Nos tur tin un of otro “algo” di hopi balor pa nos. Sea ta balor material, emocional of spiritual.
Lady Ruth a comparti di e Joya precioso Koyari varios siman pasa. Un lugar di Paz y trankilidad.
Awe nos ta comparti, cu e dushi paz y trankilidad aki a cuminsa basta anja atras na Modanza, ora cu nos ruman den Cristo Valerie a wordo bendiciona cu aparicionnan di Mama Maria, cu a sorpresa nos tur. Tawata cosnan bunita cu a bini di “Ariba foi shelo” poeticamente expresa.
Hopi ta esnan di fe, creyentenan fiel cu ta kere, pasobra Tata Dios y Mama Maria sa ken e por scoge den confianza cu luz y amor. Bo no por complace tur hende tur ora y sa tin otronan di esnan cu kier stroba e trabou di fe y amor berdadero. Pa hopi anja, ruman- y fielnan den Cristo a topa na Koyari, y hopi ta e bunita ceremonia- y celebracionnan cu a tuma lugar eynan. Awor ta bay bek cas, na e raiz dushi y bendiciona, na unda e milagernan a cuminsa.Nos ta bay bek Modanza, na unda e curason a papia pa di prome biaha den luz y amor. Un decision forza ariba nos.
Nos no sa, si e donjonan nobo di e terreno erfpacht lo bini cu un supermarket riba e terreno na Koyari of un “shopping mall” , pero nos tur ta hopi gradicido pa tur e anjanan cu a reza y canta di e amor di nos Creador y Mama Maria riba e pida terreno ey.
Nos tambe sa, cu nada ta pa semper den e mundo akibou, ta nos alma nos tin cu cuida y proteha, sigui su inspiracionnan di amor. Awor nos vidente Valerie y hopi fielnan cu curason herida, pero kende ta actua conforme cu e leynan existente, pero por ta trankil, un trankilidad y paz cu ningun otro por kita of horta of exigi di nan. Valerie a cumpli henter su bida largo. Tambe Valerie a scoge pa mas amor, un amor sin golpi fisico . Valerie ta un bunita hende cu tambe ta bisa no na violencia domestico y su casonan ta den man di autoridadnan hudicial. No ta mustra hopi cu nos vidente ta sufri, pasobra e ta percura pa semper nechi bisti, penja cu su makeup. Dios so sa kico tur e la pasa y ta pasando aden. Valerie, un hende muher fuerte cu a sigui padilanti den su contribucion na gruponan di su fielnan. Valerie a kere den Iglesia Catolico y Obispo etc. lubida cu nan tambe ta hendenan manera tur hende cu nan mesun debelidad y nan foutnan. Como un sra.dama divorcia, nan no ta apoyele den su decision di tin un otro pareha decente cu no ta violento, cu no ta menasele . Esaki ta jammer ! Pero, nan ta hendenan cu tambe ta en busca di fielnan y di conose nan mes miho . Y , mayoria di e lidernan religioso ta hende homber cu no sa kico ta biba y come den un hende muhe cu a wanta golpi pa basta anja y cu te ainda, awe den 2022 ta ricibi menasa contra su bida.
Valerie a scoge pa un amor nobo sincero y grandi di un persona cu pa motibo di un fout na su trabou ta wordo mira como un mal hende, nan a husgele pa su fout cometi, y no a para un rato keto na tur su bon trabou duro largo y di hopi anja , pero nada stranjo den e mundo akibou na unda e bonnan ta wordo mira como malo y e malonan como bon. Nos ta sigui pordona esnan cu a husga nos, paso nos niun ta perfecto. Tur hende kier pa nan bida sigui den tur trankilidad y paz cu awor nos lo sigui comparti na e bunita y humilde luga na Modanza, na unda tur cos a bini na claridad. Nos no lo toca e tema Koyari mas pa awor, ni maske algun reaccion drenta kizas, nos sa ken nos ta y di unda nos a bin. E Poeta den mi y nos sa di respeta y trata otro nechi. Valerie a cana e camindanan recto y legal y ta laga tur cos den mannan profeshonal y den mannan di nos bon Dios. Nos ta cansa di tanto contra tiempo di bochincha cu algun persona a rondona y molestia nos gruponan di fielnan di Koyari . Algun persona negativo cu kier a dicta den bida di otro. Si no tin ningun pica, tira e prome piedra. Corda cu nos no a bini pa wanta golpi y sla fisicamente ni abuso mentalmente, nos a bini pa stima y wordo stima. Nos ta gradici Dios p’esey. Pa medio di su gracia y ternura, un pareha adulto ta wordo bendiciona den nan relacion di amor , manera Dios ta manda. Un “second chance” den bida como adulto mayor, un companje di amor regala cu ta wordo aprecia y balora. Vidente Valerie, bo ta den nos oracion y den nos curason. Cu nos Bon Dios y Mama Maria sigui bendiciona’bo awe y pa semper. Nos pasado ta keda atras, y nos ta habri nos curasonnan pa un bunita futuro cu ta cuminsa awe Dios mediante. Un futuro den luz y claridad di un pareha madura cu ta respeta otro cu bon trato. Y kico ta bay ta di e bunita luga Koyari awo ? Awo y pa semper cu e amor di Dios den nos humilde alma, mente y curason. Sea abo tambe Bon bini na Modanza. Mama Maria ta invita nos, pa ta, unda tin amor y no odio of rencor. Dios ta amor. Tin biaha ta complica pa reza y bendiciona bo enemigonan, manera lesnan di bida ta sinja cada un di nos. Ora bo tin un trauma bo tin cu busca yudanza serca profeshonalnan cu por yuda’bo, y no baha bo rabia y frustacion riba bo famia cu a stimabo y tratabo bon semper. Dios ta amor, Dios ta pordona cada un di nos. Ta nos tin cu pidi Dios pordon.
Nos bida priva ta e relacion entre nos Creador di amor, nos Mama Maria y nos cu e luz di Hesus den nos curason. Como e Poeta Lady Ruth, esaki a yega na mi curason como inspiracion di comparti e relato un crenchi delicado aki, pero segun boluntad di su Creador di amor pa prohimo.Stima bo prohimo manera bo ta stima bo mes.
Danki pa lesa nos relato di awe, “stay safe” y “Love you too !”
