Y asina nos ta asercando poco poco un Dia di duna danki cu nos a adopta tambe foi Merca.
“Thanksgiving”, celebra den famia. Un dia di reflexion di y ariba tur tur tur e cosnan cu nos ta gradici Tata Dios y Mama Maria pa nan. Pa salud, pa amor, pa famia, pa trabou, pa talentonan y pa hopi mas ! Awor, si abo mes no a percura di trata bo sernan keri nechi bunita y a golpeanan, no keha cu bo a perde nan. Nan mes kier aleha di boso, pero toch boso ta wanta na nan, pasobra boso ta hanja cu ta dificil para riba boso mesun pia ? Un pregunta cu a tene e Poeta Lady Ruth ocupa e siman aki, ora cu a para keto riba Dia di hende homber. Oh, cu nan ta importante den nos bida, sigur cu si ! Pero, nos no ta comprende cu tin cu no ta balora nan pareha femenino y ta raus, grita, atraca, menasa y hasta golpea e hende muhe cu a comparti hopi anja di su bida cu ne, pero cu ya a lanta foi di sonjo y a dicidi pa no wanta golpi fisico ni menasa ni abuso mental of emocional mas. Nos fundacion FCVR ta deal cu esakinan regularmente y ta eynan talbes boso por wordo yuda pa sinja comprende y calma bo mes y bo mal beisnan? Pls busca yudanza, boso tambe ta wordo stima, pero boso tin cu stop cu e violencia nan ey. Comprende y accepta cu ta boso mes a core cu boso pareha y of miembronan di famia. Boso mes ta caba cu e amor di famia cu boso mal ehempel. Sea honesto cu bo mes y accepta realidadnan cu bida ta continua.
Shonnan, nos ta den 2022 ! Y ketobay tin cosnan mahos y stranjo ta sosode rond di nos, pasobra autoridadnan manera polisnan tambe ta mara na cierto leynan sin por actua of ta tuma nota tras di nota di e kehonan cu prueba, sin por hasi nada ? Que pena ! Hopi jammer !
Pakico tin homber cu ta kere nan mes mas homber ora di dal un hende muhe ? Tin algun cu ta culpa e frerenan di antes, cu tawata “straf” y “dal” cu lineaal, e muchanan cu mal comportacion ?
Pone nan para den skina di klas ? Berdad ta, cu, nos tur como adulto mester por sa mihor cu esey y nos no eherce actonan di violencia domestico . Nos ta bolbe pordona esnan cu ta hasi e cosnan ey, nan no por yuda nan mes, nan ta lubida cu nan tambe ta creacionnan bunita di Tata Dios y Mama Maria cu a duna nos bida den nan yui Hesus, pa biba den y cu amor, cu aprecio y respet pa su mes y pa otro. No ta tur hende ta mescos y no ta tur a lanta den un famia uni cu bon ehempel. Pero esey tin cu duna mas motibo pa busca yudanza profeshonal y no sigui pasa e mal momentonan ey ariba e yuinan inocente. Aserca Fundacion FCRV den curason di Wayaca.
Enfin, nos a dual af un rato, pasobra, nos curason ta sinti pa esnan cu tin mester di ayudo. Nos ta deseanan tambe paz y trankilidad den nan bida y pa nan stop di molestia otronan cu ya a laga los.
Pa bin bek ariba e tema di duna danki, Lady Ruth ta duna danki na un amiga colega escritor lieve Arlene Wever pa a comparti cosnan bunita den su buki “Flashes of blessedness”. Nos a busca un buki serca dje recientemente den fin di siman durante un ora ameno bebiendo un koffie y saboreando un dushi donut den Seaport Market Place. Un buki specialmente pa yuinan teenagers cu por papia, lesa y comprende e idioma di ingles. Y, ingles ta wordo duna na nos scolnan akinan. Nos ta desea henter pueblo di Aruba hopi goso y alegria ora nan ta wak e transmisionnan di e weganan di futbol na Quatar, cu nos tambe por wak aki na televishon. Tur dia un oportunidad nobo pa bira un mihor hende. Tur dia cu lesnan y experiencianan pa pasa den.
Tur dia nos cada un ta mas serca di nos Creador, pasobra nos bida akibao no ta pa semper. Bib’e na paz y cu amor, pordona bo mes y pordona otro. Sea gradicido pa tur e cosnan bon cu tawata den bo bida, recorda e bon momentonan pero laga los di bo pareha si e amor ya no tey mas den su curason tur herida pa e mal trato cu ba dun’e. Laga los y laga tur cos den man di Dios. E por curabo di bo rabia asina pisa cu bo por tin, mayoria biaha ariba bo mes, pa bo fayonan. Danki pa lesa nos relato di awe, “stay safe” y “love you too !”. Laga nos tur celebra cada dia como e dia di nos tur ! Homber, muher, mucha, bestia, etc. etc. Nan tur tin nan dia pa para keto y reflecciona di dje, ban demonstra cu nos tur por bira un mihor hende. Sin discriminacion, sin violencia domestico, sin arrogancia y sin falta di respet.
Cada un cu su mesun consenshi. Stop di hinka dede den wowo di Dios. Dios no ta drumi.
Laga e lus di Hesus drenta bo curason di nobo, awor den tempo di Pascu nos dilanti aki algun siman. E ta stima’bo tambe ! Stima bo prohimo manera bo ta stima bo mes .
Shonnan, corda busca bo carchi pa Alegria di Ruthy 3 cu ta bayendo hopi bon. Nos tin un cita diaranzon dia 14 di December 8 pm anochi den Cas di Cultura !!
Cu e toke di amor pa Hulanda y Aruba. Recaudacion benta di tickets ta pa Animal Shelter.
Carchinan ta obtenibel na Plaza Bookshop, Boekhandel Van dorp, Animal Shelter y na Cas di Cultura mes. No laga nan contabo, wak pa bo ta aden !! Cu gradicimento na curason !!!
