Di prome di maart e prome deadline a transcuri pa loke ta trata e agenda di ehecucion di e paketenan di reforma cu Gobierno a acorda dia 13 di november ultimo. “Dia prome di maart mester a presenta un plan di accion pa introduccion di un BTW – no introduccion di cualkier impuesto indirecto, pero literalmente introduccion di un BTW di 12.5% – y mester a bin c’un lista di prioridad pa fortifica e columna financiero di Pais Aruba, entre otro Directie Financien, Rekenkamer y Centrale Accountantsdienst, como tambe un plan di pa optimalisa pagonan di impuesto,” Parlamentario Arends a declara.
“Desafortunadamente ainda ni Parlamento y ni pueblo sa kico ta e plan di ahecucion, principalmente pa loke ta e BTW, kico esaki ta bay nifica pa e ciudadano, kico e ta bay nifica pa e comerciante, kico ta e cambionan administrativo cu mester tuma luga, cua ta e fecha cu gobierno tin pensa pa introduci esaki,” Arends a splica. “Maske cu oposicion, como tambe fraccionnan cu ta sostene gobierno, a pidi gobierno pa envolve Parlamento prome cu entrega cualkier plan y prome cu cumpli cu cualkier deadline y duna parlamento y gremionan participacion, pero esaki lamentablemente no a sosode,” e parlamentario a bisa.
E e di dos deadline lo ta 15 di maart caminda mester bin un ‘doorlichting’ riba e funcionamento di Departamento di Recursonan Humano di gobierno, Departamento di Impuesto mester por ricibi informacion di banconan riba cuentanan bancario y mester bin un plan di ehecucion pa e flexibilisacion di e mercado laboral. “Seguramente esaki tin nos atencion y atrobe ta algo cu gremionan y sindicatonan te aworaki no a wordo envolucra den e discusion. Aki dos siman gobierno di Aruba mester presenta un plan di accion concreto pa loke ta trata flexibilisacion di mercado laboral.”
Arends ta puntra su mes kico esaki lo bay nifica pa e clase trahador, como tambe pa nan dunadornan di trabou. Segun Arends, “Reforma den sector laboral y otro puntonan di reforma cu e landenpakket te contene ta issuesnan compleho cu mester di participacion amplio di partnernan social. Reformanan pa problemanan structural no por wordo usa pa soluciona problemanan riba termino cortico. Esakinan mester di un acercamiento diferente.”
CAFT na su turno, cu awor directamente ta cay bou Conseho di Minister di Reino, a duna Gobierno un deadline di prome di februari ultimo pa entrega presupuesto 2021, pero ainda Parlamento no a ricibi nada. “Segun e CAFT, Gobierno mester revoca e reduccion di loonbelasting cu a wordo introduci dia prome di januari ultimo y mester corta 7 miyon den Serlimar. Mientras cu Gobierno ta sinta cu sector di cuido, e condicion cu a wordo acorda pa corta 60 miyon den AZV ainda ta riba mesa. Ademas di reduccion di salario cu 12.5%, Gobierno mester corta mas ainda den aparato gubernamental segun e plan cu a wordo presenta na 2018, sinembargo Gobierno a aumenta e vacaturanan cu 8 miyon florin pa 2021,” Arends a splica.
“Ta situacionnan totalmente contradictorio nos ta mirando y nos ta spera pronto tur hende haya claridad di esaki. Manera cu fraccion di AVP a indica for di aña pasa, Gobierno di Aruba no tin autoridad mas pa hasi inversion for di prespuesto. CAFT a indica cu Gobierno mester elimina esaki y verifica prome cu COHO si e inversionan presupuesta ta den cuadro di e paketenan di reforma. Si COHO no ta haña necesario pa basha asfalt den un bario, e bario ey lo keda cu caminda di santo,” Arends a finalisa bisando.
