Fundacion Anti Droga Aruba (FADA) despues di pandemia a trata hopi caso di Burnout. E burnout ta bao di trahadonan y hopi biaha loke cu a sali na cla, ta cu nos como ser humano no tin custumber di bisa no, esaki no ta algo cu Arubiano nan ta gusta bisa mirando cu nos como Arubiano ta personanan cu ta gusta yuda.
Segun Rubiella Toppenberg trahado preventivo na FADA nos comunidad ta personanan asina. Esaki ta pone cu na momento cu tin hopi trabao nos no sa con pa bisa cu a yega e limite di tuma asina hopi trabao. Esaki ta caminda cu e persona por drenta den un estado di burnout y ta agota di e trabao.
Burnout por bay na un estado unda cu e persona ta cuminsa haya malestar y sin cu e persona sa e ta haya un burnout unda cu e ta yega na un fase cu si e no tuma un break of siña bisa no of no tuma mucho trabao e por traha riba salud mental tambe.
Den e caso di burnout tin hopi tipo di problema y e ta varia di edad. Mayoria di e malesanan di salud mental basicamente por toca na porta di tur edad, pero na mes momento mester corda cu tin casonan di salud mental cu ta heredero unda cu e persona ta nace cu ne y pa un motibo of otro e persona ta bay uza un substancia y ta lanta e un otro tipo di malesa di salud mental for di soño.
Asina e curpa y e menta lo cuminsa puntra su mes ta di unda tur e reaccionnan aki cu e curpa ta duna ta bin, sin sa cu den e stamboom di famia tin un persona den e famia cu a sufri di esaki y cu un miembro di famia a hereda esaki.
Loke cu ta un realidad ta cu e problematica di salud mental ta grandi, pesey ta importante pa cada mucha,hoben, hende grandi y adultonan mayor sinti cu algo no ta bon cu e curpa mester tuma accion dibiaha debi cu mas warda mas grandi e problema ta bira.
Segun Rubiella Toppenberg berdad ta cu ainda tin un cultura di tabu y miedo den nos comunidad, esaki ta hopi grandi ainda bao di e comunidad, stegma ta un situacion cu ta presenta masha hopi mes. Segun Rubiella Toppenberg di FADA, ultimo simannan cu a duna charla na scolnan por a mira esaki presenta y a corigi basta mucha.
E hoben no ta consciente di e daño cu e ta haciendo, mirando cu e momento ey e hoben ta haci pret di e topico di depresion na scol y na unda cu tin mucha ta haci bofon y ta ter riba e topico. Sinembargo na mes momento por tuma nota y mira reaccion di e otro muchanan den klas cu kisas den e klas mes tin un of dos mucha cu ta sufri di depresion den e klas y no ta bin dilanti pa motibo di e actuacion di e hobennan cu ta haci joke riba un punto asina delicado cu ta depresion.
Como un trahado social ta mira di biaha e persona cu tin esaki y ta mira di biaha cu e topico ta toca na e mucha. Sinembargo e educacion ta cuminsa na cas y ta bon pa nos por siña tur mucha na un edad chikito caba entre 3 pa 4 aña por cuminsa papia cu un mucha caba y splica nan cu depresion por bati na porta di tur hende hasta abo.
Na momento cu un otro persona ta haci chercha di e topico di depresion e persona cu tin e depresion no lo busca ayudo pa miedo pa e no wordo chercha, e ora e no ta busca ayudo y ta keda biba cu e depresion pa resto di su bida y na momento cu e persona pone fin na su bida henter un comunidad ta bay den shock.
Sinembargo nos mes ta parti di e problema debi cu nos no ta pega atencion y ta duna comentarionan sin cu nos sa cu esun banda di nos ta keda afecta. Segun Rubiella Toppenberg stegma ta algo grandi y e ta e causa di mas grandi pa kico hende no ta busca ayudo, pero mas nos papia di salud mental mas habri, mas e hende nan cu tin mester di esaki ta sinti un push y motivacion pa busca ayudo.
Sinembargo loke cu ta un realidad cu ya mundo ta den un epoca cu nos no mester tin berguensa mas y problema cu salud mental por bati na porta di nos tur.
