Un “bearhug” pa tur nos fiel lectornan, acompanja pa e mihor deseonan pa un bon y felis dia yen di alegria ! Un dia nobo yen di sabiduria den nos alegria ! Danki pa e bon comentarionan ricibi pa cu nos relato di siman pasa. Varios hende a confirmami cu ta “cosnan, situacionnan cu ta biba den pueblo”. Tin algun cu a kere cu ta politico Lady Ruth kier bira, naaaaaaaaah shonan, no way Jose ! Pero como Poeta escritor nos tin e inspiracion pa comparti den nos relatonan segun curason ta dirigi y ta esey nos a purba di hasi. Nos ta laga tur cos den mannan di Dios segun cada consenshi di cada un. Consenshi y karma ta cosnan cu ta pasa pa alerta nos , ora nos ta den un direccion robez. Pesey nos tin cu actua segun nos bon consenshi, nos bon curason y nos mesun bon huicio. Awe nos kier concentra un crenchi ariba e bunita anochi Encuentro 2 ( riba tereno literario -cultural- linguistico ) di e islanan ABC cu a tuma lugar no mucho tempo atras, den Biblioteca Nacional Aruba ( Diamars 18 di juli) , cu un sala yen yen atrobe. Otro bunita proyecto organisa pa e bunita pareha Mirto Lacle y Jenny Boezem, hunto cu BNA. Mirto cu no sa para keto ora ta trata cosnan literario. Un cabayero cu energia cu ta briya. E gusta papia hopi, pasobra e sa hopi, ela studia hopi. Musicalmente, Ivy y su grupo tipico a deleita e publico presente cu nan dushi musica. Ki dushi e cantica di Bernadina Growel cu nan a canta a sona ! Danki Dios cu ketobay tin interes y hamber pa nos literatura den nos idioma Papiamento. E anochi aki 2 buki a wordo presenta. E cabayero Dominico Werleman di Aruba a presenta su buki “ Hallo, mi ta e sapato pia drechi di Mauricio” cu ta contene mas storianan cortiko, e.o. pa mucha tambe. Nos bishitante, amiga y colega escritor di nos isla ruman Corsou, e simpatico y dinamico lieve Ange Jessurun a presenta su buki “Faya Lobi “, cu ta nifica “Vurige Liefde” “Amor ferviente” . Faya Lobi, 200 anja di amor ferviente den diaspora. Un novela cu a dura 2 siglo den un famia Surnamenjo-Curasolenjo. Un anochi interesante atrobe, den cuadro di e di 160 anja abolishon di esclavitud. Nos no a hanja chens ainda di bay cumpra e buki di Ange Jessurun,( nos a pone nomber riba lista serca personanan cu ta traha na Dept.di Cultura di Aruba,) pero tin entendi cu e bukinan a yega na Van Dorp Boekhandel den curason di Dakota. Nos lo bay busca nos buki e ora na Van Dorp mas pronto cu ta posibel. Tocante e anochi na BNA, nos por menciona cu e bunita yiu muhe di Ange Jessurun, Norrayah, “Lady in red” e anochi aki, a lesa varios pidanan for di e tremendo buki di historia di famia, cu stamboom, amor etc.”Faya Lobi”. Ki bunita e la hasi esaki ! Bunita papia, accentua y presenta ! Bo a sinti’bo cu bo tawata den e storia tambe. E informacionnan balioso cu nos por a ricibi for di e presentacion di e Power Point di Tante Ange,( manera muchanan di islanan ABC ta yama e bunita dushi dama aki, pa su amor y pasion hinka den “Arte di Palabra”, cu ta competencianan sano den nos idioma Papiamento(u) di poema, cuenta, rap etc. pa alumnonan di scolnan secundaria,) ta impagabel. Cu pasion el a sondea, sambuya , landa y busca mas y mas informacion pa su buki cu a hibele den dushi aventuranan. Mas dushi ainda tawata e Diadomingo mainta di bebe un koffie y come un “appel caree” of appelflap na Bright Bakery cu lieve Ange y Norrayah. Nos a combersa, hari y pasa un par di oranan masha masha agradabel y alegre mes ! Nan tin un lugar special den nos curason y e simia dushi y firme di amistad ta planta den tera fertil firme yen di color y amor, comparti hasta cu Winnie the Pooh y Donald Duck, un joke dushi cu nos no por lubida. Pabien na Dominico y Ange y hopi exito cu boso buki !
Pabien na e comishon organisador di un otro exitoso Encuentro islanan ABC. Danki pa lesa nos relato . Sigui cuida curpa y corda sigui duna Dios danki pa bida, pa salud, pa alegria y pa sabiduria. Dun’E danki pa tur cos y accepta bo bendicionnan. Pasa un dushi dia ! Love you too !
1 comment
[…] Source link […]