DANKI DIOS, nos salud a permiti celebra otro dushi fin di siman. Diabierna anochi nos a bay disfruta di otro dushi ambiente na Djiespies cu Robert Thiel ariba wiel. Un dushi reportorio di musica bailabel y tambe Robert y su grupo a toca un set di cancionnan Ranchera cu nos tur por a canta “Y volver volver volver”. E cantica bunita tambe di “En mi mano izquierda, tome tu retrato, y en la otra mano una copa de vino “ . Ta hopi vos a resona den e coro :” Y me bebi tu recuerdo, para que jamas, vuelve a lastimarme “. Hopi ta esnan cu a los nan pianan y heup atrobe, bailando cu un pareha of bailando nan so cu nan so y pasa bon ! Diasabra anochi nos a bai bishita un bunita amiga cu tambe ta un artista cu hopi no conose , hiba un buki p’e cu hopi amor y carino. Nos a dal un par di glas di binja, come un dushi hapje y a combersa te casi mei anochi. Anto Diadomingo atardi nos a bay keiro den auto cu nos mayornan, cu mi esposo como e chaufeur. Nos a pasa e.o. banda di Eagle beach, na unda nan por a goza di e bista di e localnan y turistanan den laman of drumi riba beach of di esnan riba jetski. Solo tawata kima cayente, pero cu dushi biento fresco suplando. Diadomingo anochi Lady Ruth a bay Cas di Cultura pa e bunita celebracion di Dia Internacional di Teatro. Un sala hopi yen por a goza di un programa varia cu charlanan di e.o. Drs. Siegfried Dumfries di DCA y nos flamante y elegante ministro di finanzas y cultura sra. Xiomara Maduro. E bunita hoben dinamico y hopi inspira Amanda Britten a canta nos hymno y a fungi como e Maestra di Ceremonia, Tawatatin entre otro un bunita baile solo pa Adriana Kozlov. Nos ganadora absoluto maximo di e competencianan di Poeta Patria, e hoben adulto , Marilis Becker a destaca y impresiona cu su fantastico presentacion di e mensahe mundial pa cu Dia Internacional di Teatro, declamando e mensahe den un forma unico di un poema prosa hopi pero hopi bunita mes. Pabien na Marilis y su distingido mayornan, cu ta apoya nan prinses tur caminda. Lady Ruth ta felicita tambe e simpatico y dinamico sra. Ruby Eckmeyer, specialista di cultura di comision Nacional pa UNESCO di Aruba, kende a presenta un gran parti di e cv di Percy Jeandore na un manera bunita cu su bunita sonrisa y lus cu ta pone’le briya. E culminacion di e anochi aki, tawata ora cu a anuncia cu Percy Jeandore a gana e premio di reconocimento nacional di Teatro 2022. Ken no conose Percy, cu semper tin algo pret di conta y of comparti y of cla pa canta . Percy a expresa, cu, como comediante sa conta cosnan pret pa pone otronan hari, mientras cu e curason por ta hasi dolor y of ta tristo pa x motibo. Como clausura tawatatin e presentacion di e resultado final di e Masterclass di teatro dirigi dor di e maestra internacional Hilda Hellwig cu participacion di e.o. Joan Danies, Madelene Kelly, Daylan Krozendijk, Ephrayim Odor , Lupita Bernabela y Charles Croes. E titulo di e presentacion tawata :” Fragmento di e obra Romeo y Julieta. Tur e participantenan di e Masterclass a ricibi nan certificado di participacion. Lady Ruth a hasi uso di e oportunidad pa despues cu e anochi bunita aki a termina, entrega su buki “Alegria di Ruthy Poema 2″ na dos persona hopi stima y aprecia pa su persona, sra. Ruby Eckmeyer y nos bon pastor Jairo Maduro, cu mas y mas ta conquista mas curason cu su forma simpel y habri , sincero y directo di ta. Nos a bisti nos mascarada colorido cu nos a hiba den nos tas pa e ocacion aki, cu a presenta den e lobby di Cas di Cultura. Yessss, como un lider scout, semper prepara, pasobra nos isla ta chikito y hopi biaha bo ta topa otro na ocacionnan social cultural. Nos pabien di curason pa e incansabel Percy Jeandore cu su premio bon mereci y ketobay cu plannan na cabes y curason pa bin cu mas di teatro na Aruba atrobe. Contento di por a topa y saluda Lilian “Shi Prekke”, nos gran artista Maritsa Erasmus y Ronny Alders cu tambe ta un persona cu nunca ta para keto den su extranan cu e ta hasi pa Bibioteca Nacional, Toast Master club y mas . Danki na e simpatico y dinamico Angele Martinez y Ronny Alders pa a saca algun nice pics pa nos. Pabien Jhon Freddy Montoya, pa bo amor, cooperacion, atencion y tur locual bo ta hasi pa Aruba riba tur terreno artistico, como tambe di teatro. You are the blessing ! Lieve mensen, danki pa lesa nos relato, stay safe y love you too !
