ORANJESTAD,Aruba
Den cuadro di reunionnan Interparlamentario di Reino, e siman aki na Corsow, un delegacion di Parlamento di Aruba ta na Corsow. Dialuna lo inicia cu e reunionnan Bipartite entre Aruba y Corsow. Intencion di e reunionnan ta pa por yega na palabracion concreto riba diferente tereno na bienestar di e ciudadanonan di e islanan.
PROGRAMMA DI REUNION
Pa loke ta e reunionnan Bipartite lo toca entre otro e situacion di Venezuela y su implicacionnan pa e islanan, colaboracion ministerial general, colaboracion riba tereno di salubridad y economia. Pero di otro banda tambe lo atende aspectonan legislativo riba tereno di screening di Ministernan y Parlamentarionan, y aspectonan di e buki nobo di procedimento penal.
COLABORACION RIBA TERENO DI SALUBRIDAD
Durante ultimo reunion Bipartite a señala e importancia pa inventarisa e diferente specialisacionnan medico cu tin na e paisnan Caribense di Reino. Corsow, Sint-Maarten y Aruba ta inverti hopi placa den cuido medico y ora ta conoci ki tipo di specialisacion tin na cada isla por inverti mihor, traha mihor palabracion y brinda un mihor cuido medico na e ciudadanonan di cada isla. Pero na mes momento por reduci gasto mara na manda patientnan pa exterior tambe. Esaki ta un di gastonan mas halto y cu ta core alrededor di 45 miyon florin pa aña. Aunke Minister Dangui Oduber a logra baha esaki si, pasobra bou Gobierno anterior e suma tawata alrededor di 60 miyon florin pa aña.
Un otro punto di preocupacion grandi pa loke ta salubridad publico ta maneho di Hospital. Den cuadro di esaki y e ultimo desaroyonan na Aruba nos lo elabora riba e punto aki pa wak con por yega na solucionnan comun y duradero pa retonan comun.
SITUACION VENEZUELA
Implicacionnan di e situacion na Venezuela riba e islanan ta obvio. Por sinti e consecuencianan riba tereno economico, den enseñansa, salubridad publico y tambe nos seguridad. Pa e motibo ey a introduci caba diferente instrumento, ley y maneho pa mitiga e riesgonan aki.
Pero un punto importante cu lo elabora riba dje durante reunionnan Bipartite y Interparlamentario ta e introducion di un “Electronic System for Travel Authorisation” (ESTA), manera Minister di Husticia, mr. Andin Bikker, a anuncia. Esaki lo ensera introducion di un obligacion pa un pasahero pidi permiso pa biaha pa Aruba, prome cu por biaha. Esaki ta un instrumento cu lo fortifica nos seguridad y control na frontera.
PA CONCLUI
Tur e reunionnan ta termina den palabracionnan concreto pa asina como Parlamentario nos por urgi Gobierno pa explora posibilidadnan of ehecuta y introduci e cambionan necesario. Lo nos tene pueblo informa di e diferente reunionnan cu lo tuma lugar e siman aki na Corsow.
