Aruba ta bendiciona cu hopi bon artista, musico, pintor, poeta, bailador, etc. etc. Nos isla por ta chikito den tamanjo pero grandi den cosecha na artistanan multicultural riba tur tereno, den tur diciplina di arte. Antes hopi crioyo cu por ehempel caha di orgel, accordion y steelpan. Awendia cu musica rap, guitara di corriente, drumset y e asina yama One man band, ora cu un musico artista ta toca e piano orgel electrico ey conekta cu musica di mas instrumento manera drumset y base guitar. Piano cu ta un di e instrumentonan hopi toca ketobay, acompanja pa su wiri y maraca, tambe ta keda algo hopi gusta, tambe cu musica clasico den concierto.
Lady Ruth no ta un experto riba e terrenonan aki, pero si ta gusta canta y bayla riba tononan y melodianan alegre. Si, nos tambe ta gusta canta y bayla!. Y recientemente nos tambe a bayla riba e notanan musical alegre y contagioso di nos gran artista, e legendario Robert Maduro cu ademas ta hopi bon conosi pa cu su grupo Alma Folklorico, awor tambe cu su banda Azucar.
Nos no por nenga ni ganja , nos tur ta hanja falta di nos amigo y gran musico cantante guitarrista Etty Toppenberg, pero ta contento cu e por tin tempo di salud y calidad di bida cu su bunita sra.esposa Corma. Ta Etty a cuminsa toca y duna di su tempo balioso y curason na Djiespies varios anja pasa, ilumina e curasonnan cu su cancionnan inmortal den 6 idioma, pero su salud a pidi di dje pe pasa mas tempo di calidad y amor cu su sra.esposa Corma y demas famia. Ta hopi a canta y bayla riba dushi ritmo di Etty Toppenberg y friends. E bayle di seu, e cancion di Bonairo tin yuwana grandi…..y mas ta hasi falta toch. Awor e dushi happy hournan di ultimo lunanan na Djiespies ariba tur Diabierna ta den man di e.o. Robert Thiel ariba wiel y su tocayo Robert Maduro y su banda Azucar. Cada musico artista cu su mesun dushi repertorio y ritmo. Lady Ruth no sa si tin otro bandanan musical cu tambe sa toca na Djiespies Place ultimamente. Pero nos sa si, cu nos a pasa masha dushi mes baylando riba e dushi musica y ritmo di e incansabel y dynamico Robert Maduro y Azúcar, recientemente atrobe bau di un shelo na strea cu un publico cu gusta bayla.
E cabayero aki a pone casi tur hende lanta move heup y curpa, zway e mannan na laira, bay links rechts dilanti patras anto cu hopi smak y alegria ! Robert ta mustra bon, super bon, despues di a baha un crenchi di peso. E stem, e bos, unico y ketobay tremendo ! E publico presente ta gusta canticanan alegre na cualkier idioma cu por pone nan lanta bayla nan so cu nan so of cu nan pareha. Ki dushi tawata e cancion “Mi limon, mi limonero” cu a pone Lady Ruth tambe lanta bayla su so , mientras su kerido esposo Johan tawata dal un bon chill, despues di a caba di bayla hunto den pareha varios dushi cancionnan , entre nan tambe un dushi wals cu a baha super super dushi mes ! Pueblo tey presente tur Diabierna na bahada di solo te banda di 10 or pm nan ey, pasando dushi mes ! Esaki ta un fiesta alegre di pueblo pa pueblo cu hopi amor y carino. E ta awor un tradishon pa hopi di nos grandinan di 50 plus,pero tambe esnan mas jong di edad topa otro na Djiespies Place riba Diabierna anochi. Tur cos ta cana nechi, limpi y bon organisa. Setty y Suzie y nan team ta sirbi e publico presente cu hopi amor y carino. Un “bearhug “ grandi pa e gentil y guapo cabayero Robert Maduro cu a of ta lanzando un cancion nobis nobis hot hot atrobe, segun nos por a comprende. E gran musico cantante aki tin su trayectoria y historia cu ta sigui crese y inspira tur rond di dje. Aruba ta bendiciona pa tin gran musiconan manera Robert Maduro y Robert Thiel. Lady Ruth ta manda tambe un brasa fuerte cu hopi amor y carino pa Etty y Corma Toppenberg, deseando nan hopi salud,alegria y sabiduria dia pa dia, cu bendicion di nos Creador di amor. Take care, sigui cuida ! Stay safe ! Danki pa lesa nos relato ! Love you too !
