1 di januari 2013 e ley cu ta reglamenta salarionan den sector (semi) publico a bay na vigor na Hulanda. Esaki ta e asina yama “wet normering topinkomens”. Meta di e ley aki ta pa combati salarionan halto den e sector (semi) publico y e ley ta tene cuenta cu “bezoldiging” pero tambe e asina yama “golden handshakes”.
BALKENENDE NORM
“Balkenendenorm” ta e nomber pa diferente normanan ankra den ley, cu conhuntamente ta reglamenta cu salarionan di empleadonan (semi) publico no por ta mas cu 130% di e salario di Minister. Ta na 1 di januari 2013 cu esaki a wordo formalisa den e asina yama “wet normering topinkomens”, cual a wordo presidi pa e “wet openbaarmaking uit publieke middelen gefinancieerde topinkomens” na 2006.
E nomber “balkenendenorm” a bin door di e nomber di e prome minister di Hulanda e tempo ey, esta Jan Peter Balkenende. E a dicidi di bin cu e norma aki despues cu tawata tin hopi discucion y incomprendimento den comunidad pa e salarionan sumamente halto di empleadonan (semi) publico. Locual mas tawata yama atencion ta e manera cu tawata premia directornan cu ta funciona malo cu un “golden handshake”.
INTEGRIDAD GABINETE WEVER-CROES
Pa crea mas transparencia den gobernacion y respet pa institutonan democratico, Gabinete Wever-Croes a bin cu diferente iniciativa. Asina a introduci un “bureau integriteit”, un “integriteitskamer”, a modernisa e ley di comptabilidad, aproba ley di “ombudsman”, aproba ley di financiamento di partidonan politico y dentro di poco lo bay atende cu e ley di screening pa Ministers y Parlamentarionan.
Pero na mes momento ta importante tambe, den cuadro di finanzas publico, pa introduci un norma cu ta reglamenta e salarionan di e aparato (semi) publico aki na Aruba. Por a tuma nota tambe cu esaki ta un condicion cu Hulanda a impone riba Aruba pa bin na remarke pa fiansa.
PA CONCLUI
Parlamento no a ricibi e ley aki ainda, pero a compronde cu e ta aworaki na “Raad van Advies”. Den oktober “Raad van Advies” lo keda cla cu nan conseho y despues lo por trata e ley aki den Parlamento. Sinembargo awe Parlamento a reuni cu lidernan sindical di diferente sindicato pa scucha nan puntonan di preocupacion pa cu introducion di e ley aki. A keda palabra cu na momento cu Parlamento ricibi e ley aki lo bolbe reuni cu e lidernan sindical pa atende nan preocupacion
