Cu amor pa su Valentino di 45 anja.
No tin nada mas dushi cu stima y wordo stima
Nada mas dushi, cu brasa y wordo brasa
Y ni maske edad ta sigui subi
Un dushi amor por sigui luci
Tambe den un dushi soenchi…
Y tambe cu su ups and downs de ves en cuando
Principalmente cu tur dos e mayornan trahando
Amor den su totalidad por ta un crenchi complica
Amor ta saca cabes y rek su nek na un manera eleva
E ta algo cu no por wordo scucha y splica tur ora
Y nos tur, den nos relashon di amor sa yora
Ora cu Amor ta den un curason mal comprendi y herida
Amor fiel ta mas amor cu passion, bon trato y respet
Amor ta baila den momentonan tristo, confundi, frustra y pret
Ta nos forza, nos anker cu tin nos barco riba e olanan di bida
Amor ta nos inspiracion cu ta hinka nos pa sigui stima
Amor ta e melodianan den cada poema y dushi canto
Amor ta cana man den man riba nos beachnan di santo blanco
Ora bo balora bo amor pa bo pareha dia pa dia
Bo ta sembra y cosecha un futuro yen di paz y harmonia
Bo ta rondona bo mes y bo sernan keri cu mas amor
Y tur esaki den bo fe y perseverncia cu ta convence’bo cu por
Por stima pa un tempo indefeni, por stima awe y pa semper
Ora bo stima di berdad, dos persona ta uni bira un
Manera un curason y un curpa den un sensacion di balans perfecto
Manera un pareha cu comunicacion habri y directo
Nos tur ta trahando riba nos relashon pa e ta uno mas perfecto
Bo no tin berguenza di papia di tur tema
Bo ta su amor y e ta bo amor, luz ta su lema
Parehanan di edad manera nos ta comprende y accepta
Cu ora bo scoge bo pareha, bo ta scogele di berdad
Sea honesto y sincero cu bo mes y cu bo pareha tur dia
Sea humilde, sea bo mes, y asina ta felis den bo famia
No tin nada mas dushi, cu celebra bida tur dia hunto
Amor ta un profundo asunto…..un asunto hopi profundo.
Danki na nos Creador di Amor, Dios y Mama Maria
Cu a manda nan yui Hesus pa ta nos luz den nos inspiracion y guia
Nan cu ta sinja nos cada un ken y con pa pordona y sigui stima
Danki na nos lectornan cu a lesa nos poema prosa cu ta rima
Y pa awe Dia di San Valentino y tur dia, Dios mediante, nos por sigui stima….