Den un rueda di prensa di siman pasa minister Endy Croes a trese un cantidad di disparate, mal informacion y mentira tocante DPS y mi persona. E a haya ta bon pa insulta Rene Kock, presidente di Partido Red Democratico, yamando e pa un chabalito. Wel e supuesto chabalito ta un profesional diploma den educacion, mientras cu ta solamente na Aruba sr. Endy Croes por a bira minister di educacion. Na otro pais e exigencia ta pa tin un formacion academico of ta un profesional diploma den educacion pa por bira un minister di educacion. Solamente na Aruba tur cos ta posibel.
Ta mi persona a inicia e proceso pa coregi e foutnan den DPS, y awor minister Endy Croes ta cosecha e frutonan di mi intervencion. Aki ta desbarata e prome mentira di sr. Endy Croes, cu a bisa cu mi persona no a hasi nada. Den e overdrachtsdocument, cu mi a duna sr. Endy Croes, ta para na pagina 8 bao di e titulo di Dienst Publieke Scholen: “Interventie DRH bij DPS, er waren diverse zeer ernstige tekortkomingen en dringende knelpunten in de HR-functie, in de uitvoering”. Mi ta suplica sr. Endy Croes mirando e gravedad di e problematica di asunto di personal na DPS pa por favor continua cu mi plan cu ta den ehecucion. Anto minister Endy Croes ta bin bisa awor cu ta su plan y cu ta ami a faya.
Ya dia 7 di januari 2020 e directora di Departamento di Recurso Humano ta manda mi un carta cu ta cuminza asina: “Naar aanleiding van het verzoek van de minister belast met onderwijs inzake de overname door het DRH van de taken van DPS met betrekking tot rechtspositionele aangelegenheden van het personeel werkzaam bij de openbare scholen, berichten wij u als volgt”. Aki ta confirma cu mi persona a pidi DRH pa interveni y hasta tuma over e tareanan di asuntonan di personal na DPS, mirando e chaos cu tin na DPS. Ke men ta un peticion cu mi a hasi DRH bastante tempran ora mi a sinta como minister. Nos tur sa cu e ambtelijke molen ta draai poco poco y dia 18 di mei 2021 DRH a presenta na mi persona y na MinPres su “onderzoeksrapport Dienst Publieke Scholen”. E rapport a mustra cu DPS no por sigui asina, cu fayonan grave, y e conclusion di DRH ta lo siguiente: “zijn de binnen DPS vastgestelde problemen uitsluitend ambtelijk – en niet politiek – van aard. De leiding van DPS heeft jarenlang gefaald”. Ta pesei mi a hasi na diferente occasion cambio den leiding. Anto awor minister Endy Croes kier tira culpa riba mi persona.
Den e rapport aki di mei 2021 ta menciona e problema di retraso cu ambtsjubileum y kindertoelages. Nos a tuma decisionnan pa cuminza coregi esaki. E cantidad menciona pa minister Endy Croes di kindertoelages ta standard, cu mi tabata firma ultimo. Loke no ta klop ta e cantidad di bevordering menciona pa minister Endy Croes, esta 300. Docente, cu ta gran mayoria di personal di DPS, no conose bevordering. Na edad di 38 anja ta yega e maximo di su salario. Esei ta desanima docenten cu ta bai Hulanda of Boneiro unda e salario ta miho. Pesei mi a scirbi den mi overdrachtsdocument entrega na minister Endy Croes na pagina 18, cu mi plan tabata pa introdusi un sistema di aumento di e entrada di e docente riba 38 aña di edad. Pesei mi a corta vet den presupuesto pa realoca e recursonan aki aumentando e subsidio pa alumno (normbedrag) cu a drenta na vigor na 2021 y pa 2023 tabata e plan pa aumenta e entrada financiero di e docente.
E rapport di DRH di 2021 ta menciona con mi a introdusi un leerlingvolgsysteem, digitalisacion di DPS y centralizacion di data, cu sigur mester di mehoracion, pero minister Endy ta declara cu ta su persona a bin cu nan ya cu ex minister Lampe supuestamente no tabata sa su trabao. Mescos minister Endy Croes ta bisa cu e a atende e witte vlek gedoe, otro mentira. Ademas, no ta trata di gedoe sino di problematiek. For di 2019 mi tabata bezig cu DRH y APFA pa busca un solucion pa e problema aki, esta cu tin ambtenaar trahando pa hopi tempo caba sin cu ta inscribi pa un of otro motibo na APFA. DPS a manda DRH e lista di witte vlek 12 di maart 2020, net prome cu e pandemia, cu ta contene nomber di 55 docente afecta. Dia 21 di juni 2021 mi a bolbe manda un carta pa DPS y DRH tocante witte vlek openbaar onderwijs cu e siguiente peticion: “om bericht en raad en met het verzoek om, in het kader van de huidige interventie van het DRH bij de DPS en als vervolg van het eerder mailverkeer, de problematiek van ‘witte vlek’ in het openbaar onderwijs aan te pakken. Hierbij dient aansluiting te worden gezocht bij het huidig beleid inzake gemiste pensioenopbouw. Ik onderschrijf verder het advies van het DRH (d.d. 28 februari 2020), dat een oplossing dient te worden gezocht voor alle ‘witte vlek’ gevallen”. Ta mi persona a inicia e trajecto aki, cu awe minister Endy ta cosecha su frutonan. No tin retencion di pensioen cu no ta wordo deposita na APFA, manera eroneamente minister Endy Croes a bisa. Simplemente e docentenan aki no ta inscribi na APFA. Ademas e sistema di payroll di PSA di DPS no ta permiti retene pensioen y no draag e af.
E solucion a fondo pa DPS mi a presenta asina cu mi a bira minister, esta verzelfstandiging di DPS, segun e prome documento di 16 di februari di 2018. Pa level e playing field entre tur schoolbestuur ta importante pone DPS bao di un stichting cu un bestuur profesional, y ta saka politiek for di e maneho diario di DPS. Pero ya na april 2018 Parlamento di Aruba a bin cu un mocion pa prohibi verzelfstandiging di DPS. Asina mes mi a keda insisti cu esei ta e miho solucion, dia 14 di september 2020 mi a presenta na conseho di minister e “principebesluit om het verzelfstandigingstraject van de DPS nader te onderzoeken”. Den e rapport di 2021 di DRH tambe ta menciona e necesidad pa distancia politiek di maneho di DPS. Y e rapport di Doorlichting di Hulanda ta exigi esei na pagina 67: “Verzelfstandig het openbaar onderwijs en brengt dat onder in een bestuurstichting”. Na pagina 66 ta bisa cu e minister anterior a purba, refiriendo na mi persona, “maar kreeg geen politiek draagvlak”. Y ta conclui cu independizacion di DPS ta absolutamente necesario, esaki ta parti di e landenpakket. Si na 2018 ma haya politiek draagvlak awe nos lo no ta sinta cu tur e problemanan aki. Parlamento y Partido MEP a faya, esei ta e berdad.
Esaki ta e motibo pakiko minister Endy Croes a trese malinformacion y mentira contra mi persona, e ta un strategia di marketing, pa pinta ex minister Lampe malo, pasobra ta bai bin independizacion di DPS cu tanto MEP a bringa y awor tur hende lo wak cu ex minister Lampe ta haya razon. Pesei ban desvia e atencion y mustra con malo ex minister Lampe ta. Efectivamente na final minister Endy Croes a papia cu a hire un consultancy cu lo bin cu un organogram nobo di DPS, es decir minister Endy no por pone den su boca e palabra verzelfstandiging DPS, pasobra ta esei e ke men.
Comunicado Rudy Lampe Partido Red Democratico
1 comment
[…] Source link […]