Ainda mi ta tende mi mes ta recita pa e alumnonan di Maria College, algo cu a sosode impulsivamente, ora Sra. Des Croes di Prins Bernhard Cultuurfonds Caribisch Gebied y Lady Ruth a bay entrega algun buki di Poema na e scol menciona. A dura un crenchi pa motibo di e pandemia, pero siman pasa Diahuebs dia 17 di Maart, nos a logra hiba y entrega e bukinan na e.o. Colegio San Antonio, Filomena College Mavo, IPA y Maria College Mavo. Net un crenchi despues cu e cantidad di esnan cu e virus covid-19 a baha, nos tawata na Biblioteca Nacional Caribiana Arubiana, na unda nos por a entrega buki na La Salle College Mavo, Mon Plaisir College Mavo y tambe na dos alumno di EPI. Awor nos ta bek na cas, cu telefoon 583 3343 of 593 3343 pa e scolnan cu ainda no a ricibi nan bukinan di Poema di Lady Ruth : “Alegria di Ruthy Poema 2″ cu tin como contenido 15 Poema na nos dushi idioma Papiamento, 7 na Ingles, 5 na Hulandes y 2 poema na Spanjo. Tur cu temanan di paz, amor, naturaleza, prohimo etc., temanan bunita cu ta inspira, cu por papia di nan den klas. Manera ta bisa “Feel free to call Lady Ruth” pa nos por palabra con e scolnan cu falta, con boso por hanja e bukinan. Tawata un mainta hopi agradabel , y tur e scolnan cu nos a bishita Diahuebs dia 17 di Maart, a ricibi nos cu brasa habri y un curason contento. Lady Ruth ta super contento cu e ta cumpliendo cu e peticion di Prins Bernhard Cultuurfonds Caribish Gebied, kendenan a yuda financia su projecto di e buki aki, hunto cu UNOCA. Ora nos a yega Maria College Mavo, net nan a cuminsa canta e hymno di Aruba, nan tambe tawata den pleno celebracion di nos Dia Nacional 18 di Maart, cu ta un dia liber, pues, tur scol y of companianan tawata tin algo special riba e Diahuebs prome, cu nan alumnonan y of nan empleadonan. Nos a entrega nos buki despues di e cantamento di e hymno y despues a sinti na nos curason pa recita un poema di Aruba, y nos a hanja e oportunidad ey tambe, pues, Lady Ruth a recita e poema “Topa mi Aruba” cu ta saca for di su Prome buki di Poemanan “Poemanan di Ruthy”. Despues a pidi muchanan pa tene man di esnan para banda di nan, y a recita tambe e poema di mas cortico di Lady Ruth :” Aruba, isla den laman- Rumannan tur, ban tene man – Uni den pas y harmonia – Biba Aruba yen di alegria ! – aruba, Aruba, ARUBA !!!Mi Pais stima bo ta !
Dushi pa a wak e caranan contento di e alumnonan, tur den nan t shirt cora uniform di scol.
Nos kier a gradici Meneer Gershwin Lee di Colegio San Antonio, Juffrouwnan Oduber y Engelbrecht di Filomena College Mavo, drs. Marisol Croes di IPA, Marlene de Cuba di e Bibliotheek di IPA, y Juffrouw Angelina Rosenstand di Maria College Mavo, pa a ricibi Sra. Des Croes y Lady Ruth na un manera espontaneo di curason, pa nos por a entrega boso e bukinan.
Nos ta termina nos relato di e siman aki, felicitando e ganadornan di Poeta Patria : Marilies Becker, Jhon Freddy Montoya y Luis Rodulfo cu nan bunita y tremendo poema ! Pabien na e comishon organisador y comishon corrector di Papiamento. Aruba ta den curason di tur !
Jammer cu e hoben a hasi un crenchi fout den cantamento di nos hymno, pero ela purba. Mester a train e hymno un tiki mas. Tin hoben cu no sa e hymno mes . Shonnan tur, danki pa lesa nos relato cu atencion y curason atrobe. Pasa un dushi dia yen di alegria ! Y…cu hopi sabiduria den nos alegria ! Sigui cuida, sigui stima, sigui pordona y duna. Love you too ! Un bearhug di Ruthy.