Tabata un pensionado di MetaCorp
Tabata un noticia cu a conmove tur cu a conoce y cu a traha cu ne. “Rich” a bay sosega, despues di a confronta complicacion cu su salud. Te cu recien, el a atende tur evento di compania.
Rudolph Achylus Richardson, miho conoci como “Rich” a inicia su carera dia 16 di juni 1971 na E. de Veer Transport (ATCO Aruba), como Transport Coordinator. Durante e añanan, Rich a tuma e encargo di ATCO na Boneiro, Corsou y Venezuela. Na aña 1984 a promove Rich como General Manager y Director di ATCO te cu finalmente na aña 1985 Rich a logra forma parti di e board di MetaCorp, como accionista. Esaki no a nifica cu Rich a sinta solamente den oficina, sino a sigui dobla manga di camisa y sigui traha duro manera semper!
Rich a pasa den tempo bon y tempo menos bon cu su salud y tambe a experencia e ceramento di Lago. Pero Rich a sa di lucha cu alma y curpa y a gana ambos bataya. Rich a hay’e ta baha man un poco cu trabou despues di su enfermedad y a tuma diferente proyecto como miembro di Executive Staff di MetaCorp.
Entre nan el a tuma encargo completamente di ATCO Concrete Division y tambe el a diseña y construi e supply boat di Renaissance Island cu ta carga e nomber Nautilus.
Na aña 2001 Rich a asumi e posicion di Corporate Director di Loss Prevention di MetaCorp te dia cu el a baha cu pensioen. Na aña 2011 MetaCorp a honra Rich conhuntamente cu Frida Croes y Wendell Bennett pa e añanan di servicio den e posicionnan di liderazgo den diferente posicion den compania. Como conmemoracion pa nan logro, MetaCorp a otroga un diploma di Bachelor in Business Leadership (BBL) y un renchi como graduado di MetaCorp University.
Tur cu conoce Rich sa cu un di su hobbynan principal ta piscamento y tambe e ta un gran maestro den hersengymnastiek. Ta di remarca cu tur loke Rich haci, e ta haci esaki cu un gran pasion, dedicacion y determinacion, teniendo semper e imagen di MetaCorp na halto.
Rich tabata un pensionado leal y activo di MetaCorp; semper Rich tabata presente na tur evento di compania y pa Rich tabata semper un placer pa topa bek cu su ex-coleganan y asina recorda e temponan bieu. Continuamente Rich tabatin un storia pa conta y semper cla pa conseha e generacion nobo di MetaCorp.
Wendell Bennett ta describi Rich como un persona cu por traha pa oranan largo tanten cu e keda cla cu e trabou. E tabata un persona recto y un manager disciplina. Alabes Rich tabata un persona responsabel y un bon amigo.
Eduardo de Veer, accionista principal di MetaCorp, a expresa cu hopi lo sinti falta di Rich. Tur lo record’e como un persona leal, honesto y un ehecutivo dinamico. “Mi por skirbi un buki cu tur su logronan y anecdota, sinembargo e creacion di Renaissance Island ta loke miho ta ilustra su determinacion”, asina Eduardo de Veer a duna di conoce. Mientras cu tur hende a considera e proyecto como “un locura”, Rich tabata na encargo di e diseño y finalisacion di e area iconico aki of por yam’e un “seamark” caminda tin lama, mangel, restaurant, flamingo, cabana y mas. E reto tabata pa traha tera riba lama di un manera cu naturaleza mes ta sosten’e. Mobilisa ekipo pisa, santo, awa y coriente tabata algo dificil, sinembargo tabata algo cu Rich a atende for di comienso te fin.
Siman pasa, despues di un enfermedad y despues di a gana hopi bataya, Rich finalmente a bay sosega. MetaCorp ta expresa palabranan di condolencia y hopi forsa na su señora, yiunan y demas famia y conocinan. Cu Rich sosega na paz.
