Diaranzon dia 10 di Augustus 2022 atardi, a tuma lugar e apertura oficial di “Rich’s Arubian Dish & Caribbean Delight Restaurant” cu ta un restaurant familiar, situa den e curason di Palm Beach den e area turistico banda di Olde Molen y na unda tur esnan cu kier purba un cuminda casero autentico ta haya e experiencia unico culario na e restaurant aki na unda tin e mihor variedad di cuminda riba nos isla. “Rich’s Arubian Dish & Caribbean Delight” ta un restaurante cu un concepto nobo y diferente, pa tur gusto di nos Arubianonan cu ta gusta cuminda local, pero tambe platonan di Curaçao, Colombia, Santo Domingo, Venezolano, Mexicano, Chines y Suriname entre otro. E ta duna un pida di e paladar unico cu ta inspira door di metodonan tradicional di prepara e cuminda y recetanan autentico local y caribense.
“Nos ta conta pa e cliente tin den e calidad halto di nos restaurant cu ta brinda frescura den e ingredientenan y dunando e sabornan cu ta haci e cumindanan dushi. Nos menu cu ta selecta specialmente pa agrada e smaak di nos clientenan na “Rich’s Arubian Dish & Caribbean Delight”, a pone cu e ta e mihor restaurant na Aruba cu e mihor servicio na nos clientenan.”, según propietarionan Julisa Kruydenhof y Richard Rodriguez.
E areanan di sinta come paden y pafor di “Rich’s Arubian Dish & Caribbean Delight” por cater tambe fiestanan grandi y chikito pa ocasionnan special, comemento di trabou, hacimento di aña, cena di preparacion pa bruid y otro celebracionnan mas. Tambe tin un menu gluten free pa clientenan cu ta desea di order esakinan. Den e area di e restaurant parti pafo, clientenan por admira bunita cuadranan pinta na muraya di diferente paisahenan local y edificionan riba nos isla cu ta duna e lugar un ambiente local. Bin come un cuminda delicioso y di bon calidad y experencia pa bo mes di con dushi e ta “Rich’s Arubian Dish & Caribbean Delight.
E restaurant aki ta bin como contesta na e turista y bishitantenan cu hopi biaha kier sa kico e localnan ta come y nan kier sa kico t’e platonan tradicional di Aruba ta.
Ademas e ta bira un experiencia Caribense reflehando e nacionalidadnan cu ta forma e populación di Aruba.
Tambe tin cuminda Mexicano eynan, ya cu riba diamars nan tin Taco Tuesday.
Ya fo’i 5:00 pm por pasa y purba e platonan local y e delicianan Caribense te cu 11:00 pm. Cushina ta cera pa 10:00 pm. Door cu e restaurant ta consisti di un bar, tipo ‘half moon’, tin e parti paden, cual ta un tiki mas elegante y tin e parti pafo tambe, cu lo bira mas tipo sportsbar. Den fin di siman (diabierna y diasabra), lo ta habri te cu 1:00 am p’e hendenan por dal nan drinks.
Loyalty Card Special
Rich’s Arubian Dish & Caribbean Delight tin un loyalty card. Dilanti tin tur informacion di e restaurant como tambe e QR Code cu por scan. For di eynan por bay riba e website unda cu por mira e menu, cual ta uno hopi varia. Cada biaha cu bin e restaurant tin di bin cu e carchi unda cu por firma of stempel y rib’e di seis bishita, ta haya 25% di descuento riba e menu completo.
PRIJS
Kruydenhoff a splica tambe cu a haci nan investigacion prome cu nan a pone nan prijs. No ta bai concentra solamente riba turista. Semper e ta bisa cu mester cuminsa prome cu nos localnan ya cu nan t’e sostenedonan di mas grandi. For di dia cu nan a tene nan soft-opening, basta hende local a bin y a gusta.
Awor particularmente cu nan a habri oficialmente, nan lo tin 10% di descuento p’e localnan riba henter e menu. Ta invita un biaha mas Aruba henter, vooral e famianan pa bin pasa un rato contento, ameno, disfrutando di nan dushi platonan local.
Minister Sra. Xiomara Maduro, Minister di Finansa tabata presente y a compaña e propietarionan pa haci e acto oficial di apertura di e restaurant aki, cu ta uno unico den su categoría.
