Tin gran parti di e pueblo cu no ta vacuna ainda. Tin un parti pasobra simplemente na no ta kere den vacuna (no ta kere den coronavirus) pero tin un grupo cu no ta kere den e vacunanan cu ta uza tecnologia moderno, produci cu virus sintetico. Nan ta para tras di e vacuna tradicional. Tin posibilidad na caminda, pero con ta para cu derecho di e grupo aki.
Te aworaki Aruba a bin ta ricibi solamente vacuna Phizer / Moderna, cu tabata un di e promenan riba mercado. Su produccion rapido a crea hopi duda bou di un grupo grandi y autoridadnan local ta consciente cu e esaki ta e caso aki tambe na Aruba.
Durante e conferencia di prensa tene awe diasabra pa anuncia medidanan, e pregunta aki a bini dilanti. Hopi hende kier sa kico ta bay haci cu e grupo grandi di persona cu no ta vacuna ainda, simplemente pa motibo cu nan no ta kere den Phizer. Ki otro posibilidad e grupo aki tin? Nan kier sa si ta habri e caminda cu nan por scoge e vacuna cu nan kier, inclusive si esaki ta encera cu nan mester cubri esaki.
Sharlin Koolman, di Departamento di Malesanan Contagioso, a splica cu na Aruba ta uza solamente vacunanan aproba door di FDA (di Merca) y EMA (Europa). Desde cu a cuminsa cu vacunacion, Aruba y e otro cinco islanan ta haya tur nan vacunanan for di Hulanda. Y ta trata di e vacuna Phizer.
Sin embargo, el a splica, nan tin den stock desde dos luna pasa un alternativa pa esnan cu no kier haci uzo di Phizer. Ta trata aki di e vacuna di Johnson & Johnson, cu ta otro tipo di vacuna, pues no ta basa riba e sistema di MRA, pero e vacuna traha di forma tradicional. Esnan cu no ta kere den Phizer, por haci un cita yamando Salubridad Publico. E unico desbentaha ta cu mester vacuna den grupo cada bes di diez persona, pasobra cada caha cu habri tin diez vacuna. Ora cu tin un grupo di diez of binti persona, ta vacuna e grupo aki mayoría biaha riba diabierna.
Koolman a splica cu Aruba a haya 2500 dosis di J&J, pero te aworaki a uza rond di 100 vacuna so. Na diferente ocasion a publica cu e ciudadanonan tin un alternativa si nan no kier Phizer.
Sin embargo, informacion compila door di EA News ta mustra cu hopi hende kier e vacuna nobo Novavax, cu tambe ta uno produci di e forma tradicional. Pero nan no ta haya contesta di autoridadnan con nan por yega na remarca pa vacuna cu Novavax cu denter di algun siman lo haya su aprobación a e uzo como vacuna di emergencia. Esaki ta un posibilidad cu no solamente Gobierno pero autoridadnan local di salud lo mester permiti, pa logra un vacunacion mas amplio, segun e pensamento di cada ciudadano.
Novavax
Novavax ta wordo conisdera e speransa nobo pa combati Coronavirus y ta ofrece un proteccion di 100% contra casonan GRAVE di COVID y lo por hunga un papel central den e campaña mundial di vacunacion.
E tecnologia uza ta conoci, e formula ta efectivo, e ta facil di transporta y warda, y por produci esaki den cantidadnan grandi hopi lihe.
Cu un nivel di efectividad di 90.4%, e vacuna NVX-CoV2373 ta na nivel di esnan prepara a base di RNAm di BioNTech/Pfizer y Moderna. En concreto, entre e personanan cu a ricibi e dos dosisnan di Novavax tabatin 90 porciento menos di casonan di COVID-19 compara cu esnan cu no a wordo vacuna. Pero loke ta importante ta cu e vacuna a logra na 100% di proteccion contra casonan medianamente grave y grave.
NVX-CoV2373 no ta un vacuna di ARN (manera esnan di BioNTech/Pfizer y Moderna) ni di vector (manera di AstraZeneca y Johnson&Johnson). NVX-CoV2373 ta basa riba proteina, e ta contene un particula chikito di e proteina Spike di coronavirus. E formula ta funciona mescos cu e vacunanan contra hepatitis B o tetanos. Pesey e tambe ta bin den dos dosis. E tipo di vacunanan aki ta conoci y ta mas tolerabel pa e curpa humano. E unico desventaha ta cu ta tuma mas tempo a desaroya nan y ta motibo cu te awo el a bin keda cla.
Banda di esaki, NVX-CoV2373 ta un vacuna combina, cu ta protege contra coronavirus y griep na mesun momento.
World Health Organization a bisa cu e impacto di vacunanan COVID-19 riba pandemia ta depende di diferente. Con lihe por producie, vacuna y cuanto hende vacuna. Pero vacuna di COVID-19 lo no ta 100% efectivo. Ta trahando pa nan ta mas efectivo posibel, pa nan tin un miho impacto riba e pandemia. “Pero no ta e vacuna lo stop e pandemia, e ta e vacunacion. Mester sigura acceso husto e igual na vacuna, y sigura cu tur pais ta ricibi esaki y uza nan pa protege nan hendenan.” Aruba por cumpli cu e pensamento aki abriendo posibilidad pa tur hende vacuna, creando posibilidad di acceso na diferente tipo di vacuna, incluyendo Novavax.
Sinembargo I&O Research lo haci investigacion riba tur seis isla dicon si y dicon no e personanan ta vacuna. Cu esaki Hulanda y e gobierno nan di e isla lo haya e resultado y sa tambe kico tur ta biba bao di e comunidad riba henter e situacion di vacuna contra di Covid -19. Asina tambe ta haya sa con dispuesto e habitantenan di cada isla ta pa vacuna si of no.
Importante ta pa haya informacion dicon hende ta vacuna y dicon nan no ta vacuna , e situacion aki no ta trata pa haya sa sea cu bo a vacuna of no a vacuna, pero mas tanto kier haya sa e motibonan dicon a vacuna y dicon no ta scoge pa vacuna.
Na momento cu e investigacion keda cla lo duna cada gobierno y tambe gobierno di reino Hulandes e resultado pa asina nan haya sa kico ta biba bao di cada comunidad di cada isla. Na momento cu Hulanda haya esaki lo keda na Hulanda pa dicidi kico nan lo bay haci cu e consehonan cu I&O Research a acumula pa nan entre e islanan. E team cu ta investigando nan focus ta tambe pa tur hende haya un stem y vocifera kico nan ta sinti riba henter e proceso di vacunacion na e islanan den Caribe cu ta Aruba, Boneiro, Corsou, Saba, Sint Eustatius y Sint Maarten.
