Com bay Shonnan tur ? Con ta cu e salud ? Lady Ruth ta spera cu boso tambe a pasa un bon fin di siman, of bailando e fantastico banda di ruman isla Corsouw Doble R den Balashi Garden of gozando riba Plaza Niki Habibe dilanti Djiespies Place cu e tremendo y bunita homenahe pa nos gran musico guitarista cantante Etty Toppenberg, celebrando cu ne su di 65 anja den Farandula. Despues nos lo bin cu nos relato interesante encuanto Rignald Recordino di e banda musical grandi for di anjanan setenta, Doble R. Prome algo di Etty Toppenberg. Pa motibo di su salud delicado Etty y su bunita sra esposa Corma a wak y sinti e homenahe riba pantaya di televishon of face book, of un di e otro social medianan cu a transmiti en bibo for di Plaza Niki Habibe. Y pueblo di Aruba riba e pleinchi yen yen di hende, den un bunita union masalmente pa a sinti nan mes parti di algo bunita dedica na nan idolo of nan bon amigo Etty, kende a duna di su talentonan profeshonal aki, aya y tur caminda cu ela bishita of bay. Unda cu Etty a toca y canta, curasonnan a sinti. Unda cu Etty a toca y canta, hendenan a canta y of bayla.
Instancianan entre otro Go Cultura, Unoca y e ministerio di ministro di cultura Xiomara Maduro a traha duro durante algun dia, hinka e bunita programa di homenahe den otro cu participacion y cooperacion di hopi musico profeshonal y di curason, grandi y hoben. Edjean Semeleer di Go Cultura y Jaqueline Wernet di Revista Exclusivo a fungi como e maestro y maestra di ceremonia y a hasi un bunita trabao. Lady Ruth tawata tin e honor, placer y gozo di por a inspira un bunita poema pa Etty y a recita esaki despues di e video cu asina hopi cos bunita di e logronan di Etty .
Nos ta gradici Go Cultura pa e peticion di curason hasi na nos y claro, ta algo cu nos no por nenga, nos tambe a canta y bayla hopi biaha riba ritmo dushi di seu of un dushi bolero toca pa amigo ruman Etty Toppenberg & friends . Etty ta nos amigo prohimo ruman. Lady Ruth tin e mesun cantidad di anjanan na edad cu Etty tin den farandula ! Kemen, dia Lady Ruth a nace, Etty a cuminsa toca y canta. Ta cuanto hende Etty no a consola cu su dushi musica di guitarra y canto na entierro? Y cu alegria , cu su dushi alegria anima tur sorto di fiesta aki aya ? Etty tawata y lo keda e curason di alegria di Djiespies Place di tur Diabierna anochi , aunke awor tin otro bandanan tocando. Etty a hasi esaki di curason cu su amigonan y no a cobra niun debchi. Ela regala pueblo e fiesta dushi aki, pero salud a cuminsa hunga un rol y e mester a baha man na tocamento y cantamento. Nos a menciona den nos poema pa take it “One day at a time”y pasa tempo cu su sra.esposa Corma naturalmente logicamente cu tur su amor. Lady Ruth a bisa tambe den su poema cu :”Etty ta campeon!”. Etty, bo bon amigo di La Moderna Benjie ta manda un fuerte abraso pa bo!! “Ta Benjie a corda’mi ariba e expression ey di ‘campeon’ un palabra hopi usa den vocabulario di Etty. Nos tambe ta spera cu e homenahe a cay na bon tera serca Etty, na su agrado.
Ela ricibi esaki na bida, aunke fragile y delicado. Tur cos ta pasa pa un motibo. Y Dios su “timing” semper ta perfecto den tur cos. Nos no tin nos mesun bida den nos man tur ora, ora e amor di Dios ta sigui carga nos tur, dia pa dia. Etty sa ken e ta, kiko e a hasi y con ela biba su bida den duna tur rond di dje di su manera di stima. Y tur rond di dje a stim’e na nan manera.
Un alma cu a bula den tur libertad di amor pa su mes y pa su prohimo. Un curason grandi cu ela purba di comparti y duna tur cu a crusa su caminda. “Danki Etty Toppenberg” pa a toca y alegra asina hopi curason ! You are the blessing dear friend, you are…!” Un bearhug pa bo y Corma.
Danki Shonnan pa lesa nos relato, sigui cuida y duna Bon Dios danki pa cada dia regala !
