ORANJESTAD,Aruba
Awe nos ta trata presupuesto di pais Aruba y e presupuesto di pais Aruba no a scapa di e virus. Ora nos wak cifranan di SVB y DRH por ehempel, nos ta papia di un perdida di 21 mil cupo di trabou directamente relaciona na turismo, 2 mil cupo di trabou parcialmente relaciona na turismo y dos mil cupo di trabou indirectamente relaciona na turismo. Alrededor di 25 mil cupo di trabou ta traduci den un perdida di 64 miyon florin pa luna na salario. Esaki excluyendo tipnan cu e trahadornan aki ta ricibi y nan beneficionan secundario di trabou. E impacto ta sumamente grandi y p’esey no tin lugar pa mocionnan populista.
RAPPORT DI STANDARD & POORS
Cu e impacto ta bay ta grandi pa Aruba nos sa. Si nos wak por ehempel e prome rapport cu Standard & Poor’s a emiti riba 17 di maart, specificamente riba cua paisnan ta mas vulnerabel pa loke ta e impacto di COVID-19 riba turismo, bo por wak cu nan ta menciona cu e isla cu lo wordo afecta mas fuerte ta Aruba. Nos GDP ta esun cu lo wordo afecta mas y segun e diferente “stress scenarios” nos ta e pais caribense mas vulnerabel.
MOCION POPULISTA
Ta premira cu entrada di Gobierno lo baha cu 627 miyon florin y entrada relata na turismo lo baha cu 80%. Pues awe no ta momento pa haci politica populista. E medidanan di emergencia pa mitiga e situacion cu esunnan cu a perde nan entrada y empresanan a haya nan mes aden ta rekeri 1.3 biyon florin. E mocion di POR pa corta solamente 1000 florin pa un periodo di 3 luna no lo yuda pa remedia e situacion. Bo ta papia di un contribucion di 0.00023076%. No ta e momento pa hunga politica cu dolor di e 25 mil famianan cu a perde trabou.
PROCESO
Otro luna Gobierno lo presenta e tercer fase cual ta ensera e pasonan structural cu mester wordo tuma pa nos yega bek na e realidad prome cu e crisis. Y nos fraccion ta dispuesto pa entrega mucho mas cu simplemente 1000 florin pa 3 luna, cual ta fingi un ayudo superficial. Mas bien nos lo ta solidario pa entrega algo mucho mas significativo na bienestar di nos pueblo.
PA CONCLUI
Ta sumamente importante pa existencia di nos comunidad pa nos uni. Nos tur mester aporta, no solamente den finanzas, sino tambe den cordialidad, hermandad y convivencia di un pa otro. Y p’esey nos ta haci un apelacion fuerte na pueblo pa carga e responsabilidad colectivo y individual. Union combina cu Actitud y actuacion civico ta loke ta necesario pa nos por combati y vence e virus aki.
