OK Shonnan, awe nos relato encuanto e banda musical Doble R di nos isla ruman Corsouw.
Nos tambe a presencia e charla hopi bunita y hopi interesante di Dr. Rene Rosalia di Corsouw, duna den e aula di Universidad di Aruba recientemente. Un aula completamente yen di amantenan di Doble R, amantenan cu ta gusta bayla riba dushi ritmo, cu ta stima nos dushi idioma, nos dushi Papiamento. Lady Ruth no a registra pa atende e charla, y hunto cu varios persona mas, a wordo poni ariba “lista di espera” y mester a warda dilanti e aula, pa wak, si tur e hendenan cu si a registra lo bini di berdad. Na ultimo ora, cu a bira ora pa e charla cuminsa, nos por a drenta, tawatatin stoel pa nos. Asina Wim Rutgers y su bunita sra.esposa Joke, kendenan tambe a wordo poni ariba “wacht lijst” tambe por a drenta na ultimo ora, un crenchi prome cu e charla a cuminsa, pasobra, segun nos a comprende, esnan cu tawata registra cu tawata falta di yega, pa x motibo no a yega y tawatatin algun stoel disponibel. Asina mes cu nan a pone algun stoel mas aserca. Nos, contento contento di por a presencia e charla bunita, super bunita aki. Dr. Rene Rosalia a papia cla y raspa tocante hopi di e centenares di cancionnan na Papiamento di Doble R. Doble R cu ta para pa e nomber di Rignald Recordino, e curason y motor di e banda unico y fantastico aki, “still going strong” na caminda pa celebra su di 72 anja di edad den e luna di December 2022. Nos a comprende cu e fiesta cu Doble R den Balashi Garden tambe tawata sold out y cu super dushi ambiente. Nos a admira e bayle di bunita amiga Irmgard Frans “Marella” ariba face book, nos por a sinti su alegria sigur den su movecionnan unico !
Den e aula, tur hende tawata scucha cu atencion y curason. Ta hopi ta e canticanan di Rignald Recordino encuanto bida real, bida di berdad den comunidad cu su alegria, su tristeza y of su dolornan y of protesta. Pa Poeta Lady Ruth, e canticanan tur a zona manera poemanan den mi orea, poemanan cu a toca mi curason tambe. For di canticanan con pa trata e hende muher, te cu canticanan encuanto e tempo di sclavitud na Corsouw. For di canticanan alegre te cu canticanan serio y preocupante encuanto e rafinederia Shell, su tempo di gloria riba nos isla ruman Corsouw, te cu su serramento, lagando atras un desaster cu mester a inspira tur e trahadornan atrobe pa recoge nan trabao prome cu e binida di Shell, cu ta, piscamento. E tokenan special di un crenchi musica di e banda Doble R, despues di cada splicacion di e cantica cu Dr. Rene Rosalia tawata duna, a cay na bon tera serca e publico presente. Despues di un pausa cortico cu hapjes en drankjes dushi a sigui cu e charla y despues publico por a lanza pregunta y of duna opinion y of comentario. E seccion aki bon guia pa e energetico y guapo MC Addonsito Croes.
A resalta cu hopi tawata conose e cantica “Ta muhe ta manda mundo”entre otro. E tawata un charla exitoso y grandi den su balor literario cultural. E tawata un charla unico y masha bunita presenta pa Dr. Rene Rosalia. Ki grandi y bunita ta e curason humilde di Rignald Recordino cu a pone tur sorto di sintimento den cada un di su canticanan. Lady Ruth a hasi uso di e oportunidad di a regala Dr. Rene Rosalia y e gran musico artista Rignald Recordino su ultimo buki di Poema “Alegria di Ruthy Poema 2 “. E tremendo charla informativo, educativo y inspirativo aki a toca tur presente . Tin un buki sumamente interesante y bunita cu e.o. 500 cantica di RR den dje cu a wordo entrega na Dr. Rosalia den un primicia, ya cu despues nan lo trese riba mercado na Corsouw mes. E ta costa 170 dollar, y nos tur sa, cu e bal mucho mas cu esey, mirando e historia y cultura cu ta bini padilanti. Danki na Mi Cutisa, entre otro e bunita y simpatico Sra. Ruby Eckmeyer y e dynamico Arthur Kelly, e ministerio di Minister di cultura Sra. Xiomara Maduro cu su amor grandi pa nos cultura, cu por a tene e charla inigualabel aki riba nos isla, caminda semper a reina aprecio y amor pa e musica dushi di Doble R, cu tawata e compania agradabel alegre pa hopi di e studiantenan na Hulanda y na Merca den anjanan setenta.
Cu nos bon Dios sigui bendiciona Rignald Recordino cu salud, amor y sabiduria dia pa dia.
Cu su edad un crenchi halto e por ta trankil, cu su musica, su cancionnan ta inmortal y lo sigui inspira generacionnan pa bin. Danki RR, danki Doble R, danki Rignald Recordino.
“You are the blessing”, bo a trese hende hunto, bo a uni pueblonan di nos islanan ABC cu canticanan den nos lenga materno Papiamento. Shonnan tur, danki pa lesa nos relato , pasa un dushi dia colma di salud y bon energia. Un dia yen di sabiduria den nos alegria !
Cuida curpa y laga nos sigui duna bon Dios danki pa cada dia regala na nos pa medio di su gracia y misericordia.
