Ricardo Croes ta lider di Partido RED democratico y tabata presente tambe hunto cu su famia riba e anochi special pa celebra y recorda cu 20 aña pasa cu partido RED democratico a lanta. Ricardo Croes mes tin 10 aña cu e partido y ta expresa cu ta un honor pa su persona ta lider di partido RED di 2017 y tambe den e ultimo eleccion.
Segun Ricardo Croes partido RED Democratico ta un partido vicionario, cu integridad, un partido cu tin Pais Aruba na pecho y tambe ta un partido cu a trece diferente solucion tanto den e nivel di economia y riba e nivel di educacion. Manera tur hende por a tuma nota di dje den e ultimo gobernacion cu sr. Rudy Lampe tabata minister.
Lider di partido RED Ricardo Croes ta duna di conoce cu e ta honra te den su alma di por tin un colega manera Sr. Rudy Lampe, di tine como ehempel, minister y tine como fundado di Partido RED democratico. Tur esunnan cu conoce Sr. Rudy Lampe sa cu sr Rudy Lampe ta un persona integro y ta un persona cu no tin ningun interes den enrikece su mes personal ni pafo di gobierno corda den gobierno.
Den e ultimo 10 añanan aki como miembro di partido RED Ricardo Croes a bay eleccion na 2010, 2017 y na 2021 y ta spera di bay un eleccion mas y na mes momento ta spera cu pueblo por realisa cu Aruba tin mester di partido RED democratico no solamente den parlamento, pero den gobierno si defacto nos tur kier mira un cambio riba Pais Aruba, segun Ricardo Croes.
Loke cu ta resalta hopi ta cu nos comunidad tin un tradicion, por bisa casi un cultura di scoge partido geel of berde, pero tur hende sa cu e partido nan aki nan forma di hiba campaña ta entre otro haci promesanan cu nan no por cumpli mane nan mes un moto ta bisa campaña ta campaña y gobernacion ta otro, pero partido RED no ta haci esaki, segun Ricardo Croes.
Partido RED ta campaña cu berdad y cu un programa cu e por ehecuta si defacto si haya e oportunidad pa haci esey. Partido RED ta goberna abase di locual e la compromete su mes cu ne cu coalicion.
Den e caso cu a forma gobierno cu MEP-POR RED Sr. Rudy Lampe a haya 6 punto riba agenda pa cumpli cu ne cu ta sali for di e acuerdo di gobernacion, y partido RED a cumpli cu tur.
Segun Ricardo Croes e importancia ta pa e pueblo realisa e periodo y e tempo di politica tradicional y emocional no ta cumbini pais Aruba.
E pais ta keda bay den debe unda cu tin varios politico dilanti di corte pa corupto y otronan sentencia caba y otronan cu ta bay wordo sentencia ainda, pero tog e pueblo ta keda vota pa e mes un partido nan ey unda cu nan mes ta yama otro pa corupto.
Ricardo Croes ta duna di conoce cu partido AVP a perde dos miembro den parlamento pa motibo di e escandalo cu ta hole na corupcion, partido MEP a perde candidatonan den eleccion pasa. Partido MAS a lanta nobo y e lider tambe tabata sospechoso y tabata bao di investigacion unda cu nan a geseponeert e caso debi cu no tin suficiente prueba, sinembargo sospechoso ta keda sospechoso. E unico partido cu no ta bao di investigacion ta partido RED democratico.
Segun Ricardo Croes tanten cu e pueblo no realisa cu integridad ta iresponsabel pa maneho di placa di pueblo , cu integridad ta indespensabel pa ehecucion di plan nan integro cu ta na beneficio di pais Aruba e ora ey e pueblo lo no vota corectamente y e pais lo no haya locual cu e tin mester den su gobernantenan.
Ricardo croes na final ta gradici tur persona cu a sostene partido RED democratico durante tur e añanan cu a pasa y sigur sigur na tur esunnan cu a kere den e partido y cu a keda cu partido RED democratico den eleccion 2021. Sinembargo Partido RED ta cla y e pueblo di Aruba mester por habri su wowo y realisa cu nos mester di e cambio y e cambio di berdad ta di partido RED democratico.
