ORANJESTAD,Aruba
Prome Minister Evelyn Wever-Croes:
‘Danki na Dje’ ta e tema di e aña aki
Muchanan di klas 6 di Colegio Conrado Coronel tawata entusiama wardando riba bishita di Prome Minister Evelyn Wever-Croes na nan scol. Manera e añanan anterior durante e siman di celebracion di Dia di Betico, Prome Minister lo ta bishitando diferenta scol na Aruba. Dialuna merdia, Prome Minister a bishita Colegio Conrado Coronel pa asina e mes por conta e muchanan e historia, bida y logro di e gran luchador di nos Status Aparte, Gilberto François ‘Betico Croes’.
Prome Minister a comparti hopi informacion di e historia di bida y trabou di Betico Croes. E tema cu a wordo trata e aña aki ta ‘Danki na Dje’. Danki na Betico cu Aruba a logra Status Aparte na e momento apropia. E liderazgo di Betico Croes tabata uno di un Arubiano cu tabata dirigi su pueblo respetando derecho di cada ciudadano. E respet aki a conduci cu pueblo a duna Betico e sosten pa sigui lucha pa trece e union den tur ciudadano cu e determinacion pa por a realisa e deseo di e pueblo. Un resultado di e lucha ferviente di Betico Croes tawata cu Aruba a conoce su prome Gobernador y Procurador General entre otro.
Prome Minister a keda hopi impresiona cu e conocemento cu e muchanan ya tin di Betico Croes y esaki a wordo demostra door di nan contestanan riba diferente pregunta cu Prome Minister a haci nan. Pero e parti mas interesante ta tambe e preguntanan cu e muchanan a haci na Prome Minister, kende a expresa cu ta preguntanan hopi profundo biniendo for di muchanan di un edad asina hoben.
Riba e pregunta ‘Cua conseho Betico lo a duna, Prome Minister a conta cu pa Betico semper estudio tawata hopi importante. Semper studia pa asina bo por logra algo. Sigui bo soño y traha riba dje. Sea semper determina pa logra bo soño. Tuma curashi hasta ora cosnan ta mustra dificil. Sea prepara pa cosnan grandi.
Na final Prome Minister a invita tur mucha pa asisti na e Manifestacion Cultural diabierna awo, 24 di januari di 7:00 pa 10:30 PM na Plaza Libertador G.F. Betico Croes.
