Celebracion di Dia Mundial di Turismo ta un ocasion den cual Minister di Turismo y Salud Publico Sr. Dangui Oduber ta tuma e oportunidad pa, no solamente conscientiza comunidad riba e importancia di e industria pa nos pais y celebra tur e individuonan cu nan trabou diario ta carga esaki. Pero e ta un dia tambe pa comparti conocemento cu ta permiti tur partido envolvi pa alcanza e obhetivonan di ‘best practices’.
Dia Mundial di Turismo ta celebra riba 27 di September y den conexion cu esaki Minister Oduber a atende y duna un discurso den e conferencia di Dia Mundial di Turismo. Aki e mandatario a topa cu e studiantenan di Universidad di Aruba “Faculty of Hospitality and Tourism Management” caminda a hiba combersacion riba turismo. Minister Oduber a enfoca riba e inversion den nos hendenan. Segun e mandatario ta e hospitalidad y cordialidad di nos hendenan ta locual ta primordial y ta laga nos Dushi Aruba sobresali riba tur otro destinacionnan. Minister Oduber a compromete cu su prioridad como Minister di Turismo lo ta pa semper promove oportunidadnan di crecemento, pa semper zorg pa nos hendenan por traha den un ambiente di trabou sigur.
E siman aki ta marca siman di turismo y Minister Oduber ta desea tur miembro di dicho sector un feliz Dia Mundial di Turismo. Tuma e momento pa reflexiona y renoba nos compromiso pa cu e profesionalismo, nos nivel di servicio y pa brinda e mihor experiencia posibel na tur bishitante cu nos isla ta ricibi. Esaki ta bon pa nos turismo, nos econonia, pero e ta bon pa nos comunidad tambe principalmente.
