ORANJESTAD,Aruba
CEDE Aruba a entrega un peticion na Gobierno pa haya ayudo financiero pa asina Fundacion Pa Nos Comunidad por reparti mas pakete di cuminda. E crisis aki ta hopi serio y hopi famia no tin placa ni cuminda. Ministerraad a dicidi di brinda e ayudo financiero aki y diabierna Parlamento completo a sostene e decision di Gabinete Wever-Croes.
PLAN PA REPARTI PAKETE DI CUMINDA
CEDE Aruba a reuni cu Rode Kruis Aruba, Caritas, HIAS, IOM y UNHCR pa yega na un plan pa loke ta trata yudansa di cuminda. Meta di e plan aki ta pa por reparti e paketenan na un manera eficiente. Na mes momento ta percura di e forma aki cu recursonan limita ta wordo uza optimal.
Na prome lugar e ayudo ta wordo duna na esunnan cu no a bin na remarke pa FASE. Despues ta duna prioridad na esunnan cu a bin na remarke pa FASE pero no a ricibi pago ainda. Y tambe esunnan vulnerabel den nos comunidad cu no tin manera y tampoco sosten social.
FUNDACION PA NOS COMUNIDAD
Fundacion Pa Nos Comunidad (FPNC) ta yuda miles di famia, y na april 2020 a reparti mas cu 2000 pakete di cuminda. Nan a señala cu e peticion pa e ayudo aki a sigui aumenta. FPNC ta duna prioridad na esnan local y hunto cu Directie Volksgezondheid a yega na un pakete di cuminda cu por ta di ayudo pa un famia pa henter un luna.
PA CONCLUI
E crisis actual ta hopi serio. Hopi famia a perde trabou y nan entrada, y ta depende por completo riba sosten financiero atraves di FASE. Di otro banda masha hopi compania ta depende awor di e areglo cu Gobierno pa loke ta “loonsubsidie”. Pero e seriedad di e crisis actual ta bira mas bisto ora cu e cantidad di esunnan cu ta aplica pa pakete di cuminda aumenta.