Ora tin charlanan interesante educativo informativo na Universidad di Aruba cu entrada gratis, habri pa publico, Lady Ruth tambe ta bay scucha. Recientemente a tuma lugar un anochi encuanto nos “Dande” (cu ta ser toca, canta y scucha hopi den temporada di fin di anja y e prome par di dianan di anja nobo), den forma di un Dialogo, durante cual publico presente por a lanza pregunta pa hanja sa mas tocante nos Dande. Un publico basta grandi a asisti. Nos a tuma nota di presencia di un di nos damanan di edad ya bastante halto, pero ketobay dinamico, activo y bon di salud, sra.Titi Tromp,( den compania di un di su yiunan, Juffrouw Miertje) y di bon amigo traductor y linguista Sr. Ramon Todd Dandare. Nos a repasa den nos mente, e bunita Documentario Dande cu nos a wak riba e pantaya grandi di The Cinemas recientemente, cu su Premiere den Principal den curason di San Nicolas, prome cu nos por a wak e na The Cinemas na Renaissance. Den e bunita y interesante Documentario aki, nos por a goza di Titi Tromp como un di e artistanan arubiano cu a wordo entrevista. Nos por a wak tambe, aunke ta pa algun seconde so, e bunita presentacion di mi guapo primo Mario Alberto Kelly riba su viool. Foi tempo cu Lady Ruth tawata mucha, e ta corda cu tur prome di Januari un grupo di Dande di Ayo tawata bin su cas, cas di su mayornan , y nan tawata canta Dande pa cada un di nos. Despues algun di su primonan mas o menos mesun edad cu Ruthy of hasta mas hoben, a uni nan mes na e grupo di Dande, ora cu algun di e bieuwnan mester a laga e mundo material aki, pa uni nan mes na esnan cu a bay nan dilanti den e mundo spiritual. Tawata momentonan di super alegria pa ricibi un grupo tocando y cantando Dande Ay Nobe ! Ki emocion ora di a tira e fls.10,- of fls.25,- den e sombre, cu despues cu Lady Ruth a casa y ketobay nan tawata canta Dande pe, e tawata benta hasta un biyete di fls 100,- den e sombre, pasobra segun ela comprende antes, nan tawata parti e placa acumula cu nan tawata hanja na e casnan. E anochi di Dande Dialogo , nos por a scucha e historia y desaroyonan den filmacion di e documentario Dande. Nos por a scucha e investigador escritor di historia den Caribe Hulandes, e conosido Maestro Profesional Adi Martis cu su tremendo trabao di investiga. Alexis Tromp cu ta na cabes di e Mediatheek di BNA y Arthur Kelly Media Producer y Entrepreneur tambe a comparti nan parti profeshonalmente den e realisacion di e fantastico Documentario DANDE. E bunita y simpatico Orador di Universidad di Aruba, Yolanda Richardson a fungi como moderador y a hasi un excelente trabao como tal. Un logro grandi, y un satisfaccion grandi pa Fundacion Mi Cutisa y Sra. Ruby Eckmeyer di UNESCO na Aruba, sigur, cu a capta curason di pueblo cu e documentario unico y special aki. Tur envolvi cu e projecto aki di Dande a sondea y tuma tempo pa a hinka e documentario aki den otro y nan tambe sa, cu podise tin mas hende eifor cu por a anjadi algo na e documentario aki, pero cu no a logra di topa cu nan. Pero “at least” tin un documentario awor cu por sigui inspira nos hobennan riba e tradishon aki di Dande. Cu Vicente Ras, como e gran artista grandi invita den henter e projecto aki, compartiendo di su experiencianan riba e terreno aki di Dande, siendo un experto riba tambu.
Nos pabien y danki na Fundacion Mi Cutisa, semper cu nos cultura na prome lugar !
Lady Ruth a hasi uso di e oportunidad pa a regala Professor Adi Martis y Ronny Alders di BNA su buki nobo di poema :”Alegria di Ruthy Poema 2 “. Sperando cu e por inspira nan tambe un crenchi den nan tremendo trabao. Danki na nos dushi hendenan pa un dushi anochi di inspiracion na Universidad di Aruba. Danki Aruba, pa lesa nos relato , cuida curpa mente y alma. Stay safe! Love you too !
