Un di e actividadnan cu Lady Ruth a bishita durante su vakantie na Hulanda e biaha aki, ta un asina yama “Zeepkisten-race”, cu ta un competencia di garoshinan riba wiel traha di caha pero tambe di otro materialnan manera “badkuip”ariba wielnan di e.o. bicicleta, caha traha den forma di un “auto”, garoshinan traha di tur sorto di material cu no ta asina pisa, pa asina e chaufeur of e dos personanan den e garoshi ey, baha for di un altura di x cantidad di meter, corre slip bin abao riba caminda te na e “finish line”. E “caha di habon’, traduci criollamente, cu hasi esaki den menos tempo ta gana. Tawatatin un competencia di mucha y despues di adulto, den e mesun garoshinan , asina yama “zeep kisten”. Un atardi hopi agradabel cu “mooi weer” den Sint. Oedenrode, Nijnsel, un parti di Hulanda cu no ta asina hopi druk, pero si regularmente cu nan caredanan di core bicicleta, nan paradanan di carnaval y mas actividadnan pret cu nan ta organisa. Eynan nos a bin topa y hasi conosi tambe cu e caballero hulandes Rien Bekkers, 2 biaha ganador di “Zilveren Narrenkap Kletskampioen Zuid-Nederland”. Si bo kier hari cu smak, bo tin cu scucha e artista aki papia su chistenan, su coi loconan cu e ta observa den bida rond di dje.
Su cara so ta bisa bo cuantor tin duna’bo smak di hari. E bunita dia aki den curason di Sint Oedenrode a cuminsa cu nos bishita na un Camping hopi grandi cu stalnan di cabaynan masha bunita mes. Nos a mira un “veulen” cu ta un cabay chikito recien naci. Un “schuur” yen di “hooi” locual e cabaynan ta come. Hopi bunita pa wak cosnan cu bo no tin na Aruba. Na e Camping aki tawatatin 35 cabay den e stalnan. Si, Aruba tambe tin cabay, pero , no asina hopi hunto den un lugar grandi. Lady Ruth y su amiga fei tempo di su hubentud, fei tempo di Brugklas, Maria van Kollenburg , kende cu tempo tambe a casa y hanja 4 yui, di cual un paar di nan ta morocho. Nos a sigui tene contact durante tur e anjanan cu a pasa y awor nos tur dos ta wela di nos nietonan. Tur biaha nos bay cu vakantie Hulanda bishita nos yuinan y nietonan, Maria ta bin buscami y e ta stuur hibami keiro tur caminda den e lugar na unda e ta biba. Nos a yega di bishita un “Poppen museum”, un “Blikken museum” djies pa menciona algun. Nos ta sinta bebe koffie y combersa na smaak. Nos tawata bendiciona atrobe cu hopi bunita tempo, cu solo y no friuew, pero fresco, manera bo ta cana den airco tur caminda. Nos a pasa super bon ! E biaha aki na Hulanda, Lady Ruth a tribi bay den trein su so y a bay bishita su Tio Boy y Tante Gerry den curason di Leusden, den vecindario di Amersfoort. Un aventura nobo mas den e viahe di bida di Lady Ruth. Berdad cu e sistema di transportacion publico na Hulanda ta tremendo ! Bo ta coi bo trein y despues bus y bo ta cana tin biaha 5 minuut pa yega bo destino unda bo tin cu bay. Bo ta wak bo app riba bo cellular. No ta tur hende ta tribi hasi esaki, y tin hende cu ta subi trein robes. Pero no mester drenta den panico, bo ta coi un trein cu ta hibabo bek, ta cuestion di pensa, lesa, y pensa kiko pa hasi. Y puntra e hendenan cu ta traha na station cu sa di e treinnan. Nos ta contento cu nos a logra sin ningun problema. Bay y bin. Nos ta duna nos Bon Dios danki pa e bunita bendicionnan ricibi e biaha aki na Hulanda, pa cada experiencia y pa cada les y cada momento. Danki pa lesa nos relato, sigui cuida curpa. Stay safe ! Un bearhug , love you too !
