OK ! Shonnan tur, com bay ? Awe nos ta bai relata un crenchi di nos Dia di Hende Muhe, cu tawata dia 8 di Maart ultimo. Un bunita dia cu a wordo celebra pa hopi di nos hendenan muhe, cu sa ken nan ta, tur kico nan por, tur kico nan a sinja, tur kico nan por logra , duna, inspira otro cu ne, etc.etc. Nos, hende muhe fuerte cu inteligencia, cu perseverancia, cu pasenshi, cu capacidad y mucho mas. Si nos por y nos kier hasi un trabao, nos merece e oportunidad. E dia aki a nace y guia tambe na votacion politico pa hende muhe hopi anja pasa. Nos ta wak nos mes como hende muhe exitoso y fabuloso. Nos ta bunita cu of sin make up. Awendia tin tur sorto di crema, cosmetica, tinja, etc. pa hasi nos mas bunita. E negoshinan aki ta draai bon. Mas bo cumpra, mas propaganda nan hasi. Pero nos, esta Lady Ruth, no ta gusta nada falso, ni hunja falso, ni pechu falso, ni zanzan falso punto ! Esnan cu ta sinti nan den necesidad pa usa cosnan falso den nan curpa, ta nan choice. Nos ta respeta esey. Ta parti di “moda moderno y sofistica”, pero, nos, Lady Ruth anto, ta un crenchi “ouderwets” y “tradishonal” y ta gusta ta mas natural posibel. Nos no ta tinja cabei tampoco ni ranka wenkbrauw y no ta gusta hunta lipstick tur ora, pa ora mi casa duna mi hopi sunchi nos ta smak e sunchi y no e lipstick. Mi no ta cambia di dia pa anochi cu mi tin cu kita wimpers falso of tur e “layersnan” di puiro y lotion etc. etc. He, mi ta fastioso noh ? Mi ta bisa cosnan cu tin eyfornan cu lo no gusta, pasobra ta un sorto di maskarada of no ? Oei, nos no ta gusta e wenkbrauwnan hasi cu tattoo tampoco. Ufffff. Pakico feita e wenkbrauwnan natural cu ba nace cu ne, pa pone linjanan blauw di tattoo ? E anja aki Lady Ruth tawata den e team atrobe di e artistanan poeta y musico cu a forma parti di e gran celebracion di Dia di Hende Muhe na Centro di Bario Playa Pabao. Un bunita anochi cu un sala completamente yen di damanan (y algun caballero), tur , unico y bunita. Presidente di CBPP Dennis Burke a habri e anochi cu su saludos di bon bini na tur e damanan y e caballeronan tambe presente y a introduci nos pa habri e programa . Lady Ruth a regala Dr. Joyce Pereira su buki : “Alegria di Ruthy Poema 2 “ y a sigui , recitando 4 of ta 5 poema di curason cu a cay na agrado di tur presente. Lady Ruth a dedica tambe un poema na su amiga colega Poeta escritor Ariana “Lady Ari” Koolman Chirino cu mas y mas ta destaca den su estilo di skirbi y recita su poemanan na varios ocacion. Despues Dr. Joyce Pereira a presenta su interesante charla :” Papiamento e herment di nos desaroyo”. Por a lanza pregunta y intercambia di idea y pensamento. Tawata un anochi hopi agradabel, informativo y educativo. Despues tawatatin tambe Omaira Britten cu a recita su bunita poemanan. E anja aki, Omaira su poema acrostico “Muher” ta ariba un tegel . Maravilloso creashon – Unda e ta tin solushon – Hibando su nomber firme – E ta e yabi di Amor y Corahe – Respete, Stime y no maltrate. Mas abau riba e tegel tin poni :” Muher divino forma pa Dios – E obra precioso crea pa nos. Bunita noh ? Tur presente a ricibi un di bunita tegelnan ey como regalo pa nos Dia special. Rocco Franken y Quincy Hasham a canta canticanan bunita, elevando nos, hende muhe, dunando e anochi unico y special aki mas dushi ambiente ainda. Manera ta tradishon a rifa varios regalo ricibi for di varios comerciante, e.o. di Maggy’s. Aunke Lady Ruth no por a keda te final pa motibo di otro compromiso, nos sa di curason, cu e celebracion aki tawata un exito rotundo, cu hopi calor y amor pa nos mes y tur presente. Muhenan, ban sigui ta e lus y curason bunita di nos famia, ban sigui duna respet na nos mes, na nos curpa. Ban sigui duna un bon ehempel den comunidad. Ban sigui celebra “NOS” tur dia, dia pa dia ! Shonnan , sigui cuida, love you too !Pasa un dushi Dia di Hymno y Bandera dia 18 di Maart venidero.
