Nunca puntra kiko bo pais por hasi pabo sino kiko ABO por hasi
Despeus di un exitoso Aruba Art Fair, ultimo bez organiza prome cu COVID na 2019, pa ArtisA, na unda e tempo ey mas di 10.000 a presencia un festival di arte fantastico.
Awe, Aruba ta cla un biaha mas pa presencia un celebracion unico. E proposito di uni arte, artistanan, y artesanonan di Aruba un biaha mas ta e meta primordial di e celebración.
2022, ta marca un cambio, na unda pa prome biaha instancianan Internacional ta boga pa participa den e preparacionan y ehecucion y asina garantiza e mantención di e nomber San Nicolas, the Art Capital of the Caribbean. Pa prome bez Aruba lo conta cu un curator local di nivel internacional y di un expertisio grandisimo, cu un carisma excepcional pa cu su propio coleganan, den persona di Renwick Heronimo.
November 4,5,6 2022, ta marca e fechanan escogi, na unda lo desvela e transformacion artistico di loke ta e herencia cultural di San Nicolas, su cayanan y su edificionan.
Riba iniciativa propio, ArtisA, cu ta e fundacion madre di Aruba Art Fair, bao di guia di e dinamico Tito Bolivar, a cuminsa pinta tur palo di luznan, remove tur loke ta erosion y hasta remove parti di piederia cu a keda como obstáculo den caminda, na unda autonan tabata pega constantemente den pasado y asina acentua seguridad den e cayanan. Bankinan ta wordo laba y pinta di nobo. Tambe ta inicia cu e renovación di edificionan. Tur edificionan cu a perde color ta wordo reviva of pinta pa asina haya obranan nobo riba nan.
Murayanan extra ta wordo confeciona den instalacionan grandi di beton, según e petición di e artista y su obra. Na unda antes tin ziem, awor ta bin muraya cu lo wordo pinta.
Quizas 2022 ta bira un Art Fair excepcional y majestral, na unda masha hopi mente creativo ta uni pa hunto yega na un propósito. Duna Promenade y tur loke ta rond di dje un FACELIFT fantástico.
15 muralista Internacional y local lo laga nan estampa atrás. San Nicolas, sigur un biaha mas lo haya un toke di transformacion. Edificionan lo wordo transforma den piesanan colorido y yamativo, crea pa muralistanan di entre otro Mexico, Grecia, Brazil, Spaňa, Argentina, Italia, Portugal, Check Republic, Alemania, Chile, Belgica, Canada y Hulanda, y tambe nos artistanan local y tambe di hermana islanan Bonaire y Curacao.
Calling all artists:
Aruba Art Fair ta extende e invitacion na tur artistanan y artesanonan local, cu no a logra registra ainda, pa haci esaki mas pronto cu ta posible. Performing artists ta wordo yama pa participa y inscribi. Especialmente pa e competencia di Fotografia, Nature and Faces, tur persona cu ta gusta fotografía ta wordo yama pa manda nan obranan y registra.
Banda di esaki AAF 2022 lo crea diferente competencianan, Pop-up stores, pop up restaurants cu actividadnan y un outdoor gallery único. Arte, Baile, música lo crea un sinergia expectacular.
Pa mas informacion con pa inscribi, participa of simplemente ta parti di Aruba Art Fair, bishita nos website www.arubaartfair.com ART.CULTURE.MOVEMENT
