Loke nos haci ta pa genera entrada pa pais Aruba y trece beneficio na diferente componente cu ta importante pa tur cu ta biba na aAruba
Den cuadro di 1 aña di Landspakket, Gobierno di Aruba a presenta un documentario den cual diferente profesional y Minister a papia riba diferente tema di importancia. CEO di Aruba Tourism Authority (ATA) sra. Ronella Croes a papia tocante proyeccionnan di turismo.
Turismo na Aruba ta mirando un recuperacion hopi mas rapido cu locual a anticipa. E plannan pa e aña aki tabata ilustra un recuperacion di entre 45% y 60% di cantidad di bishitante, compara cu aña 2019 (e ultimo aña normal cu a conoce pa turismo). Na e momentonan aki cu resultadonan di october inclui, ta premira cu por ta cerando 2021 cu un grado di recuperacion ekivalente na 73% compara cu 2019.
Sra. Croes a splica cu ora ta papia di entrada pa Pais Aruba, ta midi locual cu Banco Central di Aruba ta registra y ta compila, esaki ta yama “Tourism Credits”. Cual ta representa entrada directo pa medio di turismo. Locual cu por mira proyecta pa e aña aki ta un grado di recuperacion di 45% y 60% compara cu locual nos a ricibi na entrada na 2019. Na e momento aki ta señala cu e grado di recuperacion ora cera 2021 lo por ta riba 80% compara cu aña 2019.
Pues atrobe poniendo e den cifra pa ilustra kico kiermen cu e recuperacion aki den termino di cantidad di bishitante y entrada pa Pais Aruba, por mira den ambos aspecto con esaki ta moviendo mas rapido. E ta trece retonan cu ne pero pa e oportunidadnan cu tey den diferente di e mercadonan, Aruba a capitalisa den esakinan y ta moviendo como un di esunnan mas rapido y sigur den region caribense tambe. Pues sigur un proyeccion positivo pa e aña aki. Ta proyecta cu pa otro aña lo ta continuando cu esaki, unda cu lo por ta yegando pa ambos aspecto entre 95% y 100% di recuperacion ya caba na 2022 compara cu 2019, sra. Croes a duna di conoce.
‘Tur crisis ta trece cu ne oportunidadnan y di parti di Oficina di Turismo, ta señala den cifranan con a bin ta capitalisa di oportunidadnan. Pero algo cu ta hopi importante tambe ta pa haci uzo di ocasionnan y oportunidadnan pa cana cu un desaroyo di turismo duradero. Teniendo na cuenta aspectonan economico y treciendo esaki den balansa cu proteccion di naturalesa, medio ambiente, enfoca riba e bienestar general y adelanto di esaki.’
Por ultmo sra. Croes a bisa: ‘Tin reto pero oportunidadnan tambe cu aworaki por sigui haci uzo di e momento pa trece cambio na cosnan cu kisas por mehora. Aruba por sigui conta cu oficina di turismo pa sigui enfoca riba esaki y pusha unda cu nos por.’
Prome Minister Evelyn Wever-Croes a expresa su gratitud na señora Ronella Croes pa brinda e informacion importante aki den e programa di un aña di Landspakket. ATA a hunga un rol importante den recuperacion di nos pais.
