ORANJESTAD,Aruba
Siman pasa Gobierno Hulandes a aproba pa di dos biaha un fiansa pa Aruba sin interes. E fiansa aki ta pa dunadornan di trabou por mantene nan empleadonan na trabou. Esaki ta muestra cu Hulanda ta di acuerdo cu e maneho y vision di Gabinete Wever-Croes.
AVP HUNGANDO POLITICA MEMEY DI CRISIS
E ta incomprendibel cu bo ta haya ex-ministernan di AVP ta sigui malinforma pueblo. Ta trata di crea panico door di insinua cu Gobierno di Reino no a aproba e suma di 1.3 biyon florin. Ta netamente e actitud aki y falta di seriedad a percura cu na 2014 Hulanda a perde confiansa den Gabinete Eman y a duna Gabinete Eman un KB pa mal gobernacion. Ta importante pa Parlamentarionan di AVP lesa nan documentonan pasobra e ora nan lo ta altanto cu no tin niun peticion pa aprobacion di 1.3 biyon florin. Esaki ta simplemente wega partidista di AVP y su ex-ministernan.
MANEHO FINANCIERO DI GABINETE WEVER-CROES TA CONFIABEL
Na final di 2019 “Raad van Advies” y CAFT a bisa cu lo logra e normanan financiero. Y e cifranan di realisacion cu ta conoci ta demostra cu na 2019 a te hasta surpasa e normanan palabra. Na aña 2019 Aruba a conoce un surplus di 11.3 miyon florin. Pa loke ta e gastonan di personal tambe ta wak aworaki cu esakinan ta menos cu loke a wordo presupuesta na 2019. Esaki ta resultado di un maneho serio y responsabel.
Na 2020 pais Aruba lo a conoce un surplus di 44 miyon florin pero lamentabelmente mundo a wordo confronta cu COVID-19. Pa e motibo aki nos ta condena cu AVP ta sigui haci politica pa crea panico. E aprobacion y yudansa cu Hulanda mester brinda no ta pa Gabinete Wever-Croes, pero pa tur esnan cu a sali perhudica debi na e crisis. Y ta como si fuera AVP ta contento si e famianan aki no haya e ayudo.
PA CONCLUI
Aworaki nos mester para uni y para fuerte pa Aruba. Nos ta spera cu AVP compronde cu e mester pone su interes personal politico y su interes partidista un banda aworaki. Nos tin tur confiansa cu, cu poder di Dios, bou liderazgo di nos prome minister, sra.mr. Evelyn Wever-Croes nos lo surpasa e retonan actual.
