Despues di a sera aña 2021 ku satifakshon pa loke ta logronan di ABVO Boneiru,ta premira ku 2022 lo ta un aña di hopi reto pa loke ta trata desaroyonan den e organisashon aki na Boneiru.
Den e aña ku ta tras di lomba tabata tin hopi kos a pasa pa loke ta trata desaroyonan den nos organisashon sindikal aki na Boneiru,di akuerdo ku sr. Robert Sances, presidente di ABVO Boneiru. Di kada moveshon ku tabata tin nos a siña for di dje. Importante ta pa asumi i karga responsabilidat. ABVO ta mira pa dilanti i ta kla pa enfrenta tur e retonan ku tin den nos direkshon.
REORGANISASHON
Mas aleu direktiva di ABVO Boneiru a hasi un sondeo entre su miembronan asina pa krea puntonan di kontakto den kada organisashon of departamentu ku ABVO Boneiru ta representa. ABVO lo yama un reunion ku esnan apuntá den kua lo tene un enkuesta pa asina tin datonan pa loke ta deseo di miembresia. For di esaki mester por skohe lidernan nobo ku lo mester bai karga e organisashon i okupa funshon nan klave den e organisashon pa direktiva di ABVO ta kompleto, ku un direktiva solido pa drenta un era nobo pa un ABVO mas outónomo.ABVO Boneiru por logra solamente ku sosten di su miembresia.
EDIFISIO
ABVO na Boneiru ta dispone di dos edifisio unu ta e sede eksistente i den su banda un edifisio multi funshonal di dos piso.
Tin plannan grandi pa komberti Sede aktual den un edifisio multi funshonal, kompletamente restoura. Ta e intenshon pa komberti sede aktual den un kas sindikal pa ABVO su miembronan.
Ta den nos plan nan pa komberti un sala ku lo por usa pa kasonan individual, manera asistensia pa traha karta of asuntunan huridiko. E sala aki mester sirbi pa kasonan individual i/of pa fasilita e miembro un kantor pa e atende asuntunan laboral ku guia di un of mas miembro di direktiva.
Ta asina ku lo bini reorganisashon tambe pa loke ta trata hurmentu di espasio. Esaki lo bira un sistema kompletamente outomatisa pa loke ta trata reservashon i pagonan pa tersera hasi uso di edifisio. Ya kaba pagonan mester bai via Banko of online.
E kas sindikal aki mester sirbi pa formashon di lidernan pa futuro. Formashon pa miembronan di nos organisashon i nan famia. Entrenamentu riba tereno sindikal.
Mas aleu Sede di ABVO tin ku bira un sitio di enkuentro pa aktividatnan sosial pa nos miembronan.
NEGOSASHONNAN
Despues ku a sera aña firmando seis ( 6) CAO, direktiva di ABVO Boneiru ta na mesa ku Gruponan di Servisio di CurOil Boneiru N.V. i tambe Bonaire Air Sirvices ku ta kai bou di SwissPort aktualmente, pa prepara un proposishon pa CAO nobo ta e dos servisionan menshona. Pa loke ta trata CurOil Boneiru den pasado tabata aflia na otro sindikato, sinembargo a mira e nesesidat pa afilia na nos otrganisashon.
Pues trahadonan di CurOil konose kiko ta un CAO, sinembargo pa trahadonan di B.A.S. – SwissPort esaki ta kompletamente nobo.
RETONAN NOBO.
Aparte di modernisashon di e Sede aktual na Kaminda Jato Baco, ABVO ta trahando riba benefisionan general pa su miembronan i den un di e proyektonan aki Boneriru ta e pionero. Ta trata aki di benefisionan manera deskuentonan super favorabel pa miembronan, manera den negoshinan riba tur e islanan riba kua ABVO tin miembresia. Den e kaso aki Boneiru, Korsou i Sint Maarten. Mas aleu ta papiando ku instansianan pa introdusi un tarheta di debito pa miembronan por hasi uso di dje pa por bestel online. E kombersashonnan ta kanando den bon direkshon.
Tambe ABVO Boneiru ta trahando riba un plan integral sosial den kua kasa i yunan di nos miembronan tambe por partisipa na dje.
PARTISIPASHON DI PENSHONADONAN
Un penshonado por ta miembro di ABVO Boneiru tambe.
Ken no ta korda e akshon: “NO MISHI KU NOS PENSHUN”? E tempu ei presidente aktual di ABVO Boneiru, a hanja e honor serka Usibo bou di kua e akshon a kai e tempu ei.
Den pasado presidente ABVO Boneiru sr. Robert Sances na varios okashon tabata tin kombersashonnan ku representantenan i Organisashon pa Penshonadonan na Boneiru. Ta e intenshon pa kontinua ku e kombersashonnan pa integra penshonadonan den nos organisashon meskos ku ta e kaso kaba na hermana isla Korsou. Den direktiva tin kaba un struktura pa penshonadonan ku nos lo ke introdusi aki na Boneiru tambe.
Presidente sr. Robert Sances ta gradisi su kompañeronan di direktiva sra. Joanny Trinidad, sr. Sjurnen Hersilia i sr. Lupo Janga, pa nan sosten i solidaridat pa ku nos organisashon. “ Bosonan a mustra loyaltat i ta para pa loke bosonan a skohe pe”.
Banda di esaki mi kier a manda deseonan di prosperidat na abundansia den 2022 pa tur miembro di ABVO i Boneiru por lo general.