cu atencion y sinja hopi for di tur locual e simpatico y bunita Notario Hilde Rodriguez-Taekema a presenta encuanto herencia, testament, partnership etc. etc. Cu un grupo di baile moderno di CBPP, ambiente musical y canto di Edjean Semeleer y bunita poemanan recita pa Omaira Britten, Ariana Koolman Chirino y Ruthy Vrieswijk-Bergen. Y cu e toke di amor un biaha mas di Martijn Trading cu regalonan pa rifa den e publico presente. Despues dia 18 di Maart e dushi celebracion na CBPP cu varios gruponan di baile y cantantenan e.o. un di e ganadornan di e festival pa Aruba e anja aki, cu a canta den duo tambe cu Lady Ruth, un cantica cu letranan improvisa pa Lady Ruth, riba melodia di e cantica “My Bonny” den CBPP. Oh e bailenan tawata super suser alegre y bunita !
Algun di esnan cu a duna un bunita presentacion :Coro L’Escala, Gucci Dancers, Chaz Dancers, Baile di sinta cu grupo di Lia Lopez. Stephany Quandt cantante solista y otronan.
Nos ta comparti awe, e poema cu Lady Ruth como un sorpresa a inspira y dedica na CBPP y nan presidente dynamico y hopi activo, e gentil cabayero Dennis Burke, cu tawatatei for di e comienzo di e Centro di bario aki y tey ketobay trahando cu alma y curpa .
CENTRO DI BARIO PLAYA PABAO TA CELEBRA 45 ANJA
Un dushi lugar cu a nace dia 23 di Februari 1978
Un Centro di Bario cu no tin su morocho
Un Centro activo y bibo,
Un lugar di nan, di nos, di mi y di bo
Pa tur e dushi hendenan di Socotorro,
Socotorrowijk, Rancho, Madiki, Pos Abao
Bushiri y Santa Helena,
Den comienzo tambe a conose nan lamper y strena
Cu e nomber cu a wordo acepta como CBPP
Tawatatin tambe un comishon di damas, sra y juffrouw
Hopi actividad a mira lus di dia den e Centro aki
Pa cu e desaroyo fisico, social y spiritual
Manera un bunita roza cu su mesun taki
Lady Ruth conose como un di nan dinamico presidente
Sr. Dennis Burke, un gentil cabayero trahador awe nochi presente
Un Shon di hende homber inspira cu no tin su igual
Dennis a toka curason di hopi, tambe di ami
Historia di demas heroenan ta largo, lista di nombernan tambe
Nos por bisa si, cu e atencion duna na e barionan den vecindario
A y ta marcando historianan interesante y legendario
Hobennan balente cu amor y dedicacion pa nan bario stima
Den e historia y curason di CBPP bon graba y warda
Pabien na Stichting Centro di Bario Playa Pabao cu 45 anja di felis existencia activo
Tur cu tey presente awe nochi pa celebra Dia internacional di Hende Muhe
Ta prueba ketobay, cu tur e barionan menciona tin mester di dje bibo
Pa mas actividadnan bunita, fisico, social, spiritual y cultural por sigui tuma lugar
Danki na tur foi cuminsamento y tur cu tey ainda y awor den un direktiva dinamico
Pa tur e otro Centro di Barrionan, boso ta un ehempel y role model fantastico !
Un danki special na e cara y curason di CBPP, den persona di Dennis Burke
Pabien y danki pa bo perseverancia den existencia di boso Centro di Barrio.
Cu Architecto di Universo sigui drama su bendicion riba cada un di boso
Pa e barrionan menciona y nan bishitantenan por sigui disfruta y sinti su goso !!!
Lady Ruth ta pidi boso tur presente, lanta para y bati man
Y Pa CBPP su 45 anjanan nos grito di alegria :” Hiep hiep hiep…..hoerrrrraaaa!!!
Pabien na Meneer Dennis Burke, un bunita prohimo ruman !!!!
Ruthy”Lady Ruth” Vrieswijk-Bergen
Inspira pa e relato den Diario di Dialuna 27 di Februari 2023
CBPP ta celebra 45 anja, skirbi pa Dennis Burke.
