ORANJESTAD, Aruba
Dialuna atardi parlamentario di fraccion di AVP Robert Candelaria a sinta den reunion cu algun miembro di grupo di activista conhuntamente cu varios stakeholders den e ramo, pa asina asisti y duna un miho bista y informacion riba e tema/ problematica di abuso di mucha ( Pedofilia ) cu ta prioridad den nos comunidad.
Robert Candelaria ta conta cu tabata un reunion sumamente fructifero, cu a cuminsa den oranan di atardi y a bay te oranan di anochi, y cu den su opinion e topico aki di abuso di mucha mester keda un topico central riba cualkier otro issue tumando luga riba nos isla.
Den e reunion a sinta cu diferente persona cu ta contribui na combati abuso di mucha, cada un cu su propio area di expertisio. A sinta brainstorm hunto caminda hopi punto crucial y ideanan a bin padilanti con pa ataca/ atende e issue asina delicado pero alarmante den nos comunidad.
Remarcabel di e reunion aki tabata e disponibilidad y commitment ( compromiso ) di hende den nos comunidad, hendenan cu tin e gana, e pasion, e preocupacion pa yuda combati abuso di mucha den nos comunidad.
Tin hopi profesional cu no ta sali vocifera abiertamente nan opinion ( eticamente no por tampoco ) Tin hopi hende tambe den nos comunidad cu ta victima y kier aporta cu idea y sugerencia pero no ta logra tur ora pa haya e caminda pa hasi esaki. Awor ta ora pa tur hende yega hunto por logra metanan positivo hunto. Por a tuma nota di esaki den e ultimo tratamentonan di caso di pedofilia den corte. Tambe por a tuma nota den parlamento cu a realisa un cambio den castigo maximo pa casonan di delito sexual cu antes tabata mas abou cu na Corsou of igual cu na Hulanda pero awo por a subi e castigo maximo pone nan riba e mes un liña cu e otro paisnan den Reino.
E cambionan den codigo penal ta un parti chikito di e totalidad pero tin mas pa haci!
Candelaria ta di opinion cu castigo maximo ( e codigo penal ) solamente, no ta bay resolve / pone un paro na e problematica di abuso di mucha den nos comunidad. Ta algo hopi mas grandi, caminda prevencion ta esencial, caminda cu tin cu traha hunto cu diferente instancianan pa e cadena hudicial completo funciona optimalmente na bienestar di e victima. Mester percura cu semper e mucha ta central, mester sigura cu cada caso cu bin dilanti keda trata lo miho posibel pa logra di frena e problematica.
Ta encera training, colaboracion y na final di dia ta pone un stop / reduci drasticamente casonan di abuso di mucha den nos comunidad pero tambe ta preveni cu otronan lo no ripiti e tipo di crimennan aki y cu no lo mira mas victima tampoco cay den man di predadornan aki.
Un reunion fructifero y den union
Robert Candelaria a bisa cu e reunion a bay den bon combersacion, cu hendenan cu genuinamente ta preocupa y ta carga e topico den nos comunidad. E grupo aki ta bin cu bon ideanan y ta pone nan schouder bou di e lucha pa logra drecha e problematica aki. No ta haci promesa politico, ni promesnan irealistico pasobra e topico di nos muchanan ta mucho importante pa esey. Lo sigui yega hunto y pensa hunto cu tur cu kier logra e mes un meta cu ta na bienestar di nos comunidad. Lo sigui comparti informacion cu pueblo pa e topico keda riba mesa y keda relevante.