Richard (Gigi ) Helder: Un danki na un y tur cu a contribui cu awe Fast Delivery por celebra su 20 aniversario

Gradiciendo DIOS na prome luga cu a duna nos bida y salud pa por logra awe 20 aña di un compania di logistica Fast Delivery no tabata facil. Propietario di Fast Delivery Richard (Gigi) Helder ta gradici e staf y personal completo for di esun di mas abao te na esun di mas ariba pa nan contribucion pa e logro aki. Pa Fast Delivery awe  cumpli 20 aniversario esaki ta un logro di un team cu a traha conhuntamente pa logra pasonan firme den e industria di logistica na Aruba.

Un compania cu a cuminsa na 2003 solamente cu courier survices y e propio  propietario Ricgard (Gigi) Helder a cuminsa duna servicio di Delivery su mes personalmente cu un scooter parti carta cas pa cas, sea ta cuminda of loke cu e persona tin mester cu e no por sali for di cas ta yama Fast Dilevery  y e ta bay cumpra e productonan y trece nan, tambe tabata haci pago di awa, coriente, busca check y hiba check pa companianan. Di e manera aki Fast Delivery a cuminsa.

Trahando na cas den un huki den camber a lanta e compania y awe despues di 20 aña cu ta un trayecto basta largo ta mira bek patras y ta disfruta di e logronan y e sacrificionan cu a keda haci, unda cu den e proceso tabatin hopi guia di amigonan cu a forma parti di dje. Tambe den e 20 aña nan aki  ta encontra hopi reto y hopi distraccion tanto den trabao y den bida personal.

Tur negoshi tin su retonan, pero si bo no ta madura lo suficiente pa separa e distraccionnan of bo retonan den trabao e ora e distraccion lo separa bo di bo negoshi. Esaki ta un punto cu ta hopi importante pa tur negoshi.

No por compara awe un compania mes un cos cu 20 aña pasa mirando cu na Aruba hopi cos a cambia den 20 aña y di logistica sigur, compara un 8 aña pasa bin ariba tur cos a cambia y mester a keda cambia e compania constantemente cu sistemanan nobo pa keda competi den e mercado.

Retonan cu a encontra den camindanan sigur y ainda awe despues di 20 aña compara cu 20 aña pasa  ta e generacionnan cu ta cambia y e disciplina cu no tey mas manera antes. E disciplina di e generacion actual ta otro. Mercado laboral tambe a cambia y mester cambia hunto cu tur e cambionan aki como compania.

Gigi Helder ta conseha tur entrepreneurs nan nobo cu na momento cu kier drenta den un negoshi no mester tin miedo y cada oportunidad cu presenta tuma esaki sin miedo, e oportunidadnan cu ta presenta semper ta crea otro oportunidadnan na otro tipo di trabaonan den e mes un regimo di bo negoshi, esaki a pone cu awe Fast Delivery ta amplia y no ta solamente na Aruba, pero na Corsou, Boneiro y Baranquilla Colombia.

Mirando e perseverancia y e stabilidad cu e compania a crea despues di 4 aña mas oportunidad a habri unda cu a haya e oportunidad pa tuma UPS over cual ta un di e partinan cu fast ta afilia na dje a yuda habri porta pa Fast Delivery hopi mas amplio.

Asina for di courier a cuminsa bay den carga maritimo y carga aereo cu awe Fast Delivery por ta orguyoso di e team completo cu a forma parti y cu ainda ta forma parti di Fast Delivery pa añanan largo y cu awe Fast Delivery tin su mes un avion di carga cu ta bula entre e islanan. Orguyosamente por bisa cu Fast Delivery ta e prome compania cu a logra e AOC  logra den Reino Hulandes specificamente pa carga.

Fast Delivery tin mas of menos 75 trahado tanto na Aruba y na e islanan di Corsou, Boneiro y Colombia.

Gigi Helder ta gradici henter staf y personal di Fast Delivery y tambe na tur cliente cu Fast Delivery tin, danki pa ta cu nos den e trayectorio aki di 20 aña y danki pa e sosten di un manera of otro . Fast Delivery ta un compania cu ta traha manera un team y un famia, ta pasa den su retonan pero semper cu e focus pa sigui padilanti y surpasa tur obstaculo y logra sigui crece.