Presidente di comision di transporte na parlamento Raymond Kamperveen despues di e reunion den parlamento ta duna di conoce cu e reunion a dura basta largo unda cu a cuminsa banda di 9 or di mainta y a termina pa 2 or pasa di atardi. Interesante di e reunion aki ta cu hopi di e parlamentarionan a asisti e reunion aki , tanto esunnan di comision y esunnan cu no ta den e comision pero cu si por participa y a duna tur parlamentario oportunidad pa haci pregunta.
Segun parlamentario Kamperveen e reunion a bay den un sfeer unda cu a haci hopi pregunta y preocupacion. Diferente contestanan a keda contesta y asina e reunion a cuminsa cana. Presidente di e comision a duna di conoce cu e no por papia hopi debi cu den un reunion di comision no por divulga kico tur a ser papia den e reunion di comision. Esaki ta un regla di parlamento y cada parlamentario mester mantene nan mes na dje.
A pidi minister pa sigui dialoga pero a compronde for di minister cu e tin cu contesta un carta di e grupo di taxistanan cu ta un asociacion cu si a sigui den reunion cu e mandatario y awo e mester contesta via di un carta e proposicion cu nan a trece aden como asociacion di taxista y di esaki lo sigui cu e reunionnan na mesa delibera pa asina duna nan aporte na e dos MB nan y un di tres MB cu lo aclaria e dos prome MB nan cu condicionnan. Por bisa cu tabatin hopi pregunta pero loke cu no ta keda falta ta e politikeria cu tambe tabatin.
Dos grupo a sinta cu minister uno cu e a bin cu nan abogado Canwood y e otro grupo cu a bin cu abogado Desiree Croes, sinembargo na final minister a sinta cu un grupo so y e reunion a sigui mane nada no a pasa y e grupo di e taxistanan cu ta mayoria a keda sinta cu e mandatario y na unda cu lo mester haya un contesta di minister riba e siguiente cambionan cu ta bay ta e di tres MB cu e mandatario ta bin ta pone riba e otro MB nan.
E grupo mayoria di taxista no ta diacuerdo cu minister Ursel Arends y ta pesey mes nan a Sali for di e reunion debi cu nan punto ta pa revoca e dos MB nan y minister tabata bon cla riba e parti aki cu e no lo haci esey, pesey mes e grupo mayoria di taxista a tuma e postura di bandona Sali, pero minister a keda den reunion cu e grupo minoria y sigui cu su decisionnan padilanti cu e grupo di taxistanan cu si kier dialoga.
