Atrobe nos relato cu algo bunita y dushi di e Concierto fiesta di pueblo pa pueblo tur Diabierna na bahada di solo, atardecer te 10 or di anochi na Djiespies Place, situa den Caya Betico Croes, banda di Botica Oduber , cu awor segun mi, tin un otro nomber. Botice Benu of algo asina. E ta manera un terapia alegre pa hopi di nos grandinan cu ainda por move riba dushi melodia y ritmonan alegre. E publico ta gusta masha ora toca canticanan manera Limon Limonero, Basha Awa bay y Jerusalem, just pa menciona algun, ja cu tur por baila. Claro cu e bandanan musical ta toca nan tumba, merrengue y salsa pa parehanan baila, pero tin cu no tin pareha y ta dushi cu nan tambe por expresa nan alegria ariba pista cu awor ta dilanti, patras y meymey di e plaza, ora cu parehanan of bailadornan”solo” ta baila banda di nan stoel mes, y no tur dilanti e banda musical. E banda e biaha aki cu a capta nos atencion di curason ta Robert Thiel ariba wiel cu un bunita cantante femenino tambe, Sra. Nicole Martines de Kort. Tremendo cantante ! Hopi dushi nan ta toca y canta !
E cantica mas popular di Robert Thiel, “Serenata” cu ta pone tur hende lanta baila cu smak.
Tur Diabierna, Dios mediante, bo ta wak hopi di e caranan cu ta bini fielmente, sinta riba nan mesun stoel confortabel, bebe un cerves, juice di tamarijn of un binja, come dushi frekedel, pastechi keeshi , deditos, of bebe un kopi sopi carni of sopi oester y mas. Cosnan criollo di nos cu pueblo ta gusta, na prijsnan rasonabel, prijsnan pa pueblo. Djiespies mes tambe tin suficiente stoel pa hende sinta. E biaha ki, Lady Ruth y su casa Johan tambe a baila un crenchi, principalmente un di nan dushi walsnan. Nos no a sinti pa baila e medley of potpuri di wals , pasobra tur a trata un mal amor perdi of di enganjo. Lady Ruth ta gusta baila un dushi wals positivo den su letranan, wals di amor, wals cu ta inspira y no cu ta papia di separacion, traicion etc. E bandanan cu sa toca na Djiespies no ta toca hopi cantica na e idioma ingles of hulandes tampoco, cu ta bolbe pone nos hanja falta di Etty Toppenberg, unico den su estilo y vos, pero ta sigui spera cu Etty ta sinti su mes mihor y mas fuerte den su salud y ta sigui goza di e tempo di calidad, “One day at a time” cu su bunita sra.esposa Corma. Nos no ta kehando ni reclamando, nos tambe ta hopi gradicido cu tur e bandanan cu ta bin toca na Djiespies di curason, pero ach, Lady Ruth ta gusta su cancionnan na ingles y hulandes tambe de ves en cuando.
Pueblo ta goza bau streanan di shelo, pueblo ta aprecia cada musico cada banda cu ta bin comparti di nan talentonan y asina sea un bendicion alegre pa cada alma. Nos tambe sa claro cu cada banda tin nan mesun repertorio. Nos isla ta bendiciona di tin bon musico y bon cantante.
Nos ta spera cu tin hobennan lantando den nan bandanan musical, cu tambe lo por toca un dia dushi bolero, dushi wals y mas. Tin turistanan di Merca y Hulanda cu tambe ta bin Djiespies Happy Hours di Diabierna. Nos Reina di Djiespies di tur tempo ta keda den persona di Maria Tonk Aruba, un bunita y elegante sra hulandes cu su curason arubiano. Por scoge of eligi mama di Djiespies, reina di carnaval di Djiespies, pero e Reina mes mes di tur tempo ta lieve mooie Maria Aruba. Si no ta p’e, mi no tin e “picsnan” bunita aki pa comparti. Shonnan, un bon dia yen di sabiduria den nos alegria ! Danki pa lesa nos relato cu amor y atencion. “Cuida curpa, “stay safe” y “Love you too !”Bo kier disfruta y baha stress ? Bay Happy Hours Diabierna anochi na Djiespies, na unda hoben y grandi ta topa otro y pasa bon !.Tawatatin un banda nobo e fin di siman cu a pasa, cu nos no a tende di dje nunca. Spera di por “check it out” den futuro sercano.
