Nos a keda rondona pa arte, bunita arte ! Den oranan di mainta riba dos Diasabra sigui, dianan 8 y 15 di Oktober, Lady Ruth a participa na un otro bunita workshop duna pa e artista multifacetico Laureen Eman. E biaha aki, nos a bay sinya algo di pintamento cu “Pallet knife”. Un grupo hopi enthousiasma y inspira cu den fondo dushi musica di anjanan setenta, entre otro, nos favorito Jambalayah. Y den oranan di anochi riba e mesun Diasabra dia 15 di Oktober 2022, Lady Ruth a presencia e bunita apertura di un exposicion unico y super super bunita di amigo ruman Stanley Heinze, cu su nomber artistico “Stanga”. Esey ta su nomber con nan ta yamele na Surnam.
Pues, nos a keda rondona pa bunita bunita arte ! Pero e arte di Stanga ta full diferente cu nos arte cu nos ta custumbra cu ne. No ta acrylic ariba canvas, ni verf di azeta ni verf di awa. Stanga su obranan ta crea y traha for di un potret saca digitalmente, dorna, kita pone, pone kita, colora y forma den un obra unico y impactante. Ta masha tempo nos no a presencia un exposicion asina bon bishita . Hopi ta esnan cu a bin admira y cumpra un obra di Stanga. Cada un obra, un gigante expresivo ariba su mes. Hopi ta e mensahenan cu por sinti den cada un di su obranan. Nos Prome Ministro Sra. Evelyn Wever Croes a hiba palabra y a toca e temanan cu un artista ta biba aden, crea y comparti. Prome cu e precioso nietanan di Stanga y Amy Lasten a “corta e cinta cora cu nan moketenan chikito “, e mihor amigo di Stanley y e yui muhe di Stanley y Amy, “Satya” a describi su tata como e artista cu tawata inspira nan tur pa sigui padilanti “no matter what”, pa busca nan potencialnan y logra esakinan. No ta algo chikito pa traha 10 anja ariba obranan di e peso aki, di e balornan aki, di e creacionnan aki. Stanga a hasi y ta hasiendo bon uso di su tempo gozando di su penshoen bon mereci. Un sala di Unoca completamente yena di famia, amigonan y coleganan artista. Un excelente team pasando constantemente cu e scaalchienan di snacksnan dushi y glasnan yena cu dushi binja blanco y cora. Stanga y Amy a sa di move tur rond meymey di nan invitadonan, Amy super elegante bisti den un trahe suave blauw cu blanco, fluffy bailando na su curpa y Stanga den su carson y camisa manga largo blanco. Un pareha artista, pasobra, Amy no ta un desconosi riba tereno di teatro. Un pareha felis cu nan footprints artistico .Un pareha dinamico . Un pareha di amor. Un pareha di bunita energia. Y ta e energia bunita aki bo ta wak y sinti den cada obra di Stanga, tur ariba metal , un material duradero. Di colornan fuerte alegre te cu colornan suave casi transparente. Pabien lieve Stanga, pabien cu bo exposicion “Beyond words, Inner Outer” cu sigur lo inspira nos hobennan studiante talentoso cu tambe ta gusta explora y hunga riba nan laptop cu potretnan digital y cambia esakinan den obranan maraviyoso.
Digital Art. Na caminda pa sinya nos con hopi cos por hasi cu computer. E fantastico expo aki, “Beyond words, Inner Outer” lo ta habri pa publico, pa scolnan y pa tur cu kier bin inspira pa un tempo basta largo, segun nos por a comprende. Por yama Unoca pa mas informacion. Ora curason ta yen, curason ta papia. Laga e obranan di Stanga papia cu bo. Hasi un bishita na Unoca. Y laga bo curason tambe papia . Bida ta bunita. Y cu amor pa arte, nos bida ta mas bunita ainda. Vitamina pa wowo, vitamina pa e alma. Danki na nos bon Dios pa duna cada un di nos talentonan cu nos por expresa nos mes aden y comparti cu nos prohimonan. Danki pa lesa nos relato. “Stay safe y Love you too “! Pabien un biaha mas na famia Heinze-Lasten cu e expo maraviyoso aki , cu di berdad no tin suficiente palabra bunita pa describi den su totalidad.
Un exposicion di alta calidad, un exposicion expresando figuranan y colornan den tur claridad.
